InfoHub Logo

«Táýelsizdik ulandary»

Maqsaty: Oqýshylardyń qoǵamdyq áleýmettik tanymdyq jáne shyǵarmashylyq qabiletterin damytý;
«Jas ulan» uıymyna mekteptiń ozat, belsendi oqýshylaryn qabyldaý.
Mindeti: Oqýshylardyń áleýmettik tájirıbelerin baıytý jáne damytý, áleýmettik tanymdyq bastamalardy júzege asyrý;
Kórnekiligi: Q. R. rámizderi, qanatty sózder, gúl shoǵyrlary t. b.
Shaqyrylatyn qonaqtar: Aýyl ákimi, ardagerler keńesiniń tóraǵasy, mektep dırektory, mektep oqýshylary, ata - analar komıtetiniń tóraǵasy.

İ – júrgizýshi: Qaıyrly kún qadirli qonaqtar!
İİ júrgizýshi: Asa qurmetti ardagerler!
İ – júrgizýshi: Ulaǵatty ustazdar!
İİ - júrgizýshi: Qymbatty Otan súıer jastar!

İ – júrgizýshi: búgingi №98 orta mektebinde ótkizilgeli otyrǵan «Táýelsizdik ulandary» atty saltanatty jıynǵa qosh keldińizder!

İİ – júrgizýshi: Men qazaqpyn, ulanymyn elimniń,
Men qazaqpyn, tiregimin jerimniń.
Ulanymyn týyn kókke kótergen,
Erteńimin Egemendi elimniń

Meniń elim – Qazaqstan, Otanym!
Jyrlar jazyp, ózińdi ánge qosamyn
Máńgilikke qymbattysyń týǵan el,
Arta bersin, abyroıyń, ataǵyń!
İ – júrgizýshi: 2011 jyldyń 11 aqpanynda ótken «Nur Otan» HDP, Hİİİ Sezinde Elbasy, «Nur Otan» HDP Tóraǵasy N. Á. Nazarbaev Qazaqstannyń jas azamattarynyń basyn biriktiretin, «Jas Ulan» biryńǵaı jasóspirimder qozǵalysy jáne «Jas Qyran» balalar uıymdarynyń jańa júıesin qurý kerektigin atap ótken bolatyn.

İİ – júrgizýshi: 2011 jyldyń 6 shildesinde «Elorda kúnine» oraılastyrylyp, jastar uıymdary kóshbasshylarynan bastamashyl top Biryńǵaı «Jas Ulan» balalar men jasóspirimder uıymy Respýblıkalyq Qoǵamdyq Birlestigin qurdy.
Jasóspirimdermen balalardyń biryńǵaı «Jas Ulan» uıymyna qabyldanýy erikti túrde júrgiziledi jáne olardy Qazaqstan Respýblıkasynyń zańdaryna qaıshy kelmeıtin ortaq maqsat biriktiredi.
İ – júrgizýshi: «Jas Ulan» uıymy týraly Elbasymyz N. Á. Nazarbaev óz quttyqtaý sózinde: «Jas ulan» búkil Qazaqstanǵa taralyp, balalar men jasóspirimderdi tárbıeleýge, oqýdyń jáne tártiptiń úlgisin kórsetýge, Qazaqstannyń táýelsizdigin nyǵaıtýǵa, elimiz úshin qyzmet etýge, patrıot bolýǵa bárińizdi baýlıtyn bolsyn! – dep atap kórsetti.

Birlestik prezıdenti:
- Jas ulan! Túzelińder! Tik turyńdar!
- «Jas ulan» jáne «Jas qyran» uıymy oqýshylarynyń saltanatty jıynǵa daıyn ekendigi jóninde raport tapsyrylsyn.
№1 «Jas ulan» uıymynyń top basshysy óz raportyn tapsyrsyn!
№2 «Jas qyran» uıymynyń top basshysy óz raportyn tapsyrsyn!

- Birlestik prezıdenti: Jas Ulan! Túzelińder! Tik turyńdar!
Nazar aýdaryńyzdar! «Jas ulan» Respýblıkalyq balalar men jasóspirimder qoǵamdyq birlestiginiń TÝY kirgizilsin!
Týǵa qarap sap túzeńder!
(Tý kirgiziledi)
Búgin «Jas ulan» Respýblıkalyq qoǵamdyq birlestigine múshelikke, mektep jastarynyń ishinen eń úlgili, eń ádepti, tereń bilimdi, ozyq oıly, shyǵarmashyl jastary tańdalyp alyndy.

İİ – júrgizýshi: Táýelsiz el aıasynda beıbit ómirdiń, qamqor Otan – ananyń qushaǵynda baqytty balalyq kúnderin keship júrgen jas dostarymyzdy «Jas ulan» uıymynyń qataryna qabyldaý saltanatyna kýá bolmaqpyz.

İ – júrgizýshi: «Jas ulan» uıymyna 5 - 10 synyp oqýshylary arasynda 15 – oqýshy, al «Jas qyran» uıymyna 2 - 4 synyp oqýshylary arasynda 17 – oqýshy qabyldamaqpyz.

Búginde deıin óz ortasynyń kóshbasshysy bola bilgen, «Jas ulan» uıymynyń oqýshylaryn ortaǵa shaqyramyz. Olar túrli mektepishilik bilimdiler saıysynda júzden júırik júldeger atanǵandar:

1. Aıaǵanov Asylbek – mektepishilik saıystar jeńimpazy 5 - synyp
2. Bıjanov Aman – mektepishilik saıystar jeńimpazy 5 - synyp
3. Raımbaev Nurbaqyt – mektepishilik saıystar jeńimpazy 5 - synyp
.....
İİ – júrgizýshi: №98 orta mektepte ótkizilgeli otyrǵan «Táýelsizdik ulandary» atty «Jas ulan» balalar men jasóspirimder qoǵamdyq birlestigine aq jol tilep, tusaý keser quttyqtaý sóz jáne galstýk pen tósbelgi taǵý rásimi – aýyl ákimi Janarys Ernıazov jáne mektep dırektory Ermek Sátovke beriledi.
( Quttyqtaý sózder aıtylyp galstýk pen tósbelgi taǵylady.)
Kelesi kezekti ásem ánge berelik.

İ – júrgizýshi: Negizinde, «Jas ulan» qoǵamdyq birlestigine «Jas qyrandarda» óz úlesterin, óz únin qospaq. Olardyń ózderine tán jetistikteri men alǵan asýlary jeterlik. Ortaǵa «Jas qyrandar» tobyn shaqyramyz.
1. Mergenbaı Darıǵa – mektepishilik «Aıgólek» baıqaýynyń jeńimpazy 2 - synyp
2. Orazǵalı Aıym – mektepishilik sporttyq saıystar jeńimpazy 2 - synyp
3. Táńirbaı Nurlan – mektepishilik sporttyq saıystar jeńimpazy 2 - synyp
....
«Jas qyran» balalar men jasóspirimder qoǵamdyq birlestigine aq jol tilep, quttyqtaý sóz jáne galstýk pen tósbelgi taǵý rásimi – Ardagerler keńesiniń tóraǵasy Ertas Sársenov atamyzǵa jáne Ata - analar komıtetiniń tóraǵasy Amantaı Júrgenovke beriledi.
(Quttyqtaý sózder aıtylyp galstýk pen tósbelgi taǵylady.)
Kelesi kezekti Táýelsizdik merekesine arnalǵan montajǵa beremiz.
1 - oqýshy: Táýelsizdik eldiń altyn dińgegi,
Táýelsizdik – el armany, tilegi.
Táýelsizdik, tuǵyrly bol máńgilik,
Táýelsizdik, biz birgemiz únemi.

2 - oqýshy: Táýelsizdik, qutty bolsyn merekeń,
Ol qazaqtyń, ol meniń de merekem.
Táýelsizdik máńgi jasa qazaqpen,
Sensiń meniń qýanyshym berekem.

3 - oqýshy: Ómir jasyń uzaq bolsyn, ǵumyryń,
Táýelsizdik, berik bolsyn tuǵyryń.
Ashyq bolsyn, Táýelsizdik aspany,
Baıandy bop erteńmenen búginiń.

4 - oqýshy: Táýelsizdik, babalardyń urany,
Táýelsizdik, boıǵa taqqan tumary.
Táýelsizdik – túnekterde tunshyǵyp,
Yzǵar bolyp janyp qalǵan shyraǵy.

5 - oqýshy: Armandardy jaqyndatyp tym alys,
Bizdiń jaqqa jetken eken jyly aǵys.
Egemendik el baqyty, erteńi,
O, halaıyq! Qutty bolsyn qýanysh!

6 - oqýshy: Áz babam azattyqty ańsap ótken,
El úshin talaı sańlaq shahıd ketken.
Solardyń qudiretti oı - armany,
Tań bop táýelsizdik bizge jetken.

7 - oqýshy: Úlgi bizge atalardyń erligi,
Ulaǵatty ónegesi, eńbegi.
Táýelsizdik týyn ustap joǵary.
Búgingi urpaq - bolar eldiń erteńi.

8 - oqýshy: Egemendik el bolýdyń belgisi,
Basqa jurtpen teń juldyzy, teń kúshi.
«Egemendik» degen sózden estiler,
Ata jurttyń arysy men bergisi.
Hormen: Táýelsiz Qazaqstan - uly Otanym,
Kók týymdy qalaısha qulatarmyn
Typ - tynysh turyp jatqan jaıymyz bar,
Bárimiz balasyndaı bir atanyń,

Elimiz baq bereke, yrys bolsyn,
Qyzyl tilim qanjardaı qylysh bolsyn.
Halqymnyń ahýaly durys bolsyn,
Elimiz árqashanda tynysh bolsyn.
Aǵa tálimger: Minekeı biz osyndaı oqýda ozat, eńbekke adal, óner men sportta ójet te qaısar, elgezek jarqyn júzdi oqýshylarymyzdy barshaǵa úlgi ete alamyz.
Otanyń er ulany,
Jer qaıysqan qalyń qol,
Táýelsiz el ulany
Ant berýge daıyn bol!
Saltanatty túrde ant berý rásimi:
Saltanatty túrde ant berý rásimi 10 – synyp ozat oqýshysy Ámireev Abaıǵa beriledi.
- Men ____________________ Respýblıkalyq biryńǵaı «Jas ulan» balalar men jasóspirimder qataryna kire otyryp:
Óz Otanym – Qazaqstan Respýblıkasynyń patrıoty bolýǵa,
Memlekettik rámizderdi qurmetteýge, dáripteýge;
Týǵan elim, jerim, Otanymdy maqtanysh etýge;
Ata - anamdy qadirleýge;
Úlkenge qurmet, kishige izet kórsetýge;
Bilimge tabandylyqpen umtylýǵa;
Salaýatty ómir saltyn ustanýǵa;
Tabıǵatty aıalaýǵa;
«Jas ulan» Erejesin buljytpaı saqtaýǵa jáne ony óz dostarymnan talap etýge ant etemin.
Bizdiń jerlesterimizdiń dańqty erligi ónegesi negizinde erlikke úırenýge jáne Otanǵa sheksiz qyzmet etýge saltanatty túrde
ANT ETEMİN, ANT ETEMİN, ANT ETEMİN!

Aǵa tálimger: - Jas ulan! «El men jer jáne jas urpaq taǵdyry úshin kúresýge árqashanda daıyn
bol!»
Ulandar: - Árqashan daıynbyz!

«Jas ulan» uıymynyń Gımni oryndalady.
İ – júrgizýshi: Bilimdi kókirekte nur dep túsin,
Jigerim, jalyndy otty jyr dep túsin.
Atalǵan maqsat, talap, erejeni,
Oryndaýǵa báriń de mindettisiń!
- Mine bizdiń mektebimizdiń tárbıeli de tártipti, ushqyr oıly da alǵyr oqýshylary búgingi saltanatty jıynǵa «Jas ulan» jáne «Jas qyran» uıymyna múshelikke qabyldandy. Endigi quttyqtaý jáne qorytyndylaý sóz kezegi mektebimizdiń tárbıe isiniń meńgerýshisi Temirhan İztileýovke beriledi.

İİ – júrgizýshi: Álem súıgen saltymyz bar,
Beıbitshilik el urany
Ómir súıgen halqymyz bar,
Beıbit eldiń biz ulany – deı otyryp, kelesi kezekte bir top oqýshylarymyz ortaǵa shyǵyp quttyqtaý montajdaryn joldaıdy.
1 - oqýshy: Táýelsiz Qazaqstan baıtaq jerim,
Qýanysh qushaǵynda búgin elim.
Babalar amanatyn alǵa tartar,
«Jas ulan» atandyńdar mine, búgin.

2 - oqýshy: Qadamyńyz qutty bolsyn, Jas ulan!
Baq ketpesin halqymyzdyń basynan,
Ultyń úshin adal bolsyn árdaıym,

Tabylyńdar ıgi isterdiń qasynan!

3 - oqýshy: Jas ulandar – Otan – ana órkeni,
Úmit artqan bolashaǵy erteńi.
Týǵan eldiń dańqyn kókke órletip,
Gúlge bólep jasartyńdar ólkeni.

4 - oqýshy: Jas ulan! Jarqyldańdar, kúlińder!
Baqytty ómir súrińder.
Bar jaqsylyq, beıbitshilik,
Uly Otandy ardaq tutyp júrińder!

5 - oqýshy: Paryzymyz Uly Otanǵa adaldyq,
Boıymyzda bar óskindik, balalyq.
Barsha janǵa úlgi - ónege bolamyz,
Biz, Jas ulan! Adaldyqtan jaraldyq.

6 - oqýshy: Tynyshtyq – barshamyzdyń uranymyz,
Máńgilikke taýsylmaıtyn jyr ánimiz.
Armannyń asqaryna qanat qaqqan,
Baqytty beıbit eldiń ulanymyz.
Hormen: Biz, Jas ulan! – týǵan eldiń órkeni,
Úmit artqan bolashaǵy, erteńi.
Sol úmitti arqalaǵan ulandar,
Bolashaqqa izbasaryn ertedi.
Hor: «Atameken»

Birlestik prezıdenti:
- Jas ulan! Túzelińder! Tik turyńdar!
NAZAR AÝDARYŃYZDAR! «Jas ulan» Respýblıkalyq balalar men jasóspirimder qoǵamdyq birlestiginiń TÝY SHYǴARYLSYN!
Týǵa qarap sap túzeńder!

İ – júrgizýshi: - Búgingi «Táýelsizdik ulandary»atty saltanatty jıynymyzdy jabyq dep
jarıalaımyz!
İİ – júrgizýshi: Kelgen qonaqtarymyzǵa rahmet aıta otyryp, baqytty kúnder aıasynda kezdeskenshe saý bolyńyzdar!