InfoHub Logo

Ramazan men Raııana táttini óte qatty jaqsy kóredi.​ Ákesi bazarda júrgende ýatsap arqyly ótinish hat joldap:

— Áke, assalaýmaǵaleıkým! Vaflı, pránık, kámpıt, shokolad ala kelesiz be? — deıdi Ramazan.

— Saǵyz ben chýppa-chýps ta ala kelińiz! — dep qosyp qoıady qaryndasy Raııana. Anasy keıde:

— Bulaı ótinish jasaǵandy qoıyńdar.​ Onsyz da tisteriń aýyryp júr. Álde tis dárigeriniń ne aıtqanyn umytyp qaldyńdar ma? - dep eskertý jasaǵanyna mán bermeıdi...​ Odan qaldy anasynyń planshetine talasyp, biri oıyn oınaýǵa, biri qýyrshaqtar jaıly vaındar kórýge kirisip ketedi.​ Sabaqtyń da "onlaın" bolǵany mundaı jaqsy bolar ma?! Túske deıin ǵalamtorǵa armansyz kire alady.​ Tek anasy sabaqtaryn teksere bastaǵanda "qıyn bolyp jatyr" — dep,​ túrli syltaýlar aıta bastaıdy.

Keshke ákesi neshe túrli táttiler alyp keldi.​ Ekeýi qýana aıqaılap, kámpıtke endi qol sala bastap edi...​ anasy barlyq táttilerdi jınap alyp, shkafqa salyp, kilttep qoıdy. Sosyn ekeýine qarap:

— Budan bylaı kim kúnige on bet kitap oqyp, eki bet kórkem jazý jazyp, sabaqtaryn beske oqıdy, tek sol bala ǵana tátti jeıdi​ — dedi.​ Aǵaly-qaryndastar úndemeı qaldy. Analarynyń minezin biledi. Artyq daý-damaı táttiden qaǵýy múmkin. Únsiz ǵana qoldaryna kitaptaryn alyp, jyldamdata oqýǵa kirisip ketti.

Sodan beri úsh aı ótti..​ Ekeýi de úzdikter qatarynda! Planshetten tek paıdaly nárseler ǵana kóredi.​ Analary aldyn-ala ne kóretinderin, neshe mınýt kórýge bolatyndyǵyn eskertip otyrady. Tártipke baǵynbaǵan aǵasy kámpıtten qaǵylǵanda,​ qaryndasy anasyna kórsetpeı óz táttilerinen bólip bergen. Biraq aǵasy almady. "Qyzdardyń tapqan tabysynan, er-azamat birnárse alǵany..​ uıat" — dedi.

Jazǵy demalys bastalysymen Ramazan "aqparattyq bıznes" salasyn úırene bastady. Internet marketolog bolyp, kopıraıtıng, offer jazýdy úırenip aldy.​ Buıyrtsa anasyna kómektesip, ákesiniń bıznesin damytýǵa kirispek. Al ar jaǵy armansyz tátti alýǵa jetetin mol qarajat tabý.  Joooq,​ tátti qajet emes! Odan da "elektrondy samokat" alamyn - dep armandap ketedi.​ Álde..​ qaryndasyna qýyrshaqqa arnalǵan úıshik ápere me..?! Meıli,​ aldymen bıznesimdi bastaıynshy. Sosyn barlyq armandaǵan zattarymdy alamyn! — dep júr kishkene jigit.

Gúlmeken Qasenbaı
01.04.2021

---