InfoHub Logo

Raqymjan Qoshqarbaev (19.10.1924, Aqmola oblysy, Aqmola aýdany — 10.8.1988, almaty) — Berlındegi Reıhstagqa jeńis týyn tikken qazaq azamaty, Halyq qaharmany (1999). 1942 jyly áskerge alynyp, 1944 jyly Frýnzedegi (Bishkek) jaıaý ásker ýchılıshesin bitirgen. 1944 jyly qazan aıynan bastap 1-Belorýs maıdanyndaǵy 150-Idrısk atqyshtar dıvızıasy quramynda vzvod basqaryp, Polsha jáne Germanıa jerlerindegi urystarǵa qatynasady. Leıtenant Qoshqarbaev Berlın operasıasy kezinde asqan erlik kórsetti. 30 sáýirde ol jaýynger Grıgorıı Býlatov ekeýi Keńes áskerleri arasynan Reıhstagqa aldymen jetip, jeńis týyn tikti. Soǵystan keıingi jyldary Elba boıyndaǵy keńestik okýpasıalyq ásker bóliminde qyzmet atqardy. 1947-67 jyldary Aqmola oblysy atkomynda nusqaýshy, Qazaq KSR Mınıstrler Keńesi janyndaǵy qonys aýdarýshylar jónindegi bas basqarmada ınspektor, 1967 jyldan «Almaty» qonaq úıiniń dırektory boldy. Qyzyl Tý, İ dárejeli Otan soǵysy ordenderi, kóptegen medaldarmen marapattalǵan.

---