InfoHub Logo

Taqyryby: Tanymdyq saıys (til merekesine arnalǵan)
Maqsaty: a) Ana tiline degen súıispenshiligin arttyrý, tildiń qoǵamdyq - áleýmettik qyzmetin tanystyrý, til mereıin kóterý;
á) Oılaý, shyǵarmashylyq qabiletterin damytý, sheshendik sózderdiń mán - maǵynasyn túsindirip, boılaryna sińirý;
b) İzdenimpazdyqqa, sheshendikke, izgilikke tárbıeleý, ana tilin qasterleýge baýlý
Kórnekiligi: qanatty sózder, sýretter
Túri: tanymdyq oıyn
Ádisi: saıys

Ótý barysy
- Qurmetti ustazdar, oqýshylar, ata - analar. Mektebimizde 22 qyrkúıek Til merekesi aptalyǵy uıymdastyrylǵan bolatyn. Sol aptalyqtyń aıasynda ótkeli otyrǵan búgingi sharamyzǵa qosh keldińizder. Til merekesi qutty bolsyn!
Adamzat dúnıege kelgen soń ana tilinde sóılep, ana tilinde án salady. Ana tili – bizdiń ar - ojdan, adamgershiligimizdiń aınasy. Adam ana tilimen baqytty, ana tilimen asqaq. Til - halyqtyń ajyramas bóligi. Uly Abaıdyń ózi «Ótkirdiń júzi, kesteniń bizi, órnegin sendeı sala almas» dep tańyrqap taǵzym etken til. Tilimizge qurmet jasaý arqyly biz elimizge qurmet jasaımyz. Til týraly qanshama kesteli sóz aıtsaq ta taýysa almaspyz. Sondyqtan

Ana tilim, dana tilim - Táńirim
Saqtaı bilgen san ǵasyrlar jaryǵyn
Tilim meniń, Abaı, Ahmet sóılegen
Buǵaýlaýǵa, shubarlaýǵa kónbegen.
«Til - halyq janyn tanýdyń kilti» atty tanymdyq saıysymyzdy ashýǵa ruqsat etińizder.

Saıys kezeńderi
1. Tanystyrý, sálemdesý
2. Kim bilgir? (maqaldy jalǵastyrý)
3. Mánerlep oqý (til týraly)
4. Kórinis (sheshendik sózderden)
5. Án (til, otan, týǵan jer)
6. Bı (ulttyq bı)
7. Taǵam túri (daıyndalýy, paıdasy, qaı ulttyńki)

Saıysymyzdy bastamas buryn saıyskerlerge ádil tóreligin aıtatyn ádil qazylar alqasymen tanysaıyq.
Sálem - sózdiń anasy, sóz atasy
Ustazdardyń qabyl bolsyn batasy
Qol soǵyp, ortamyzǵa tarlandardy
Shaqyrsaq, bolmas sózdiń esh qatesi - dep ortaǵa saıysqa qatysýshy toptardy shaqyramyz
6 «a».......
1. Saıysymyzdy toptardyń tanystyrýynan bastaımyz.

2. Maqal - mátel - babadan qalǵan muramyz,
Yqylasymyzdy máıekteı sózge buramyz.
Maqalbaı ataı suraǵyn alyp kelipti,
Saıysker toptar, kóńilmen tyńdap turamyz. «Kim bilgir?»
(ár top eki qaǵazdan sýyryp, berilgen maqaldyń jalǵasyn tabý)

1. Sheshen sóz bastar...
2. Jaqsy baıqap sóıleıdi...
3. Ánsheıinde aýyz jappas...
4. Til - adam oıynyń....
5. Jasyńda qyljań bolsań.....
6. Tıse terekke....
7. Aıtylǵan sóz...
8. Ańdamaı sóılegen...
9. Bal tamǵan tilden....
10. Sheberdiń qoly ortaq....

3. Keıingi urpaq jyrlaryn jattap qanyqty,
Úlgi tutyp báıterekteı san alypty.
Kókiregi oıaý, sezimdi urpaq, qaıdasyń,
Óleńder oqyp, ózińdi - óziń tanytshy!- dep, kelesi kezekte til týraly óleńderdi mánerlep oqý saıysyna beremiz.

4. Ana tilim - ardaǵym, mártebelim,
Sen ǵaıyp bop ketkende qaıter edim?
Qadirin de halqymnyń bile almaı,
Qalar ma edi aıtylmaı aıtar ánim - degendeı óz ánderimen top ánshilerin ortamyzǵa shaqyramyz.

5. Máńgi ólmes, meıli zaýlap kósher zaman,
Jırenshedeı darıa sheshen babam,
Qazybek, Tóle, Áıteke - erdiń qunyn
Eki aýyz sózben sheshken kósem babam. Saıystyń kelesi bóliminde ár toptyń bı - sheshenderdiń sheshendik sózderinen daıyndaǵan kórinisterin tamashalańyzdar.

6. Halqyńnyń ádet - saltyna
Oılana qarap túıin túı
Shattyq syılap jalpyǵa
Jalǵasa bersin án men bı - dep ortaǵa myń buralǵan bıshilerimizdi shaqyramyz.

7. Sońǵy saıysymyz taǵam túri. (Aldyn ala daıyndalǵan taǵamnyń daıyndalý jolyn, qaı ulttyń, qandaı taǵamy ekenin, qandaı kezderde daıyndaıtynyn, densaýlyqqa paıdasyn, t. b. aıtý)

Ádilqazylarǵa sóz beriledi.

Áýezdisiń, ádemi tili elimniń
Áýenisiń ulan - baıtaq jerimniń
Samǵaı bersin shartarapqa ór úniń - degen tilekpen til merekesine arnalǵan saıysymyzdy aıaqtaımyz.
Barshańyzǵa da rahmet!