InfoHub Logo

Raıymbek batyr bala kezinen ań aýlaýǵa, saıat qurýǵa áýes bolyp ósken kisi eken. Kúzde jáne qys kúnderi aýyq-aýyq İle ózeniniń boıyndaǵy toǵaıdy aralap, ań men qus aýlaıdy. Sondaı saıat quryp júrgen kezderinde keıde shóbi qalyń toǵaı ishin qystap qalǵan abyz atasy Álmerektiń aýylyna ádeıilep baryp túsip sálem beredi. Uzaq áńgimelesip, nasıhatyn tyńdaıdy.

Birde sondaı áńgime ústinde Raıymbek batyr kókeıinen oryn tappaı, oıyna sińbeı júrgen keıbir jaılardyń mán-jaıyn abyz atadan surap dúnıe syryna qanady. Kóńilinde júrgen túıtkilderge anyq uǵym tabady.

Taǵy birde dúnıeniń qatparlaryn ashyp, uzaq áńgime aıtqan atasyn tapjylmaı tyńdap otyrǵan Raıymbek:

— Abyz ata, aıtyńyzshy, dúnıedegi eń qymbat ne nárse? — dep suraıdy.

Abyz únsiz oılanyp otyryp qalady da, biraz oıǵa shomady. Sodan keıin baryp, kókeıine túıgenin aıtady:

— Adam balasy tek jaqsylyqtardyń ǵana bola berýin tileıdi. Al sol ıgilik te, jaqsylyq ta Alla Taǵalanyń raqymymen, sharapatymen paıda bolady. Ol úshin óziń qaıyrymdy ister jasaýyń kerek. Sonda adamdar Allanyń meıirinen tógilgen shapaǵat nuryna bólenedi. Allanyń ámiri, ananyń aq súti, adamdar bir-birine meıirimdi bolýy — eń qasıetti izgilikter sanalady. Osylar ǵana adamdyǵyndy tanytady.

Álmerek abyzdyń ósıetin tyńdaǵan el tirshilik áreketterine de yqylaspen qulshynady.

---