InfoHub Logo

Elordalyq oqýshylar týǵan ólkeniń tarıhı-mádenı qundylyqtarymen tereń tanysýda

Nur-Sultan qalasy Nazarbaev Zıatkerlik mektebiniń oqýshylary 1-5 qarasha aralyǵynda «Týǵan elge taǵzym» ólketaný-zertteý ekspedısıasy aıasynda óńirdiń kórikti jerlerin aralap, ǵylymı jobalaryna tyń materıal jınaýdy bastady. Bıyl, jobaǵa shańyraqtardan «Úzdik» dep tanylǵan 22 oqýshy qatysýda. Joryqtyń alǵashqy kúni oqýshylar Qabanbaı batyr kesenesine at basyn burdy.

Qabanbaı batyr kesenesi Aqmola oblysy Selınograd aýdany Qyzyljar aýylynda ornalasqan. Tarıh páni muǵalimi Aqtoty Ǵazızqyzy jas ólketanýshylarǵa Qabanbaı batyr jaıyndaǵy tarıhı derektermen jáne kesene jaıly kólemdi aqparatpen bólisti.  Jas ólketanýshy, 10 D synybynyń oqýshysy Shákirt Álı Rınatuly saıahattan alǵan áseri keremet ekendigin aıtty.

— «Ór tulǵa Qabanbaı batyr kesenesine barǵan saıahattan úlken jiger alyp qaıttym. Batyrdyń rýhy bizdi qanattandyrdy. Osy saıahat maǵan kóp jaqsy áser berip, jaqsy kóńil-kúıdemin. Men qazir Qabanbaı batyr kesenesin qalyń jurtshylyqqa tanystyrý maqsatynda Minecraft oıynynda batyr kesenesiniń maketin jasap shyǵardym. Bul óz kezeginde, meniń qurdastaryma týǵan ólkeniń tarıhı jerlerin nasıhattaýǵa arnalady».

Kýrator İńkar Mırhatqyzy oqýshylarǵa kesene janynda ornalasqan «Ulttyq panteon» jaıynda aıtyp ótti.

---