InfoHub Logo

Buǵan deıin Prezıdent Qasym-Jomart Toqaev muǵalimderdi qyzmetine tán emes fýnksıalardan bosatý mindetin qoıǵan bolatyn. Memleket basshysy qol qoıǵan «Pedagog mártebesi týraly» zań osy baǵytta qajetti normalardy bekitip, aýqymdy jumystardy júrgizýge múmkindik berdi. Bul týraly Oqý-aǵartý mınıstri Ashat Aımaǵambetov áleýmettik jelidegi paraqshasyna jazdy.

«Osy jumystyń sheńberinde balabaqsha tárbıeshileri toltyrýǵa mindetti qujattardyń sanyn azaıtatyn buıryqqa qol qoıdym. 2020 jyly orta, tehnıkalyq jáne kásiptik bilim berý deńgeıine de osyndaı tizim bekitilgen bolatyn. Sol buıryq arqyly mektep pen kolej muǵalimderiniń esep tapsyrýyn qatań shektedik. Mysaly, mektep muǵalimi kún saıyn eki qujat qana toltyrýy kerek: mektep jýrnalyna (elektrondy) baǵa qoıý jáne sabaq jospary. Alaıda, mektepke deıingi bilim berý deńgeıinde mundaı tizim rettelmegendikten kóptegen qujat problemasy boldy. Olardyń tizimi balabaqsha basshylyǵynyń kózqarasy men mańyzdylyǵyn túsinýge qatysty boldy», - degen vedomstvo basshysy.

Onyń málimetinshe, e ndi qol qoıylǵan buıryqqa sáıkes tárbıeshi tek mynadaı qujattardy ǵana toltyrady:

1) oqý jylyna arnalǵan perspektıvalyq jospar (jylyna bir ret toltyrylady);

2) tárbıe-oqý prosesiniń sıklogrammasy (bir aptaǵa toltyrylady);

3) dıagnostıkanyń (bastapqy, aralyq, qorytyndy ólsheýlerdiń) nátıjeleri boıynsha oqý jylyna arnalǵan balanyń jeke damý kartasy, ol qajettiligine qaraı toltyrylyp, júrgiziledi.

Demek, endi mektepke deıingi bilim berý deńgeıi boıynsha mınıstrlik aıqyndaǵan naqty tizbe bar. Sondaı-aq «Pedagog mártebesi týraly» zańda jáne Ákimshilik kodekste jazylǵan basqa da qujattardy talap etýge jaýapkershilik qarastyrylǵan jáne aıyppul túrinde ákimshilik jaýapkershilikke tartatyn organdar da bar.

Ashat Qanatuly «J aýapkershilikke tartý kimniń quzyrynda?» - degen saýalǵa da jaýap bere ketken.

«Pedagogterden shekten tys esepti nemese qyzmettik mindetterine jatpaıtyn aqparatty talap etý faktileri boıynsha ótinish túsken kezde QR Oqý-aǵartý mınıstrligi bilim salasyndaǵy sapany qamtamasyz etý komıtetiniń aýmaqtyq departamentteri quqyq buzǵany úshin jospardan tys tekserýdi QSjAEK organdarynda tirkeıdi jáne ony bilim berý uıymyna baryp nemese barmaı-aq júrgizedi.

Quqyq buzý faktisin dáleldeıtin materıaldar:

- jazbasha tapsyrmalar nemese olardyń kóshirmeleri, buıryqtardyń kóshirmeleri, esep berý blankileriniń kóshirmeleri jáne pedagogten esep berýdi nemese QR bilim berý salasyndaǵy zańnamasynda kózdelmegen málimetterdi talap etýdi rastaıtyn basqa da materıaldar», - dep jazdy mınıstr.

Eger quqyq buzýshylyqqa alǵash ret jol bergen adam óz kinásin moıyndasa, komıtet jáne aýmaqtyq organ ákimshilik quqyq buzýshylyq týraly hattama toltyrmaı, kináli adamǵa eskertý týraly qaýly shyǵarady. Al adam qaıtadan quqyq buzsa, oǵan qatysty ákimshilik quqyq buzýshylyq týraly hattama toltyrylady. Ákimshilik aıyppul 20 AEK-ten 120 AEK-ke deıin.

«Mektep pen balabaqsha pedagogterine qolaıly jaǵdaı jasaýǵa baǵyttalǵan talaptar saqtalýǵa tıis. Áriptesterimnen der kezinde tıisti shara qabyldaý úshin osyndaı faktiler bolǵan jaǵdaıda ol týraly habarlaýyn suraımyn», - dedi A.Aımaǵambetov.

Ol buǵan deıin jaýapty tulǵalar zań buzǵany, artyq esepti jáne basqa da qujattardy talap etkeni úshin jaýapqa tartylǵanyn eske saldy. Sodan soń bilim berý uıymdarynyń basshylarynan taǵy da zańdy qatań saqtaýdy jáne artyq esepti talap etýge jol bermeýdi surady.

---