Syrly úı segiz qanat qosa tikken,
Jınapty qazynany bıik júkten.
Eń arty kese, aıaq ta altyn-kúmis,
Tańǵaldym: munsha baılyq qalaı bitken!

Bir kelgen jolaýshyǵa qıyr shetten,
Kórsetip qazynasyn maqtan etken.
Jınalǵan bir orynǵa topas kúshpen —
Momynnyń jasy shyǵar syǵyp tókken.

Baılyqqa azýlylar kúshpen jetken,
Aıamaı baılyq úshin aryn tókken.
Kedeıdiń mańdaı teri, taban aqy,
Baq emes, qydyr emes daryp bitken.

Quralǵan ondaı baılyq aram dertten
Beınetsiz rahat bolyp túsken tekten.
Álsizdiń adal malyn tartyp alyp,
Deıdi eken: «qudaı bizge násip etkeń».

Ne úshin kim berdi eken shendi shekpen,
Qandaılyq qyzmeti úshin halyqqa etken?
Eńbegin momyn eldiń kúshpen talap,
Ý úshin alǵan shyǵar elge sepken.

Baılyq pen dúnıeni qylǵań maqtan,
Sol úshin padıshaǵa eldi satqan.
Bar baılyǵy jınaǵan kózdiń jasy,
Eńbekpen bir maly joq terlep tapqan.

Kemdik joq onda endi mal men baqtan,
Tolyqsyp tórt qubyla shalqyp jatqan.
Neǵurly baq pen dáýlet artqan saıyn,
Soǵurly ýlandyra eldi shaqqan,

Sary jez — ıt qarǵysyn shen dep taqqan,
El satqan, para bergen — sóıtip jaqqan.
Qozǵalyp dúleı daýyl topandatsa,
Bolmassyń jaqqa qurly qalqyp aqqan.

* * *

Qyzy bar jalǵyz úıde jeke jatqan,
On somdyq ylǵı altyn sholpy taqqan.
Bilimsiz kóp nadannyń biri bu da,
Nesi artyq boıap qoıǵan qýyrshaqtan?

Qyzdyq da kútýshisi bir talaı jan,
Kórki joq kórgen kisi qalatyn tań.
Kútingen kúnge tımeı boıama bet,
Tákappar, doǵal sózdi, minezi pań.

Sol qyzdan basqa ul joq tuqym bolar,
Ie joq baq-dáýletin ustap turar.
Dese de qansha balam — qyz-jolaýshy,
Qashan keter, kim bilsin, qaıda qonar.

Erke qyz neshe jyldaı baı tańdady,
Omby, Semeı arasyn saıqaldady.
Kóńil súıip kezdesken keıbir jastar,
Azýly atasyna aıta almady.

«Alamyn, qushamyn» dep qyzyqqan kóp,
Shal ólse malyna ıe bolalyq dep.
Mal menen jasaý bolsa boldy olarǵa,
Bilim menen sanaly oı nege kerek!

Sol qyzǵa ótken jyly Asyl keldi,
Qazaqtan «zor oqyǵan» masyl keldi.
«Búkil qazaq taǵdyry óz qolymda»,—
Dep edi, qyz da kónip basyn berdi.

Qyz qandaı, jigit qandaı teńin tapqan,
Dáriptep qalyń elge qylǵan maqtan.
Bulardyń bar jumysy — túske deıin
Aq úıde qushaqtasyp uıyqtap jatqan.

Besinde uıqy qanyp turar zorǵa.
Taranyp, kúnde jańa kıer torqa.
Qolynan is bop óner esh nárse joq,
Sózbenen barlyq taǵdyr osy qolda.

Bul-daǵy bir masyl ǵoı kedeı sorǵa,
Tek qana baılar úshin jaıly jorǵa.
Qulqynnyń quly bolyp ardan bezgen,
«Halqym» degen basshynyń isi sol ma?!

Sondaılyq «zor» kúıeýge qolyn artyp,
Qaqpas shal maqtanady tasyp-shalqyp.
Sorpaǵa shyǵarlary solar bolsa,
Men ony quıar edim ıtke qalqyp.

---