InfoHub Logo

Garvard ýnıversıtetiniń mamandary uıqynyń adamnyń salmaǵyn joǵaltýǵa tıgizetin áserin anyqtady.

Mamandar zertteýlerin 10 jyl boıy 130-dan astam áıelge júrgizgen. Zertteý qorytyndysy boıynsha, semizdikke shaldyǵý qaýpi uıqy rejımi buzylǵan áıelderge qaraǵanda uıqysy durys adamdarda 45 paıyzǵa tómen bolatyny anyqtaldy.

Tájirıbe júrgizgen mamandardyń aıtýynsha, salmaq jınaý aldymen túngi ýaqytta ash bolýmen baılanysty. Olar uıqy rejımi buzylǵan kezde adamnyń aǵzasynda tábetti ashatyn grelın gormony kóp bólinetinin aıtady. Osylaısha túnde tamaqtanǵan adamnyń aǵzasyna qosymsha kalorıı jınalady.

Salmaq qosýdaǵy ekinshi sebepke sarapshylar adamnyń únemi sharshap júretinin jatqyzady. Buǵan deıin mamandar habarlaǵandaı, tórt kún boıy az uıyqtaǵan adamnyń aǵzasy maıdyń jınalý qaýpin arttyra túsedi. Sonymen birge 7-8 saǵattan kem uıyqtaǵan jandar bes saǵat uıyqtaǵandarǵa qaraǵanda tez aryqtaıdy eken.

Jaqsy uıqy adamnyń salmaǵyna áser etetinin anyqtaǵan soń ǵalymdar birneshe keńes bere ketti. Aldymen olar adamdarǵa táýligine 6,5-8 saǵat uıyqtaǵan jón ekendigin aıtady. Ekinshiden, rejım saqtalǵany durys, ıaǵnı belgili bir ýaqytta turyp, belgili bir ýaqytta qaıta uıqyǵa jatqan jón.

Sonymen birge mamandar jatyn bólmeniń temperatýrasyna da kóńil bólgen durys deıdi. Uıyqtar aldynda bólmeniń perdesi jabyq bolǵany jón. Sebebi qarańǵylyq adamnyń jaqsy uıyqtaýyna oń áser etedi. Sondaı-aq sońǵy kezderi jıi sóz bolyp júrgen uıaly telefondar men túrli gadjetterdi óshirip qoıǵan jón. Uıqy durys bolý úshin jatardan 30 mınýt buryn elektrondy qurylǵylardy sóndirip qoıý kerek.

Artyq jumys bolmasa meılinshe erte jatyp, tańerteń kúnnen buryn oıanǵan jón.

---