InfoHub Logo

Men bul maqalany jazarda kóp oılandym. Oılanyp júre berer me edim...

Birde bir ana maǵan bylaı dedi: «Jalǵyz ulym bar. Ol áli bala. Aýzynan aq ýyzy keppegen. Al qyzdar mazasyn alyp, neshe túrli áńgime jazady. Jaýap bermese nebir ádemi sózdermen ar-namysyna tıedi. Siz ne aıtasyz osyǵan?»- dep maǵan suraq qoıdy. Únsiz qaldym...

Qyzdar arasynda saýalnama júrgizdim. Tómendegideı suraqtar qoıdym:

«Qazaq qyzy qandaı bolý kerek? Qazaq qyzyna tán qandaı qasıetter boıyńda bar?

Ar, namys degendi neshinshi orynǵa qoıar ediń? «Qylyqty qyz» degenniń maǵynasy? «Qyzǵa qyryq úıden tyıý, qala berse kúńnen tyıý» degen maqal- máteldi  qalaı túsinesiń?

Únsizdik...Joǵaryda aıtylǵan áńgimedegi keıipker qyzdarymnyń janarlary tómen, júzderinde uıat órti tutandy. Bir qyzardy, bir surlandy. Qazaqta qyz bala birinshi bolyp sezimin bildirmeıtindigin aıttym. Ol úlken uıat ekenin túsindirdim.

Biraz ýaqyt ótken soń, sol suraq qoıǵan ana: «Ulyma sms jazý toqtaldy. Qulaǵymyz tynyshtaldy,» -dep kúlimsireıdi.

İshim alaı-túleı. Men de eki qyz tárbıelep otyrmyn. Bireýi 15-ke toldy. Ekinshisi áli 4-te . Qyzdaryma qandaı tárbıe berip jatyrmyn? Keshegi bizdi tárbıelegen aıaýly anashymnyń tárbıesin osy qyzdaryma bere alyp júrmin be?

Men úlken qyzymnyń aralasatyn qurby-qurdastarynan qyzym týraly suradym. Ana júreginiń jarylardaı qýanyshyn, baqytyn men sonda sezindim. Iaǵnı men óz anamnyń tárbıesin azdap bolsa da óz balama bere alǵanyma baqyttymyn.

Men maqalamda kóp nárseni jumbaqtadym. Sebebi, aıtylmaıtyn dúnıeler boldy. Esimder jasyryn qaldy. Bolǵan oqıǵanyń izimen jaı ǵana oı tastadym.

Kúndelikti kúıbiń tirshiliktiń qamymen júrgenimizde qyzdarymyz qaraýsyz qalyp qoımasyn. Óz balamyzdy tárbıeleýge ýaqyt jetpeı jatqanda, ózgeler tárbıelep, sanasyn ýlamasyna kim kepil? Qazaqtyń qara kózderi qor bolmaı, mazaq bolmaı júrse eken degen analyq tilegimdi ózderińizben bóliskim keldi. Keshegi sulý Jibekteı, arý Baıandaı, Álıa men Mánshúkteı ardaqty, aıaýly qara kózderimiz az ba? Sol arýlarymyzdyń salyp ketken sara, dara jolynda ar-namysty bıik túǵyrǵa qoıatyn qyzdar búginde saýsaqpen sanarlyqtaı ma? Oılanaıyq. Oılana otyryp, tyǵyryqtan shyǵar joldy izdeıik. Baqytty ananyń meıirimine bólenip, shýaǵyna shomylyp ósken qyz bala sypaıy, iltıpatty, ınabatty bolmaq. Tárbıeniń tamyryna salt-dástúrdiń, qazaqy tárbıeniń qundylyqtaryn sińire bilgen jón. Abyroı men ar-namysty baǵalaı alatyn qyz balany tárbıelep ósirsek,erteńimizdiń jarqyn, bolashaǵymyzdyń nurly bolary sózsiz.

Astana qalasy
Ǵ.Qaıyrbekov atyndaǵy
№2 mektep-gımnazıasy
qazaq tili men ádebıetiniń muǵalimi  
Qasymǵalıqyzy Laýra

---