InfoHub Logo

Adam berý bireýge ońaı emes qashanda, ómir zańy osy ǵoı — salt-dástúrden qasham ba?! Ózimiz de qyz boldyq, erip kettik sezimge — aınalaıyn qurdasym, ketti qyz dep ezilme! Barǵan jerde ashylsyn baǵy qyzdyń dep tile, bizdiń qyzdy áketken kúıeý bala da epti me? Uzaǵynan súıindirsin ylaıym, jaqsy bolsa kúıeý bala — nege búgin jylaıyn?!

**** **** ****
                                 
Qyzymyzdyń qonǵan jeri qutty bolsyn! Densaýlyǵy myqty bolsyn! Júregi onyń túkti bolsyn, saýǵan maly sútti bolsyn! Ózge elde qadiri arta bersin! Enesi men anasyn birdeı kórsin, kópbalaly ana bolyp gúldeı bersin!

**** **** ****
                                
Qadirli qonaqtar. Búgingi qýanysh ıeleri! Aǵalar, analar! İni-qaryndastar! Osy aq dastarhan basynda adal nıetpen jınalyp otyrǵan quda-jekjattar!

Toıǵa kelip otyrǵan jańa qudalarǵa «tórge shyqqandaryńyz qutty bolsyn!» demekpiz. Qudalyqtaryń myń jylǵa ulassyn!

**** **** ****
 
Bala — artta qalǵan iz,
Baqyt — uzatylǵan qyz,
Baılyq — qolǵa ustaǵan muz,
Dúnıeniń qyzyǵy siz ben biz!
— degendeı, «siz-bizdigimiz» esh ýaqytta joǵalmasyn. Eki jastyń baqytyn bersin, kóre almaǵan dushpankóz aramyzdan kete bersin!
Bekzattarym-aı,
Jekjattarym-aı,
Jekjat bolyp aýylyma kep jatqanyń-aı!
«Bala baqytyn qyzdan izdeıdi,
Qyz baqytyn túzden izdeıdi», degen eken dana babalarymyz. Bizdiń qyzymyz baqytyn sizdiń shańyraqtan izdep keldi. Úlpildegen úkimiz bizden ótti — sizderge jetti. «Jibekti túte almaǵan jún etedi», - deıdi. Jún etseńiz de, gúl etseńiz de endigi jaýapkershilik júgi - ózderińizde, qadirli qudalar!

**** **** ****
                                     
«Jolaýshy muraty — jetý, qyz muraty — ketý» ekenin uǵynǵanymyzben, baýyr etinen julyp alyp qyzdy ózge jurtqa attandyrý kimge bolsa da ońaı emesin bárimiz bilemiz. Alaıda, barǵan jerinde tastaı batyp, sýdaı sińip jatsa — abyroılaryńyzdyń asqaqtaǵany sol emes pe! Qudaı qýat bersin, quda-jekjattarymyzǵa sana bersin, jaqsy jer bolsa — qyzymyz alańdamaı bara bersin! Eki jas baqytty bolsyn, ómiri jaqutty bolsyn!

**** **** ****
                                      
Eı, ýaqyt-aı!
Ekensiń ǵoı tym qysqa,
Barady uqsap keshegi ótken jyl qusqa.
Balalyqtyń bir bazary tarqaı ma,
Dosym qyzy shyǵyp jatyr turmysqa.
 
Eki balań otaý qurdy, toptasty,
Eki tasqyn bir aıdynǵa toqtasty,
Qyz uzatý toıy deımiz,
Jigit she?
Jigit búgin bostandyqpen qoshtasty.
 
Saltanatty toı ústinde otyrmyz,
Aıdyn-kólde aqqý qazdaı otyr qyz.
Qos perishte kórinedi kózime,
Bizder — pende, qarapaıym topyrmyz.
Biledi ǵoı qımastyqtyń ólshemin —
Áke bolyp,
Ana bolyp kórse kim?
Óz qolymen ózi úzip bergendeı,
Júreginiń eń qajetti bólshegin.
 
Kirbiń bassa ne amal bar júzińdi,
Basa almaısyń
Basyńdaǵy yzyńdy,
Tap osyndaı toı-dańzaǵa sońynda
Áketer me seniń de erteń qyzyńdy?!
 
Qýan, dostym, óleń sózge bolma alań,
Qyzym túgil, ulymdy oılap qozǵalam.
Qyz uzaı ma, álde jigit...
Kim bilsin?!
Ne deseń de kúıeý balań - óz balań.
 
Toıdaǵylar,
Qane sap, sap, tynyshtal,
Biz daıynbyz,
Eı, asaba, durystal.
Jas jubaılar mahabbatyn bekitip
Shampan shapshyp,
Qońyraý soqsyn hrýstal.
Soqsyn,soqsyn,
Shampan tolǵan hrýstal.

**** **** ****
                     
Qımaıdy uzatqan jaq qyz balasyn,
Jan dúnıeń qalaı ǵana syzdamasyn.
Qudalar alaqanǵa salyp berdik
Júrektiń julyn alyp bir parasyn.

**** **** ****
                    
Jas balanyń kúlkisin bersin,
Jas ananyń uıqysyn bersin.
Jomarttyń qolyn bersin,
Jortqyshtyń jolyn bersin!
 
Qyzdyń qylyǵyn bersin,
Sýdyń tunyǵyn bersin.
Asaýdyń arynyn bersin,
Túngi otyń jaryǵyn bersin!
 
Asqar taýdyń pańdyǵyn bersin,
Bulbul qustyń tańǵy únin bersin.
Dalanyń jazyqtyǵyn bersin,
Gúldiń náziktigin bersin.
 
Teńizdiń tereńdigin bersin,
Qyrannyń kóregendigin bersin!
Erdiń kóńilin bersin,
Búrkittiń ólimin bersin!
 
Lashynnyń júregin bersin,
Naǵyz dostyń tilegin bersin!
Máńgi-baqı ajyramas,
Shyn ǵashyqtyń bilegin bersin!

**** **** ****
                         
Balalardyń uzaq bolsyn ómir-jasy,
Birge óssin bite qaınap mal men basy!
Qashanda til men kózden aman saqtap,
Qasynda júrsin onyń pir-panasy!
 
Úırenip óner-bilim órge júzsin,
Úlgi alsyn qatar-qurby zamandasy!
Qondyryp oń jaǵyna otaýlaryn,
Qyzyǵyn kórsin onyń ata-anasy!
 
Aldynan shamshyraǵy qarsy janyp,
Gúldensin jermen kóktiń eki arasy!
Shalynsyn perishteniń qulaǵyna
Bizderdeı qarıalardyń aq batasy!
 
Qýanyshqa kóńilder tolsyn áman,
Baıaǵyda joralǵy-jol suraman.
Meniń jalǵyz tilerim jol ústinde —
Ul-qyzymyz baqytty, bolsyn aman!

**** **** ****
                                 
Kókiregi syrǵa toly kúı-dastan,
Alataýdaı armany bar júzdegen.
Ózi ósken uıasynan sımastan,
Túzden baqyt izdeıdi eken qyz degen.
Taǵdyry onyń sýyq qarap, syzdana,
Sheshimi aýyr syn artqanmen sanaǵa.
Kóktemdegi qarlyǵash qoı qyz bala,
Aınalatyn shýaq shashqan Anaǵa!

**** **** ****

............. aq bosaǵasynan uzatylyp, .............. esimdi óziniń ómirlik serigin tapty. Jas jubaılarǵa qashanda jandaryńa jaqsylyq serik bolsyn, ómir ótkelinen qol ustasyp birge ótińder dep tilek bildiremiz.

**** **** ****
                       
Perı-janym, baldyzym, qyzǵaldaǵym!
Armanyńnyń aralap gúlzar baǵyn,
Baramysyń alystap aramyzdan,
Júregińniń oryndap izgi armanyn.
 
Artqa tastap jastyqtyń dóńin asyp,
Armanyńa jetýge bolyp asyq.
Aramyzdan áp-sátte kete bardyń,
Aınalaıyn bara ǵoı - jolyń ashyq...
 
Tilegińdi... bara ǵoı, qup alamyz,
Aq jol tilep ózińe tur bajamyz.
Jıyrma eki jyl seni erkelettik,
Qarymtasyn eshkimnen suramańyz...
 
Adamzatqa usynǵan kúni-buryn,
Kim quptamas Allanyń qurylymyn?!
Bizdiń emes... Hadıshanyń qyzy boldyń —
Shyn júrekten uǵyppyz muny búgin.
 
Tolǵanystan esim joq meniń tegi,
Bar, bara ǵoı — kútýde eliń seni.
Orazbaıdyń qyzy dep aıtpaıdy endi,
Dep aıtar jurt: Erqanat kelinshegi...
 
Qımaı turmyz, qaıteıik, munym anyq,
Saǵan degen kóńilimiz tunyq anyq.
Bar, bara ǵoı, tapsyrdyq Ystylarǵa,
Etimizden júrektiń julyp alyp,
Etimizden júrektiń julyp alyp...

**** **** ****

Oń aıaqpen attandyń,
Gúl bitsin qonǵan qıańa
Kelip júr súıgen jaryńmen
Óziń ushqan uıańa!

**** **** ****

Bekzattarym-aı,
Jekjattarym-aı,
Jekjat bolyp aýlyma kep jatqanyń-aı!
«Bala baqytyn qyzdan izdeıdi,
Qyz baqytyn túzden izdeıdi» jegen eken dana babalarymyz. Bizdiń qyzymyz baqytyn sizdiń shańyraqtan izdep keldi. Úlpildegen úkimiz bizden - ótti, sizderge – jetti. «Jibekti túte almaǵan jún etedi» deıdi. Jún etseńiz de, gúl etseńiz de endigi jaýapkershilik – Sizderde, qudalar!

**** **** ****

Qımaıdy uzatqan jaq qyz balasyn,
Júregi qalaı ǵana syzdamasyn.
Qudalar, alaqanǵa salyp berdik,
Julyp alyp júrektiń bir parasyn.
 
Kóńil de, kóz de toıar da, kúıeý bala,
Bolmassyń úsh jurtyńa súıeý ǵana.
Jaryńnyń baqyty bol, juldyzy bol,
Osyndaı qyz bul dúnıede bireý ǵana.
 
Shattana júrip shańyraǵyn kótergen,
Uıymdasa júrip ýyǵyn qadaǵan,
Kelise júrip, keregesin kergen
Jas otaýlaryń qutty bolsyn!

**** **** ****

Shańyraqtyń shyraǵysyń shattyǵy,
Tekti jerdiń tuıaǵysyń aq gúli.
Myń jyl quda bolýǵa da atty kún,
Eki jasqa qudaı bersin baq búgin.
Áke-shesheń arnap otyr jyr aǵyn,
Káýsar taza móldiregen bulaǵym,
Barǵan jerge sýdaı sińip, unaǵyn,
Baqytty bol, baqytty bol, shyraǵym.

**** **** ****

Qonaqtan ketpeı tórleriń,
İsińniń tappaı el kemin.
Tamsan maqtap kóp adam
Basa almaı júrsin shólderiń.

Qalaýly bol halyqqa,
Eńbekten esh jalyqpa.
Qosylǵan súıip jaryńmen
Aqqýdaı máńgi qalyqta.

**** **** ****

Elińe eleýli bol,
Halqyńa qalaýly bol.
Ata-eneńe jaǵymdy bol,
Qaıynaǵa, qaıyndarǵa qaıyrymdy bol.
Aýylyńa aıbarly bol,
Kúıeýińe jaıdarly bol.

---