InfoHub Logo

Bir kúni Qoja zırattyń aýlasynda kele jatqanda, baıqaýsyzda aıaǵy taıyp ketip, bir kórdiń ishine qulap túsedi. Shań-topyraq bolǵan kıimin sheship, qaǵyp-silkip tazalaı bastaıdy. Súıtip turyp ol: «Ólgen adam bolyp, jata qalaıyn, múńkir-náńkir keler me eken, joq pa eken» dep oılaıdy.

Sol kezde zıratqa qaraı jóńkilip kele jatqan qashyrǵa júk artqan kerýen kezine túsedi. Qoja kúńgirlegen qońyraý daýsyn, kerýenshilerdiń aıǵaı-shýyn estigende, á degende bunyń ne ekenin túsine almaı qalyp, ishinen: «Qap, qap, qap! Oıynnan ot shyǵadynyń keri boldy-aý, aqyrzamannyń bastalǵany ǵoı bul» dep oılaıdy. Sasqalaqtap ne isterin bilmeı, ábiger bolyp, aqyrynda kórden shyǵa qashady.

Bul kezde kerýen jaqyndap kelip qalǵan bolatyn. Ústi-basy shań-topyraq, kıimi alba-julba adamnan qashyrlar úrkip bir-birine soǵylyp, ústerine artqan qymbat júkti, shyny ydys-aıaqty shashyp, kúl-talqanyn shyǵarady. Alǵashynda ne bolǵanyn birden ańǵara almaı, melshıip qalǵan kerýenshiler Qojany qýyp beredi. Olar Qojany qýyp jetip:

— Sen kimsiń óziń? Moladan ne izdep júrsiń? — dep suraıdy.

— Men o dúnıeniń adamymyn, biraz serýendep qaıtaıyn dep edim, — deıdi Qoja.

Eńgezerdeı-eńgezerdeı jigitter:

— Biz saǵan serýendi kórseteıik, — dep qoldaryna ne tússe, sonymen Qojany aıamaı basqa-kózge tópep sabap ketedi.

Aıaǵyn áreń basyp, súıretilip, myń bir azapty basynan keshirip Qoja tún ortasynda úıine keledi.

— Osy ýaqytqa deıin qaıda júrsiń qańǵyryp? — deıdi áıeli.

— Kórge qulap ketip, arýaqtardyń arasynda bolyp qaıttym.

— E, o dúnıe tynysh pa eken? Jamanat habar estilmeı me? — deıdi áıeli, bir jańalyq bilgisi kelip.

Sonda Qoja:

— Jamanat joq, tek ústine shyny artqan qashyrlardy úrkitýshi bolma, — dese kerek.

---