InfoHub Logo

Shilde aılarynyń shyjyǵan ystyq bir kúninde ıtter shabalanyp qoıa beredi. Kedeı úıiniń kıizinde jyrtyq tesigi az bolsyn ba? Bolat tesiginen syǵalap qarasa, bir top salt attylar úı syrtyna jaqyndap qalǵan eken. Qasynda aýyldyń bı, shoralary bar starshınasy ekeninin tanyp, jalma-jan aldarynan shyǵyp, aman-saýlyq surasqannan keıin:

— Qosh keldińizder, úıge túsińiz, — deıdi Bolat.

Bulardyń ishinde beıtanys, jasy elýler shamasynda bireýi bolady. Kıiný álpetine qaraǵanda, sultan tuqymynan ekeni baıqalyp tur. Ol aq jibek oramalmen jelpip turyp, qabaǵyn tyrjıta Bolatqa qarap:

— Sizdiń úıdiń aýasy jaqsy ma, salqyn ba, — dep moshqal suraı bastapty. Qasynda turǵandar da buǵan «Bolat ne dep jaýap berer eken» degendeı Bolatqa qarasady.

Bolat:

— Jer men kókke kóz tastap turyp, myna biz turǵan jer men sonaý kók aspannyń eki ortasy meniń jyrtyq úıimniń keńdiginen aýmaqty bolý kerek. Sonshama keńshiliktiń aýasyn sizge tapshylyq etip turǵanda, meniń úıimnen ne rahat tappaqsyz, — dep myrs etip kúlip jiberipti.

Beıtanys ákim óziniń keýdiregen shaldan sóz tappaı jeńilgendigine qatty sasyp, ári yza bolyp:

— Biz seniń úıińnen qonaqasy jep qarq bolamyz dep te kelgenimiz joq edi-aý. Jol surap keldik, — deı salypty jaltara sóılep.

Bolat betterine tańdana qarap:

— Sizder sıaqty ulyqtar suraǵanda amal qansha? Myna tókken kúldiń ar jaǵynda eki sary qasqa jol bar, tańdaýyn alyńdar, — depti.

Beıtanys ákim tóre rýynan, ýpravıtel eken.

---