InfoHub Logo

HH ǵasyrdyń túlegi, órtke tıgen daýyldaı óleńderi bar, qazaq aqyny Qasym Amanjolov  óz zamanynda: «Eı, tákappar dúnıe! Maǵan da bir qarashy. Tanımysyń sen meni? Men – qazaqtyń balasy!» dep maqtana jyrlaǵan eken. Iá, ıá, keńestik dáýirde osylaı maqtanypty. Al men, HHİ ǵasyrdyń urpaǵy, egemen eldiń erkesi: «Eı, tákappar dúnıe! Tanısyń ǵoı sen meni. Táýelsizdik -  tuǵyry. Elordam bar eńseli. Men – qazaqtyń bólshegi» dep maqtanamyn. Elim aman, jurtym tynysh, zamanym beıbit. Sondyqtan da kóńilim sergek, daýsym jarqyn, únim asqaq. Bári – Táýelsizdiktiń arqasy.

Táýelsizdik - qan tógý men jan berýdiń  kermek dáminen táttige aınalǵan jemisi. Talaı aqqan ter men tógilgen jastyń dáleli. Tarıhty tarazylaǵan ǵalymdardyń aıtýynsha, irili - usaqty 300-ge tarta qaqtyǵystyń nátıjesi 1991 jyly 16 jeltoqsanda dúnıege «Táýelsiz Qazaqstan» dep atalatyn  meniń elimdi ákeldi.  

Eldiń júgin «nar jolynda júk qaldyrmaıtyn» naǵyz er ǵana arqalaıdy. Eri eline arqa súıeıdi. Abyzdary azamatyna aqyl - keńes beredi. Halqy senim artady. Sóıtip, birlik pen yntymaqty tý etken eldiń irgesi sógilmeı, keleshekke nyq qadam basady. Mine, meniń elim –  osyndaı tirliktiń aınasy. «Bizdiń kúshimiz – birlikte», – dep árdaıym otandastaryn birge is qylýǵa shaqyratyn Nursultandaı Elbasymyz - memleketimizdiń kemeldenýine  kósh bastaǵan Kóshbasshy. Onyń myqtylyǵy sol, táı-táı basqan táýelsiz elin  súrindirmeı, orda buzar otyzǵa jaqyndatqany.

Men Elbasymdy maqtamaımyn, onymen maqtanamyn. Óıtkeni ol - kemeldený jolyna kósh bastaǵan, jas Qazaqstanyn jańa álemdegi jańa Qazaqstanǵa aınaldyrýǵa kúsh-jigerin jumsaǵan, halqynyń  ál-aýqatyn arttyrýǵa qoldaý kórsetken, bir maqsat, bir múdde, bir bolashaqpen álemge «Máńgilik El – Máńgilik Qazaqstan» dep atalatyn jańa dáýirdiń kelbetin kórsetýge yntyqqan, jastarynyń bolashaǵyna  rýhanı jańǵyrý arqyly baǵdar berip, babalarynyń júrgen jolyn zerdelep, tarıhyn túgendeýge serpin bergen kóregen kóshbasshy, eljandy Elbasy.

Osy jolǵa ol otyz jylǵa tarta ómirin arnady. Óshpes jyldar belesinde qazaq eli talaı belesterdi baǵyndyrdy. Bereke-birligimizdiń arqasynda álemge tanylǵan irgeli memleketke aınaldyq. Bul Elbasymyzdyń ózi aıtqandaı: «Búkil halqymyzdyń ortaq tabysy, birigip qol jetkizgen jetistigi». Alaıda osy jetistikterge Nursultan Ábishulynyń qosqan úlesi zor. Basqasyn aıtpaǵanda, onyń Qazaqstandy álemdik órkenıetti elder qataryna qosyp, halyqaralyq arenanyń joǵarǵy deńgeıine kótergeniniń ózi qaıda jatyr?!

Halqyn jarqyn bolashaqqa bastap, sol joldaǵy maqsat-mindetterin kórsetip beretin jyl saıynǵy Joldaýyn bylaı qoıǵanda, Elbasynyń «Bolashaqqa baǵdar: rýhanı jańǵyrý» maqalasy el damýynyń tarıhı kezeńine saı  mańyzy zor sheshim aıta biletin kóregen basshy ekendigin aıǵaqtaıdy. Ol rýhanı jańǵyrýdaǵy ulttyq sananyń róline basa nazar aýdaryp, birneshe mindetterdi aıqyndap berdi. Nátıjesinde, elimizdiń árbir azamaty óziniń týǵan jeriniń gúldenýine naqty úles qosýǵa umtyldy. Árqaısymyz halyqtyń ıgi dástúrinen tálim alyp, eljandylyq qasıetterdi boıymyzǵa sińirip ósýdemiz. Odan soń  «Uly Dalanyń jeti qyry» atty maqalasyn jarıalady. Maqalada aıtqandaı, «Biz óz otanymyz – Qazaq eli men onyń baıyrǵy halqy – qazaq halqyn, basqa órkenıetti eldermen salystyra otyryp, tarıh tolqynynda úzdiksiz damyp kele jatqan órkenıet retinde qarastyrýymyz kerek. Bul – tarıhqa degen durys ustanym. Sol arqyly túp tamyrymyzdy bilýge, ulttyq tarıhymyzǵa tereń úńilip, onyń túıinin sheshýge múmkindik týady» - degen tujyrym jasady.   Bul maqalasy onyń «Rýhanı jańǵyrý» jalpyulttyq baǵdarlamasynyń tikeleı jalǵasy ispetti boldy. Baǵamdap qarar bolsaq, Elbasy eńbekteriniń bárine ortaq ıdeıa bireý. Ol – bolashaq pen ótkendi úılestire, sabaqtastyra bilý. Sóıtip, «Máńgilik El» ıdeıasyn júzege asyryp, órkenıetter elinde «Máńgilik Qazaqstannyń» kelbetin ornyqtyrý.

«Máńgilik El» ıdeıasy – ultymyzdyń ǵasyrlar boıǵy armany. Nursultan Ábishuly Nazarbaev «Máńgilik El» ıdeıasyn jarıalaý arqyly kemel keleshekke baısaldy qadamdar jasaý jolyndaǵy táýelsiz Qazaqstannyń kózdegen zamanaýı maqsat-muraty rýhanı qundylyqtarmen sabaqtasyp jatqanyn, Eýrazıa túrkileriniń qara shańyraǵyn ustap qalǵan naqty murageri bolyp tabylatynyn dáleldedi. Ata-babalarymyzdyń armany da, ańsary da osy edi. Álem elderimen terezesi teń qatynas quraıtyn, álem kartasynan oıyp turyp oryn alatyn táýelsiz memleket qurý, tútini túzý shyqqan, urpaǵy erteńge senimmen qaraıtyn baqytty el bolý edi.

Babalar armanynyń  aqıqatqa aınalǵanyna eshkim daý týǵyza almasy anyq. Máńgilik eldiń irgetasy qalandy. Ony  «Elim» degen Eri men  «Balam» degen jurty qalady.

Keshegi egemendiktiń eleń-alań shaqtarynda elimizdiń eńsesin kóterip, shekaramyzdy shegendep, halqymyzdy tórtkúl dúnıege tanytqan, nurly bolashaqqa jetelegen, san ǵasyrlar boıǵy babalar armanyn baıandy etken, aıdaı álemge áıgilegen, halqymyzǵa pana, jastarǵa aǵa bolǵan Elbasyna, el aǵalaryna qaı kezde bolmasyn alǵysymyz sheksiz. Endigi keleshektiń órkendeýi bizdiń qolymyzda, otansúıgishtik rýhta tárbıelengen bolashaq urpaqtyń qolynda. Bul   bizdiń qolymyzdan keledi. Óıtkeni biz –  Kóktúriktiń  muraty «Máńgilik El» bolǵan HHİ ǵasyrdaǵy urpaqtarymyz, baby kelisip, baǵy janǵan, qut daryp, bereke qonǵan Táýelsiz Qazaq eliniń ulandarymyz!

---