InfoHub Logo

Ertede bir baı jylqyshylaryna ár jyly taban et, mańdaı teriń bir jabaǵy taı dep belgilengen eken.

Baı bir joly jylqyǵa shyǵyp, jylqylaryn syrttaı tamashalap júredi. Sonda qasynda aralatyp júrgen jalshysy óziniń jyldyq aqysyn surap qalady. Baı oǵan aıǵyr úıiriniń shetinde turǵan óli júni túspegen bir kúreń taıdy kórsetedi de, sony aqyńa bergenim deıdi. Aılar aýysyp, jyldar jyljyp kúreń taı at bolǵan da, bir aýylda úlken bir toı bolyp, 300 at báıgege qosylady. Báıge kelgende birinshi bolyp qoıan súıek kúreń at keledi. Ony kórgen baı attyń ıesin, tegin qýzaı kele óziniń kezinde jalshyǵa bergen jaman jabaǵysy ekenin biledi. Sonda baı óz aıǵyrynyń tuqymy ekenin aıtyp daý shyǵarady, jalshyǵa kúsh kórsetedi. Jıylǵan barlyq ulyq buǵan belgili kesim aıtpaıdy. Ádiletsizdikke kúıgen jalshy, kezinde taban et, mańdaı terim úshin ózi bergen dep shyjyqtaıdy. Sonda kóldeneń adam retinde araǵa bireý túsip jalshyǵa: «Bul jolǵy báıge ózińdiki, al talas bolyp otyrǵan osy atqa kim júz jylqy berse, sol alsyn» — degen eken. Otyrǵandar dýyldasyp kelise almaı otyrǵanda, esik jaqta bir azamat dombyradan kúmbirletip kúı shertedi. Úı ishi tyna qalyp, ershimdi kúıden búgingi
júldeli júıriktiń kósile shapqan shabysyn bir kórgendeı bolady.

Kúıshi dombyrasyn báseńdetip baryp: «Men eki júz jylqy atadym. Myna kúı búgingi Qozykúreńniń shabysy, munym — júz jylqy, endi basynan uryp júz jylqy sanap beremin», — dep keýde urady. Aqyry, osy bir jomart saldyń pıǵylyna rıza bolǵan jalshy «Atymnyń ataǵy tarıhqa kúı bolyp qalǵany úshin elýin alaıyn, mine, atyń», — dep salǵa atty beripti.

 

---