InfoHub Logo

Kún birde jylyp, birde sýyp, aýa raıy qubylatyn kúz aılarynda tumaý derti údeıe túsetini málim. Mamandar tumaýdan meılinshe saqtaný úshin jáne tumaýdan erterek aıyǵý úshin tómendegideı sharalardy oryndaýǵa keńes beredi:

● Tumaýdyń eń jaqsy emi demalý. Tezirek jazylý úshin úıde tynyǵyp, emdelý kerek. Ózge otbasy múshelerine juqtyrmaý úshin múmkindiginshe jeke qalýǵa tyrysyńyz. Jeke ydys qoldaný kerek. Ózge otbasy músheleriniń de maska taqqany abzal bolady.

● Túshkirgen, jótelgen jaǵdaıda bir rettik salfetkamen aýyzdy jabý kerek. Qolmen japqan jaǵdaıda qoldy jýý, qolmen betti, kózdi ýqalamaýǵa tyrysý kerek.

● Tazalyqqa mán berińiz. Ásirese qoldy jıi jýyp júrý kerek. Betti jýý, aýyz, muryndy shaıqaý, dene tazalyǵy (dýsh), jáne kıim, tósek tazalyǵyna nemquraıly qaramaý kerek. Aýadaǵy vırýstar edenge, jıhazdarǵa shógetindikten úı tazalyǵyn da qadaǵalaý kerek.  

● Jabyq jaılardy jeldetip turý, aýa almasýyn qamtamasyz etý kerek.

● Kóp sý ishińiz. Kúnine 8-10 staqan sý ishý aǵzadaǵy qaldyqtardyń deneden shyǵýyn qamtamasyz etedi. Sýdy ystyq emes jáne sýyq emes, jyly etip tutyný kerek.

● Uıqysyz qalmańyz. Tym az uıqy aýrýlardyń shaqyrýshysy. Máselen bir tún uıyqtamaý vırýstarǵa qarsy tótep beretin jasýshalardyń eki esege azaıýyna sebep bolady.

● Balańyz aýyrsa, dostaryna juqtyrmaýy úshin bala-baqshaǵa, sabaqqa jibermeńiz.

● Kúz mezgili bolsa da kúnge shyǵýǵa mán berińiz. Kúnnen alynatyn D dárýmeni aýrýlardan qorǵan bolady.

● Stress – aǵzanyń tózimdiligin azaıtyp, aýrýǵa shaldyǵýǵa ákeletin basty sebepterdiń biri. Sondyqtan ár túrli joldarmen stresten uzaq bolý, aýyrmaýdyń birden bir joly.

● Zıandy ádetterden bas tartyńyz. Temeki ımýnıtetti álsiretip qoımaı, qandaǵy S dárýmeniniń azaıýyna yqpal etedi.

● Imýnıtet júıesin kúsheıtý kerek. Kúshti ımýnıtettiń kilti salaýatty qorekte. Et pen sút ónimderinen turatyn baı proteın kózderimen qatar jemis-jıdek, kókónis jáne dándi-daqyl ónimderin tutynyp, ımýnıtetińizdi aýrýlarǵa qarsy tabıǵı qalqan ete alasyz. Ásirese baýyr, jumyrtqa sarysy, sábiz, órik, qyzanaq jáne dámdeýish kók shópterde bolatyn A dárýmeni  ımýnıtetti kúsheıtedi. Azyqtardan ońaı alynatyn V6 dárýmeni men folıı qyshqyly men myrysh ımýnıtet úshin qajetti antıdene jáne ımýndyq jasýshalardyń qalyptasýyna yqpal etedi. Et, sút ónimderi, baýyr jáne jumyrtqa sıaqtyproteınge baı azyqtarda bolatyn V6 dárýmeni antıdene qalyptasýynda áserli bolady. Al bul dárýmen jetkiliksiz bolǵan jaǵdaıda ımýnıtettiń álsireýi, ınfeksıalarǵa tózimsizdik oryn alýyna sebep bolady. Jańǵaq, sút, jumyrtqa jáne burshaqty daqyldarda kóptep tabylatyn myrysh bolsa ımýndyq jasýshalardyń kóbeıýin qamtamasyz etedi.

● Salaýatty qorektený men qatar sport, dene jattyǵýlary da ımýnıtettiń kúsheıýine yqpal etedi.  

---