InfoHub Logo

Bolat aqyndyǵymen qatar tilge júırik, sózge sheshen, ázilqoı, qýaqy bolǵan adam. Bir baıdyń myrzasy 3-4 joldas ertip, qýlyq salystyrmaq bolyp Bolattyń úıine kelip túsedi. Bolat kedeıligine qaramastan qonaqjaı adam eken. Myrzany joldastarymen qarsy alyp, qonaqasy ázirleıdi.

Bolatty sóıletkisi kelgen myrza sóz bastaıdy:

— Bóke, — deıdi ol, — osy bir dýadaq degen qus óte semiz bolady ǵoı. Ne jep semiredi desem, tas jeıdi eken ǵoı. Bir jyly bir dýadaq atyp ákelip soıyp qarasam, ishinen judyryqtaı-judyryqtaı kók tas shyqty, — depti.

— Ol ras, — depti Bolat, — meniń de myltyq ustaıtyn ónerim bar edi. Taýdan bir dýadaq atyp ákep ájeme soı dep berip, ózim úıge kirip kettim. Azdan keıin ájem:

— Bolat, aý, Bolatjan, — dep daýystaǵansyn shyqsam, dýadaqtyń bótekesiniń ishinen qulaǵy joq qyzyl shyny aıaqtyń ústińgi qulaǵy shyqqan eken. Sol bir aı buryn bizdikinen joǵalyp edi, — depti.

Myrza Bolattyń sheshile sóılegenine qyzyǵa túsip:

— Bóke, osy qazaqtyń bir maqaly bar, «semizdikti qoı kóteredi» deıdi ǵoı. Menimshe, semizdikti qoı emes, jylqy kóp kóteretin sıaqty. Bir jylqy soǵymǵa soıdym. Siz kórgen joqsyz, saǵan ótirik, maǵan shyn. Sol bıeniki mynadaı shyqty, — dep qarysyn keripti.

— Ol ras, — depti, — Bolat, — qazaq bir-eki qonaqqa da soıyp alýǵa yńǵaıly bolǵansyn «semizdikti qoı kóteredi» dep maqtaı salǵan. Semizdikti qoı emes, jylqy kóteretini ras. Bir jyly mynaý haholdarda bir saryala aıǵyr satyp ákelip qoıyp edi, sen kórgen joqsyń, saǵan ótirik, maǵan shyn ǵoı. Álgi aıǵyrdyki mynadaı shyqty, — dep qaryn jazyp kórsetip, judyryǵymen myrzanyń murnyna salyp qalypty.

Myrza tura kıinipti.

— Asyqpańdar, as jep ketińder, — depti Bolat.

— Rahmet, asyǵys edik. Sizge sálem bere kelip edim, — dep myrza joldastarymen júrip ketipti. Joldastary myrzaǵa:

— Qýlyq salystyramyn dep kelip ediń ǵoı, asyna qaramaı ketkeniń ne? — dep surasypty.

— Sender túsinbegen ekensińder ǵoı. Bolattyń qýlyǵy, meniń qýlyǵymnan qulash jarym artyq shyǵyp, bir sheti murnyma tıip, murnymdy buzyp ketti, — depti myrza.

---