Saǵynyshtan sarǵaıyp sary qaıyń,
Japyraqtar shertedi sary ýaıym.
Kerneıletip, syńsytyp jet, tyrnalar,
Uzatqaly barady sáýir aıyn.
Enesinen qulyndar jerigen be?!
Arylypty bal-sýsyn jeliden de.
Qıqýlaǵan tyrnanyń qanatynda.
Jaz ilesip barady kerýenge.
Juqa shapan jamylǵan boz dalany,
Áldıleıdi tyrnanyń sozǵan áni.
Qalbalaqtap qańbaqtar qarbalasta,
Baǵytyna basy aýǵan qozǵalady.
Balaýsa joq, balǵyn joq terbetýge,
Terbeledi qıaqtar jelmen túnde.
Qyzylkúreń qorjynyn toltyryp ap,
Habarshy kúz jortyp júr jer betinde,
Raýshan gúline sen serik ediń,
Raýshan arasynan kórip edim.
O, meniń aqqanat qus - mahabbatym,
Qaıdasyń, qaıtsem saǵan kórinemin?..
Dúnıe tynysh edi «qulaqqa urǵan»,
Talyqsyp tal boıynda shýaq tunǵan.
Tabıǵat sonda saǵan, raýshanǵa,
Barynsha bar jasaýyn laqtyrǵan.
Esińde me?
Sonda sen baıqadyń ba?
Dir ettim, janaryńnan taıqadym da.
Sol kúni raýshannyń ózin emes,
Iisin syılaǵansyń qaıtarymda.
Gúldi qoıshy, gúl ata yrymy ma,
Máńgi shatpyn sol kúngi qylyǵyńa.
Gúl ıisi tur eken júrekke uryp,
Tanaýymdy taqasam burymyńa.
Gúldi qoıshy, semedi gúl degeniń,
(Gúl syılap, gúl alýdy bilmegenim...)
Qaıdasyń?..
Men túsimde ekeý bolyp,
Erteńgisin jalǵyz bop túregelemin.
O, meniń aqqanat qus - mahabbatym,
Qaıdasyń janǵa shıpa shapaǵatym?
Sen qaıda, kúnder qaıda, túnder qaıda,
Mahabbat... mahabbat dep atalatyn?..

---