InfoHub Logo

Uıqy bezi adam organızminde, ásirese as qorytýda, mańyzdy ról atqarady. Sonda uıqy beziniń qabynýy nendeı dert?

Uıqy bezin anatomıalyq qurylymyna qarap basy, orta denesi jáne quıryǵy dep úshke bólemiz. Bez jasýshalary óndiretin ferment tútik jolymen ultabarǵa quıylady. Sóıtip, as qorytý úderisine belsene qatysady. Bez isingende nemese jaralanyp, ishine qan quıylǵanda onyń keıbir jerleri jıdip óle bastaǵanda (nekroz) uıqy bezi qabynyp, qatty aýyrady. Aýrý bezdi tutastaı nemese onyń keıbir jerlerin ǵana (basyn, denesin, quıryǵyn) qamtýy múmkin.

Jiti pankreatıtti kóbinese mıkrobtar qozdyrady, biraq aýrý keıde onsyz da bastalady. Qabyný kúshi jáne aýrýdyń barysy sol qozdyrǵysh tetigine baılanysty.Uıqy beziniń qabynýy árqashan shydatpaı, qatty aýyryp bastalady. Aýyrý ishtiń joǵarǵy (uıqy beziniń tusy) bóliginde bolady. Qatty aýyrǵandyǵy sonsha, keıde adam dóńbekship, esinen de tanady. Óńi qashyp, qol-aıaqtary kógere bastaıdy. Arterıalyq qan qysymy tómendeıdi. Tamyr soǵýy nasharlaıdy. Aýyrǵany basylmaı, adamnyń jotasyna taralady. Arqasyn belbeýdeı oraıdy. Uıqy bezi qabynǵan adamnyń ustamasy kelgende qusa bastaıdy. Ras, dene ystyǵy qalyptan aspaýy múmkin, biraq adamnyń jalpy hali nasharlaıdy. Keıde jata da almaı, tek qısaıyp qana otyrady. Uıqy beziniń qabynýyna ót jolynyń qabynýy qosylsa, adamnyń denesi sarǵaıýy múmkin. Birqatar aýrýlardyń tynys alýy buzylady, keıbireýlerdiń ishekteri qyzmetin durys atqara almaıdy, úlken dáreti júrmeı qalady. Sondyqtan, osyndaı halge ushyraǵan adamdy keshiktirmeı aýrýhanaǵa jetkizgen nemese jedel járdemdi shaqyrǵan jón. Aýrý ustamasy uıqy bezi isingennen paıda bolsa, onda ony dári-dármekpen emdeýge bolady. Aýyrǵan jerge muz basyp, eki búıirden egý (blokada) jasaǵan paıdaly. Mundaıda emdám saqtap, adamǵa ashyǵý da kerek, qan tamyryna novokaın, atropın engizgen tıimdi. Al bez jıdip, ólettense, ıaǵnı irińdese, onda syrqat otaǵa zárý degen sóz.

D.S. Baıyrhanova, terapevt-dáriger

---