InfoHub Logo

Qazaqtyń ulttyq kıimin kıgen búldirshinder jáne Jumagúl ájeı «Kóńil ashar»kúıiniń súıemeldeýimen, merekelik baǵdarlama ótetin jerge oryndaryna kelip jaıǵasady.
Júrgizýshi:
Armysyzdar halaıyq!
Barmysyńdar halaıyq!
Naýryz toıyn jup jazbaı,
Jylda qarsy alaıyq!
Balalar qar erip, jer kógerdi. Kún jylynyp, mal tóldep, aq túıeniń qarny jarylǵan kún týdy. Bul kúni kún men tún teńelip, adamdardyń aýzy aqqa tıetin, jer ústine shattyq ornaǵan kún. Qazaq eli osy kúndi «Ulystyń uly kúni, Ulys kúni»dep ataǵan.
Jumagúl ájeı sizge balalar naýryz toıyna daıyndaǵan taqpaqtaryn aıtyp bersin.
1 - bala: Baqta bulbul saırasyn,
Sándi kóktem nurymen.
Naýryz toıy jyrymen,
Kóńil gúldeı jaınasyn.
2 - bala: Qardy eritip jylǵasy,
Naýryz keldi jyl basy.
Shýaq tókti jaryq kún.
Meıramynda halyqtyń.
3 - bala: Bata berip atamyz,
Bata berip apamyz.
Tátti bolyp jasalǵan,
Naýryz kóje dámin tatamyz.
4 - bala: Qosh keldiń Naýryzym, ardaqty.
Halqym saǵan bar úmitin arnapty.
Jylda osylaı kele bersin jańaryp,
Gúlge bólep, nurǵa bólep aımaqty.
(Osy kezde eki bala shaýyp júgirip, súıinshi surap shyǵady.)
- Súıinshi, súıinshi!
- Alaqaı, alaqaı!
- Dúnıege náreste keldi!
- Áje súıinshi! Ómirge nemereńiz keldi.
Áje: Ne deıdi? Shyn aıtyp tursyńdar ma? Qulynym - aı! Qandaı jaqsy jańalyq, qudaı tileýińdi bersin.
Júrgizýshi:
Áje sizge balalar bir tamasha án oryndap bersin.
«Kóktem»áni oryndalady.
«Balbyraýyn» kúı áýenimen úsh batyr keledi.
Qarakereı Qabanbaı batyr:
Mereke naýryz jyl basy
Naýryz toıy qutty bolsyn!
Denderińiz saý, myqty bolsyn!
Aman esen bolaıyq!
Barshańyzǵa tilegim osy halaıyq.
Qanjyǵaly Bógenbaı batyr:
Amanbysyń, armysyń, halqym meniń,
Aqtarǵan keń dalamnyń altyn kenin.
Ardaqty Naýryz toıy, saltyń elim,
Naýryz toıy qutty bolsyn
Halqym meniń!
Shapyrashty Naýryzbaı batyr:
Kún men Aıǵa álemniń,
Berem ystyq sálemin.
Qarttaryma súıinip
Sálem berem ıilip.
Oıyn «Arqan tartys»
Júrgizýshi:
Naýryz - meıram júrekterge nur sepken,
Mańdaıymnan súıip jatyr gúl kóktem.
Jaryǵyńmen, shýaǵyńmen Jer - Ana
Alyp keldiń jer betine gúl kóktem!
Qurmanǵazynyń «Kishkentaı» kúıi oryndalyp, Jer - Ana úsh qyzymen kiredi.
Jer - Ana: Armysyzdar, halqym meniń! Men qasıetti Jer - Anamyn,
tirshiliktiń kózimin. Búgingi Naýryz merekelerińiz qutty bolsyn!
Osy merekege úsh batyr da kelipti. Men osy batyrlar qataryna úsh qyzymdy qosaıyn.
1 - qyz bala:
Ata - babam toılaǵan,
Naýryzym, armysyń?!
Qyzyǵyna toımaǵan
Darhan dala, qarly shyń.
2 - qyz bala:
Merekesi baıyrǵy
Aldy halqym qabyldap,
Aq dastarhan jaıyldy
Oshaqta ot jalyndap
3 - qyz bala:
Uly kúni Ulystyń
Dastarhanda barymyz
Qutty bolsyn, Naýryz
Sarqylmasyn sary ýyz.
Án «Atameken»
Júrgizýshi:
Al, qurmetti halaıyq, osyndaı dúbirli merekege qonaqtar kóp keledi. Biz sol qonaqtardy qarsy alaıyq.
«Keń jaılaý»kúıiniń áýenimen Qydyr ata men Tazsha bala keledi.
Qydyr ata: Assalaýmaǵaleıkým, halqym! Naýryz toılaryń qutty bolsyn!
Tazsha bala:
Týa salyp atandym Tazsha bala,
Mendeı ańqaý bolmas - aý basqa bala.
Naýryz toıy ótedi degendi estip,
Qydyr atamen birge keldim men de osynda.
Án «Áz - Naýryz»
Oıyn «Átesh kúres»
«Besikke salý» rásimi tamashalańyzdar.
(Jumagúl ájeı kórsetedi)
Júrgizýshi:
Jańbyrmenen jer kógeredi
Batyrmenen el kógeredi,- degendeı, qonaqqa kelgen Qydyr ata, Jer - Ana, Bógenbaı batyr bata bersin.
Qydyr ata batasy:
Ulys oń bolsyn!
Aq mol bolsyn!
Qaıda barsa, jol bolsyn!
Ulys baqty bolsyn,
Ulys bereke bersin
Tórt túlik aqty bolsyn.
Bále - jala jerge ensin!
Áýmın!
Jer - Ana batasy:
Dastarhandaryńa bereke bersin,
Bastaryńa mereke bersin,
Astaryńa adaldyq bersin,
Bastaryńa amandyq bersin,
Denderińe saýlyq bersin,
Naýryz baqyt ákelip,
Toıǵa ulassyn toıymyz!
Áýmın!
Bógenbaı batyr batasy:
Ulys baqty bolsyn,
Ár kúnimiz jaqsy bolsyn,
Dostyǵymyz berik bolsyn,
Bilim - óner serik bolsyn!
Ulys oń bolsyn!
Aq mol bolsyn!
Qaıda barsań jol bolsyn!
Kúı áýenimen kelgen qonaqtar shyǵyp ketedi.
Júrgizýshi sózi: Kóńil qoıyp tyńdaǵandaryńyzǵa rahmet.

Aqmola oblysy, Kókshetaý qalasy,
№1 Arman balabaqshasynyń
tárbıeshisi Temırbekova Laýra Aýgapasova