InfoHub Logo

Bir kúni Juqa áıelimen ursysyp qalyp, áıelin taıaqpen tópeshteı jónelipti. Áıeli oıbaılaǵan qalypta kórshisiniń úıine qashyp barypty. Osy kezde bul úıde toı bolyp jatady eken. Juqa toı bolyp jatqan jerge áıelin artynan qýa kelipti. Úı ıesi men qonaqtar oǵan basý aıtyp:

— Ózińiz bizge áıel adamnyń aqyly qysqa bolady deýshi edińiz ǵoı, qoıyńyz, qaıtesiz ony, — depti. Juqanyń birtindep ashýy basylypty. Úı ıesi Juqaǵa qarap:

— Juqa myrza, sizge qatty uıattymyn, búgingi toıǵa sizdi shaqyra almaı qaldym. Búgin kileń jastar keledi, olardyń shýy kóp, mazańyzdy alar dep oıladym. Kelip qalǵan ekensiz, toıdyń taǵamynan aýyz tıińiz, — depti.

Taǵamdar tartylypty, Juqa tórge otyryp alyp, taǵamdardan tartynbaı jeı beripti. Aldyna palaý kelgende art-artynan qarbyta asaı túsip, tabaqtyń ózine qaraǵan jaǵyn bir demde taqyrlap jiberipti. Sonan soń tabaqqa tesile qarap otyryp:

— Iapyr-aı, álgi qatyn qaıda buǵyp aldy eken, qolyma tússe qulaǵynan ustar edim de, myna tabaqtaı aınaldyrar edim-aý, — dep tabaqtyń taqyrlanǵan jaǵyn taıqytyp jiberip, jelinbegen jaǵynan taǵy asaǵaly turypty. Kópshilik kúlip ketip:

— Juqa myrza ashýlanǵanda da qaljyńyn tastamaıdy eken-aý, — depti. Juqa tamaqtanyp bolyp bir shyny shaıdy qolyna alyp, kópshilikke:

— Men bul jerde búgin toı bolatyndyǵyn, toıda men eń jaqsy kóretin taǵamdardyń da ákelinetinin bilýshi edim. Biraq bular meni toıǵa shaqyrmady. Sonan soń áıelimmen aqyldasyp osy amaldy tapqan edim. Áıelder otyrǵan úıdegi áıelime aıtyp qoıyńdar, men ábden tamaqtanyp boldym, endi qaıtyp keteıin, — depti.

---