InfoHub Logo

Búgin Ońtústik Qazaqstanda «Qazaqstan joly: Ult kóshbasshysymen birge  25 jyl beıbitshilik pen jasampazdyq» taqyrybynda  Qazaqstan Respýblıkasy Táýelsizdiginiń 25 jyldyǵyna arnalǵan halyqaralyq ǵylymı tájirıbelik konferensıa ótti, dep habarlaıdy oblys ákimdiginiń baspasóz qyzmeti.

Konferensıa jumysyna 26 memleketten 120-dan astam belgili ǵalymdar, sondaı-aq, qazaqstandyq 30 ýnıversıtettiń ǵalymdary bas qosty. M.Áýezov atyndaǵy OQMÝ-da ótken sharaǵa oblys ákimi Janseıit Túımebaev qatysyp, konferensıa jumysyna sáttilik tiledi.

«Máńgilik el ıdeıasynyń máni men mazmunyn jastarymyzdyń sanasyna sińire otyryp, olardyń boıynda belsendi azamattyq ustanymdy, otanshyldyq sezimdi, joǵary adamgershilik qasıetterdi qalyptastyrý bizdiń basty mindetimiz bolyp tabylady. Máselen, elimizde jyl saıyn «Bolashaq» baǵdarlamasy boıynsha úsh myńnan astam jas shetelge bilim alýǵa jiberilýde. Bul memlekettiń jas mamandarǵa jasap jatqan úlken qamqorlyǵy dep bilemin. Sondyqtan shetelde, ne bolmasa, ózimizde bilim alǵan bilikti mamandar otanymyzdyń, onyń ishinde Ońtústik óńiriniń órkendep, damýyna atsalysýlary kerek. Bul rette, jas ǵalymdardyń dýaldi oqý júıesimen bilim alýy mańyzdy», - dedi aımaq basshysy. 

Konferensıada Táýelsiz Qazaqstannyń qalyptasýy men damýyndaǵy QR Tuńǵysh  Prezıdenti Nursultan Nazarbaevtyń róli, Táýelsiz Qazaqstan muraty - «Máńgilik El» Ulttyq ıdeıasyn júzege asyrý, «Qazaqstan -2050» strategıasy - Qazaqstannyń áleýmettik-azamattyq júıesin júzege asyrýdaǵy jańa saıası baǵyt, Qazaqstannyń Táýelsizdik jolyndaǵy ult-azattyq qozǵalystary, Indýstrıaldy-ınnovasıalyq damý memlekettik baǵdarlamasyn iske asyrýdaǵy tehnologıalar men tehnıkalyq damýdyń ózekti máseleleri syndy taqyryptar talqylandy.

Halyqaralyq kezdesý barysynda aımaq basshysy atalǵan oqý ornynyń seriktesteri bolyp tabylatyn "KARLSKRONA LC AB" JSHS-niń bas dırektory Ýálıhan Ahmetov pen OQO Kásipkerler palatasynyń dırektory Asqar Ábýbákirovke elimizdiń ınjenerlik salasynyń damýyna qosqan úlesi úshin «Qazaqstannyń qurmetti ınjeneri» tósbelgisin tabystady. Sondaı-aq, jıynda metalýrgıa salasynda úsh ǵylymı jańalyq ashqan tehnıka ǵylymdarynyń doktory, profesor Qaırat Islamqulovqa Ǵylymı jańalyqtar men  ónertabystar halyqaralyq akademıasy prezıdentiniń atynan dıplomdar berildi. 

Munan bólek, jıynda dúnıejúzilik ǵylymı ortaǵa Qazaqstan Respýblıkasy Táýelsizdiginiń 25 jyldyǵyna arnalǵan M.Áýezov atyndaǵy OQMÝ ǵalymdarynyń, ǵylymı ashylymdary tanystyryldy. Atap aıtqanda, alǵash ret Uly jibek jolynyń saýda-ekonomıkalyq negizgi ortalyqtarynyń biri bolyp tabylatyn Otyrar alqabyndaǵy Ejelgi Qańly memleketi dáýiriniń arheologıalyq eskertkishteriniń (Besinshitóbe, Pyshaqshytóbe qalashyqtary jáne Altyntóbe qorymy) jádigerleri tanystyrylyp, tuńǵysh ret Qazaqstan-Reseı muraǵat qorynan alynǵan HH ǵasyrdyń basyndaǵy ult-azattyq qozǵalysynyń jańa qupıa qujattary arnaıy kórmege qoıyldy. Sondaı-aq, álemdik mańyzy bar ǵylymı ashylymdar reti tyńdaldy.

---