InfoHub Logo

Sulýlyqty árkim ár túrli túsinedi, biraq ol týraly jalpy túsinik bar. Tabıǵattyń sulýlyǵyna sheksiz súısinip tamsanamyz, sodan erekshe lázzat alamyz. Al adamnyń syrtqy sulýlyǵy kimge de bolsyn unaıdy. Alla jaratqan jer betindegi barlyq tirshilik ıeleriniń eń sulýy – adam kórinedi. Ár adamnyń bet-beınesi, keskin-kelbeti, minez-qulqy ár túrli, bir-birine uqsamaıdy. Barlyq halyqta sulýlyq belgileri: suńǵaq boı, qypsha bel, qyr muryn, qıǵash qas, oımaqaýyz, kúlim kóz, qolań shash, t.b. bolyp keledi. «Sulýlyq álemdi apattan saqtaıdy» demekshi, sulýlyqtyń ómirde mańyzy asa zor.

Qazirgi tańda elimizde sulýlyq salondaryna baryp betin kúıdirgen qyz-kelinshekter kóbeıip keledi. 200-den asa qyz-kelinshek sulýlyq salondarynan zardap shekken. Biriniń bet terisi búlinse, endi biri artyq daqtardan arylamyn dep júrip sary aýrýǵa shaldyǵypty. Kútpegen jerden ajarynan aıyrylyp, usqynsyz kúıge túskender endi ózderin sorlatqan salondardy jaýapqa tartqyza almaı júr. Kirpik-qasty qıyltyp, tipti erindi de shıedeı etip beremiz deıtin mekemelerde el estimegen sumdyqtar bolǵan. Sulýlyq salondarynyń qyzmetin paıdalanbas buryn mindetti túrde kelisim-shart jasaý qajet. Sonda ǵana siz kosmetolog bolsyn, shashtaraz bolsyn,qaı-qaısysyn zań júzinde jaýapqa tarta alasyz. Ókinishke qaraı, kóp jaǵdaıda kelinshekter osy máseleni umyt qaldyryp jatady. Dese de qazir kópshilik salonda kelisim-shart týraly ángime qozǵaýdyń ózi artyq. Resmı qujat túgili, medısınalyq anyqtamasy da joq mamandar qarańǵy jertólede otyrady. Onymen qoımaı, aqysyn tóleseńiz qyzmettiń kez-kelgen túrin kórsetýge daıynbyz deıdi. Osyndaı kúmándi mamandardyń kesirinen soqyr bolyp qalǵan pavlodarlyq kelinshek sol kúıi kinálilerdi jaýapqa tartqyza alǵan joq. Eń bolmasa emine dep aqsha da ustatpaǵan. Mundaı oqıǵalar sońǵy ýaqytta tipti kóbeıip barady. Biraq ázirge ondaı sulýlyq salony qyzmetkerlerin jaýapqa tartatyn birde bir bap joq eken.

Sonymen birge ajarlanamyn dep ajal qushqandar da az emes. Oral qalasynyń ortalyǵyndaǵy «Zvezda Vostoka» sulýlyq salonynyń jergilikti qyz-kelinshekterge qyzmet etip kele jatqanyna 10 jyldyń júzi bolǵan. Alaıda onyń ataǵy keshegi kúnge deıin dál bulaı jer jarǵan emes. Turaqty kelýshileriniń biri botoks ekpesinen kóz jumǵannan keıin bul salon aınalasy eki-úsh kúnniń ishinde ǵalamtor «juldyzyna» aınalyp shyǵa keldi. Reseıden arnaıy shaqyrtylǵan mamannyń kómegimen ajaryn asha túskisi kelgen Aıjan Jaqanova úsh balapany jetimek atanady dep oılaǵan da joq edi.

Beıresmı esepke júginsek, búginde Qazaqstanda árbir 10-shy áıel osy ınege áýes kórinedi. Sala mamandarynyń pikirinen uqqanymyz, qazir otandyq qyz-kelinshekter dıdaryn ekpeniń kómegimen árlendire túsý úshin medısınalyq bilimi joq kosmetologtardyń aldyna barýdan da júreksinbeıtin bolǵan.

Kórkine kórik qosyp, sulýlana túsýdi armandamaıtyn arý kemde kem. Biri kirpigine kirpik jalǵaıdy, al endi biri sý tıse de óshpeıtin boıaýlar saldyrtady. Tek mundaı sulýlyqtyń sońy sor bolyp jabysýy ábden múmkin. Sondyqtan dárigerler kóbine terige qaýipsiz ári paıdaly bal, qıar sekildi tabıǵı ónimderdi paıldalanýdy usynady.

Saıyn Toǵjan jýrnalısıka mamandyǵynyń 3 kýrs stýdenti

---