InfoHub Logo

Ýnıversıtetter oblys ekonomıkasynyń damýyna óz úlesin qosýy kerek.

Bul týraly Ońtústik Qazaqstan oblysynyń ákimi Janseıit Túımebaev M.Áýezov atyndaǵy Ońtústik Qazaqstan Memlekettik ýnıversıtetin aralap, tanysý barysynda aıtty.

 

Joǵary oqý ornynyń tynys-tirshiligimen tanysyp, ondaǵy jas ǵalymdardyń ǵylymı jumystaryna qanyq bolǵan ákim, ondaǵy bilim berý-aqparattyq jáne elektrondy resýrstyq ortalyǵy men túrli zerthanalyq bólimderdi aralady. Atap aıtqanda, ýnıversıtettiń qurylys materıaldary, ósimdik sharýashylyǵy, tigin sehy, munaı-gaz salalaryna qatysty birqatar ortalyqtaryn kórip, stýdenttermen jáne oqytýshylarmen tildesti.   

Óńir basshysy joǵary oqý ornynyń rektory J.Myrhalyqovqa júıeli jumys júrgizýde birqatar tapsyrmalar júktedi. Máselen, ákim M.Áýezov atyndaǵy OQMÝ ǵalymdary oblystaǵy óndiris oryndarynda jańa ınovasıalyq tehnologıalardy endirý baǵytynda jumys istep, jergilikti taýarlardy shyǵarý arqyly óńir ekonomıkasyn damytý kerektigin aıtty. Sondaı-aq, Ońtústik Qazaqstanda shyǵatyn tabıǵı qurylys materıaldarynyń katalogyn jasap, olardy jergilikti qurylysta keńinen paıdalaný máselesine atsalysý men jaryq dıodtardyń túrlerin shyǵarýdy oılastyrý jaıyn nusqady.

Bolashaqta Shymkent qalasynda uıymdastyrylatyn ashyq murajaı baıqaýyna atalǵan oqý ornynyń ujymy men stýdentterin belsendi qatysýǵa shaqyrǵan oblys ákimi, birlesken jumystar arqyly óńirimizdi kórkeıtý kerektigine toqtaldy.

Sonymen birge, oqý ornyn aralaý kezinde J.Túımebaev ýnıversıtettiń «Jeńil tamaq ónerkásibi», «Pedagogıka jáne óner» fakúltetterinde bilim alyp júrgen bolashaq tiginshilermen, dızaınerlermen tildesip, ulttyq naqyshtaǵy kıimderdiń tek merekelik keshterge arnalǵanyn ǵana emes, kúndelikti turmysta kıýge bolatyn nusqalaryn tigýdi usyndy. Qazaq ulttyq kıimderiniń maýsymdyq túrlerine de nazar aýdarý qajettigine toqtalǵan aımaq basshysy, kıim-keshekterdi ótkizý men tapsyrys berý máselesinde ákimdik tarapynan barynsha qoldaý bolatynyn jetkizdi.  

M.Áýezov atyndaǵy OQMÝ 65 jyldan asa tarıhy bar joǵary tehnıkalyq jáne gýmanıtarlyq bilim berýdiń eki úlken mektebinen quralady. Munda 81 mamandyq boıynsha kúndizgi jáne syrtqy oqý túrlerinde 20 myńǵa jýyq stýdent oqıdy.  Qazirgi kezde ýnıversıtette 1461 oqytýshy ǵylymı-pedagogıkalyq jumyspen aınalysýda. Olardyń ishinde 2 Ulttyq ǵylym akademıasynyń akademıgi, 117 ǵylym doktory men profesorlar, 500-ge jýyq ǵylym kandıdaty men dosentter qyzmet etedi.

---