InfoHub Logo

Taraz memlekettik pedagogıkalyq ınstıtýtynda «Balasaǵun kitaphanasy» serıasy boıynsha birneshe jańa kitap jaryq kórdi.

Atalǵan oqý ornynyń aqparattyq-ımıdjdik qyzmetiniń taratqan málimetine qaraǵanda, «Túrkistan jınaǵynyń» 4 tomynda 1916 jylǵy ult-azattyq kóteriliske arnalǵan 22 ǵylymı maqala men ocherkter toptastyrylǵan. Ǵylymı jınaq atalǵan oqý orny janyndaǵy Júsip Balasaǵun atyndaǵy Túrkistan ólkesiniń tarıhyn zertteý ortalyǵynda daıyndalǵan.

«Túrkistan jınaǵy» - Túrkistan ólkesiniń (Ortalyq Azıanyń) kóne dáýirden búgingi kúnge deıingi tarıhyna, áleýmettik-ekonomıkalyq jaǵdaıyna, halyqtarynyń mádenı ómiri men turmys saltyna jáne taǵy basqa da kóptegen máselelerge arnalǵan maqalalar jarıalanǵan ǵylymı jınaq bolyp tabylady.

Sonymen qatar, «Túrkistan ólkesindegi 1916 jylǵy ult-azattyq kóterilis tarıhy (Syrdarıa jáne Jetisý oblystarynyń materıaldary boıynsha)» monografıasy da oqyrmanǵa jol tartty.

Atalǵan monografıada 1916 jylǵy patshanyń «Maýsym» jarlyǵyna qarsy Túrkistan ólkesinde ótken jergilikti halyqtar: qazaq, ózbek, qyrǵyz, dúngen, uıǵyrlardyń kóterilisteri baıandalǵan.

«Ǵylymı eńbektiń negizi Túrkistan ólkesindegi, atap aıtqanda Syrdarıa men Jetisý oblystaryndaǵy jergilikti turǵyndardyń 1916 jylǵy ult-azattyq kóteriliske shyǵýynyń áleýmettik-ekonomıkalyq, saıası-rýhanı sebepteri men alǵysharttaryn, kóterilistiń bastalýy men barysyn, patshalyq ákimshilik tarapynan kóterilisti qatygezdikpen basyp-janshýyn, jeńiliske ushyraǵan halyqtyń bosqynshylyqqa ushyrap kórshiles jatqan Qytaı jerine aýa kóshýi, qos ımperıanyń qyspaǵyna túsken bosqyndardy tarıhı Otanyna qaıtarýdaǵy qazaq zıalylarynyń eńbekteri muraǵattyq qujattar men tarıhı derekterdegi málimetterge súıene otyryp jazylǵan», - deıdi kitap avtory, QR UǴA korespondent múshesi, tarıh ǵylymdarynyń doktory, profesor Darıa Qojamjarova.

Kitap stýdentter, joǵary oqý oryndarynyń oqytýshylary men tarıhqa qyzyǵatyn oqyrman qaýymǵa arnalǵan.

---