InfoHub Logo

Bir sarań baı aıshylyq jerdegi bazarǵa bir top qoıyn satýǵa aıdap kelipti. Ákelgeni qurysyn, malyna bazardaǵy joq naryqty surap, saýdalaı kelgen adamdardy úrkitipti de turypty. Baıdan kúder úzgen kisiler kesh túse úıdi-úılerine tarapty. Bir kezde baı jan-jaǵyna qarasa, keń alańnyn ortasynda kózge shyqqan súıeldeı shoshaıyp bir ózi qalǵanyn kóredi. Endi qalaı óterin bilmeı sasyp turǵanda, qasyna qalanyń qýaqylaý bir kedeı jigiti keledi:

— Baıeke, myna maldaryńyzdy satasyz ba?

Qala jurtyn aldamshy dep oılaıtyn baı:

— Ket aýlaq! Seniń aldaýyńa túsetin ańqaý, ashyq aýyz men emes, — deıdi.

— Jaraıdy, satpasań, óziń bil, — deıdi álgi qý. «Taǵy bir kezdesermiz» degen oıyn ishine túıip ketedi ol.

Sarań baı sata almaǵan malyna kire etip aıdatyp, aýylyna qaıtady. Bir belden asqanda, jol shetinde «qaljıyp» jatqan bir syńar etikti kóredi. Álgini alyp, ustap turady da:

— Áttegen-aı, mynanyń ekinshi syńarynyń bolmaýyn-aı, áıtpese kıip alar edim, — deıdi. Sóıtedi de, syńar etikti laqtyryp tastap, ilgeri tartady.

Jáne bir qyrdan asqan soń, baı jol shetinde jatqan álgindeı taǵy da bir etiktiń syńaryn kóredi. Alyp kórse, jańaǵy etiktiń syńary eken. «Qap!» dep ókingen baı qoılaryn sol araǵa qaldyrady da, dereý keri qaıtady. Álginde almaı tastap ketken etikke jetýge asyǵady. Tasada buǵyp jatqan kedeıdiń kútkeni de osy bolatyn. Mynanyń bárin istep júrgen de sol edi. Sarań baıdyń qarasy kózden tasa bolysymen, onyń bar malyn aldyna salyp, jónine tartyp otyrady. Baı synar etikterdi jınap, ókpesi óship jetse, tastap ketken jerinde qoılary joq. Ol aýzy ańqaıyp, qolyndaǵy syńar etikke qarap, jan-jaǵyna bir qarap turyp qalady.

---