InfoHub Logo

CES-te elektronıkanyń alýan túrlibaǵyttary kórsetilgen. Alaıda dál bıylǵy jyly uıymdastyrýshylar alǵash ret uıqy tehnologıasynyń sanatyn erekshe bólip aldy. Eger buryndary uıqyny qadaǵalap, sapasyna taldaý jasaı alatyn quraldardyń negizgi bóligin fıtnes-brasletter men aqyldy saǵattar quraǵan edi. Al qazirgi ýaqytta adamdardyń tátti uıqyǵa batýǵa kómektesetin kompanıalar paıda bola bastady. Olardyń jarqyn ókili — CES 2017-de Sleep Number 360 aqyldy tósegin usynǵan Select Comfort kompanıasy.

Select Comfort 30 jyldan beri tósekter men matrastar shyǵaryp kele jatqanyn atap ótken jón. Jáne ishine salynatyn aqyldy salmalardy óz ónimderine qosýdy olar keshe ǵana bastaǵan joq. Barlyǵy da 2012 jyly bıometrlik tetikter men uıqy monıtorıńi tehnologıasyn ázirleý salasyndaǵy Kremnıılik ańǵarǵa alǵash jol salýshy – BAM Labs-pen yqtymaqtastyqtan bastaldy. 2015 jyly Select Comfort kompanıasy BAM Labs-ty tolyqtaı satyp alyp, onyń ataýyn SleepIQ Labs dep ózgertti. Sleep Number saýda markasymen shyǵaryla bastaǵan tósekterde júzege asyrylǵan uıqy monıtorıńiniń tehnologıasy men taldaýy da osyndaı ataýǵa ıe boldy. Sleep Number 360 jańa tósegi kompanıanyń barlyq zamanaýı zertteýlerin paıdalana otyryp qurastyrylǵan jáne aqyldy dep atalýy da zańdylyq. 

Jekelegen rettelim

Birinshiden, Sleep Number 360 avtomatty túrde óziniń ıesine qaraı ıkemdeledi. Tipten, ıesi eki adam bolsa da, mysaly erli-zaıyptylar, tósek olardyń árqaısysyna laıyqty túrde jeke-jeke ıkemdelýi múmkin. Bul eń aldymen, tósektiń qalpynyń ózgerýine jáne uıyqtap jatqan kezdegi adamnyń jatysynyń ózgerýine baılanysty onyń jumsaqtyǵyna/qattylyǵyna qatysty bolady. Oǵan matras pen ózdiginen retteletin mehanızmniń arasynda ornalasqan arnaıy aýaly qabattamanyń arqasynda qol jetkiziledi.

Qoryldaýdyń aldyn alý

Ekinshiden, ózdiginen retteletin mehanızmder uıyqtar aldynda kitap oqý nemese teledıdar kórý úshin tósektiń qalpyn jaıly etip qoıyp beredi. Budan ózge, eger de SenseIQ tetigi uıyqtap jatqan adamnyń qoryldaı bastaǵanyn anyqtasa, ózdiginen retteletin mehanızmder adam denesiniń joǵarǵy bóligin avtomatty túrde 7 gradýsqa kóterińki etip qoıady. Alaıda, bul tek qoryldaýy jeńil túrde ótetin jáne sozylmaly bolyp tabylmaıtyn deni saý, eresek adamdarǵa ǵana qatysty.

Aıaqtardy jylytý

Úshinshiden, ádette adamnyń aıaqtary ornalasatyn tósektiń tómengi bóligi, jylytý júıesimen jabdyqtalǵan. Aıaqtarǵa jylý, eń birinshi tezirek uıyqtap ketý úshin qajet. Jáne de uıyqtap jatqan kezde aıaqtardyń aınalasyndaǵy jylý uıqynyń úzilissiz bolýyn qamtamasyz etedi.

Smartfonmen úılesimdilik

Joǵaryda atalǵandardan ózge, tósek úshin arnaıy mobıldik qosymsha ázirlengen. Iá, Sleep Number 360 tósegi Bluetooth arqyly smartfonǵa qosylady. Qosymshada tósekti retteýge jáne uıqy, júrek soǵysynyń yrǵaǵy, tynys alý jıiligi men kezeńi týraly derekterdi qaraýǵa bolady. Tósek aqyldy oıatqysh qońyraý retinde de qoldanylady, oıatqysh qońyraý uıqydan barynsha jaıly oıaný úshin adam uıqynyń jeńil kezeńinde bolǵan sátinde iske qosylady. Qosymshadaǵy derekterdi saraptaı otyryp, uıqynyń sapasyn jaqsartý úshin usynystar beredi jáne SenseIQ dep atalatyn sapasynyń baǵasyn ıelenedi.

Aqyldy fýnksıalardy paıdalaný senarıleri

- Barynsha kórneki bolý úshin, kereýet saǵat 23:00-de uıqyǵa jatyp, 07:30-da uıqydan turýǵa baptalǵan jaǵdaıda, ony paıdalaný senarıleriniń mysalyn keltireıik:

- Saǵat 22:30-da smartfonǵa uıqyǵa jatýǵa daıyndalý qajettigi jóninde habarlama keledi.

- Saǵat 22:45-te avtomatty túrde aıaqtardyń aınalasynda tósektiń jylýy qosylady.

- 23:00-de tósek avtomatty túrde uıyqtar aldynda kitap oqý úshin aldyn-ala baptalǵan qalypqa keledi.

- 23:00-den bastap 07:30-ǵa deıin tósek uıyqtap jatqan adamnyń jatysynyń ózgerýine qaraı avtomatty túrde ıkemdeletin bolady.

- Eger de 01:00-de qoryldaý bastalǵandyǵynyń belgisi anyqtalatyn bolsa, onda tósektiń joǵarǵy bóligi qoryldy joıý úshin azdap kóteriledi.

- Eger de 04:30-da balany baqylap qoıý úshin nemese dárethanaǵa barý úshin turý qajet bolsa, onda tósek avtomatty túrde tómengi kómekshi jaryqtaryn qosady. Tósekke qaıtyp oralǵannan keıin, jaryq avtomatty túrde sónedi.

- Oıatqysh qońyraý 07:30-ǵa baptalǵanyn túsingen tósek, uıyqtap jatqan adam uıqynyń jeńil kezeńinde bolǵan kezde oıatqysh qońyraýdy iske qosady, mysaly 07:15-te.

Basqa qosymshalarmen biriktirý

Budan ózge SenseIQ tehnologıasynda ashyq API bar jáne ony basqa qosymshalarmen birlese jumys isteýi úshin qoldanýǵa bolady. Mysaly, fıtnes-trekerlerge arnalǵan Fitbit qosymshasy qazirdiń ózinde SenseIQ-men baılanysta. Sondyqtan, Fitbit bilezigimen birge jattyǵý jasaǵan kúni tósek denege aýyrlyq túskenin sezetin jáne uıyqtaǵan kezde tósektiń jumsaqtyǵyn avtomatty túrde (nemese ıesiniń qalaýymen) arttyratyn bolady.

Baǵasy jáne shyǵarylǵan kúni

Kelisesiz be, munyń barlyǵy fýtýrısik kınoda bolyp jatqandaı bolyp kórinedi? Biraq, bul shyndyq. Jáne de bul shyndyqtyń satylymy shamamen osy jyldyń ortasynda bastalady. Árıne, mundaı ǵanıbet arzan turmaıdy. Sleep Number-diń naqty baǵasy qandaı bolatyndyǵy belgisiz, alaıda ol Select Comfort kompanıanyń basqa da tósekteriniń aǵymdaǵy baǵasynyń sheńberinde bolatyndyǵy aıtylady. Al bul, onyń baǵasy 5-6 myń dollarǵa jetýi múmkin degen sóz.

---