InfoHub Logo

«Aqtóbeden elge (ońtústikke) aýysyp kelgen kezim. On sovhozdy quramyna alǵan aýyl sharýashylyǵy basqarmasynyń qurylys bólimin basqardym.

Sharýanyń kóptiginen sharshap, oblysqa esep berip úıge kelgennen keıin anama aıttym: «Apa, meni tańerteń oıatpaı-aq qoıyńyzdarshy. Túske deıin uıyqtaıyn». Sonda anam: «Qudaı qalasa» dedi. Endi men ol kezde Qudaı joq degen zamanda ósken balamyn, anama qarap: «Qudaıyńyzǵa sálem aıtyńyz. Qalasa da, qalamasa da uıyqtaımyn» dedim. Sonda anam janushyra: «Ýa, Jaratqan! Jiberetiniń bolsa maǵan jiber. Balany týsań da minezin týmaısyń. Aıtyp turǵan sózin qara» dedi.

Sonymen uıyqtap qaldym. Sol kezde áıelim qazir dáriger bop isteıtin qyzyma ekiqabat kezi. Aıy-kúni jaqyndap turǵan. Túngi úshte oıatady. Men: «Ne boldy túnniń jarymynda?» deımin. Áıelim: «Anaý balalar jótelip jatyr, kórshi» deıdi. Úıimiz fın úlgisinde salynǵan aǵash úı bolatyn. Qabyrǵasynyń barlyǵy aǵashtan jasalǵan. Sodan dereý zalǵa baryp, esikti ashsam, úı órtenip jatyr. Kórshilerdi shaqyrdyq. Sodan ne kerek tańǵy saǵat 6:30-ǵa deıin dúnıeni shyǵaryp bittik qoı. Sonymen eki saǵattyń ishinde úı ortasyna tústi.

Tańǵy asymyzdy keshke bir-aq ishtik. As iship otyrǵanda anam: «Qalaı balam? Qudaı qalasa da, qalamasa uıyqtaısyń ba?» dedi. Men onda da sengen joqpyn. Kezdeısoqtyq dedim de, anamnyń kóńiline qarap, úndemedim. Úıdi ornyna keltirýge bolatyn-bolmaıtyndyǵyn kórýge baraıyn desem, anam da erip shyqty. Sodan men: «Apa, ne qylasyz, aq qar kók muzda» dedim. Ol kisi: «Joq, men de baramyn» dedi. Aqpan aıynyń 25-i kúni bolatyn. Sonymen bardyq. Kórshi úıden kúrek ákeldik: «Myna arany qaz» dedi anam. Bizdiń bólmemizdiń tusyn qazdym.

Bizdiń úıimizde eski kitap bolatyn. 300-400 jyldaı bolyp qalǵan. Quran kitap. Ákem marqum muqabasyna Lenınniń kitabynyń muqabasyn qaptap qoıǵan eken. Muqaba Lenındiki, ar jaǵy Quran. Solaı jasyryp saqtaǵan. Sony keıin anam marqum aq matadan qalta jasap, bas jaǵymyzǵa ilip qoıǵan bolatyn. Sol qalyp ketipti. Qazǵan edik, kúldiń arasynan shyqty. Eshteme bolmaǵan, ot tımegen. Sóıtip, Qurandy qolyna alyp, tazalap turdy da: «Essizqaǵyr (ashýlanǵanda aıtatyn sózi)! Sen de mı bar ma, joq pa ózi? Seniń Qudaıdaı senip júrgen Lenıniń qaıda? (Lenınniń muqabasy órtenip ketken ǵoı). Meniń aq qaltam qaıda? Eger de qasıetti bolmasa qalaısha Quran aman qalady? — dep ashýlanyp turyp, basymnan kitappen qoıyp qaldy.

Sol kezde tóbeden tómen qaraı elektr togy júrip ótkendeı kúı keshtim. Kálımaǵa tilimdi qalaı keltirgenimdi bilmeı qaldym. Jasym ol kezde 26-da tuǵyn. Zamannyń tárbıesi bolsa da, sodan keıin Qudaı joq dep aıtpaıtyn boldym. Aıtyp otyrǵanym ertegi sıaqty kórinedi, biraq bul shyndyq».

Shalataı Myrzahmetov

---