InfoHub Logo

Syrym batyrdyń kele jatqanyn estigen han aldynan úı tikkizip, qurmet kórsetip, aldap qolǵa túsirýdi oılaıdy. Eń bolmasa elge kúlki ǵyp, abyroıyn túsirip jibergisi keledi.

Syrym han ordasynyń tabaldyryǵyn attaı bergende, han:

— Batyr, aıaǵyńyzda nájis bar ǵoı! — deıdi.

— Taqsyr, ordańyz din ashylǵan jer eken desem, boq basylǵan jer me edi, — dep aıaǵyn kilemniń shetine súrtip órlep kelip otyrady.

Han amandasqannan keıin:

— Batyr, ártúrli qyzyq tamashamyz bar. Sizdi sonyń ishinde bolsyn dep shaqyrtyp edim. Balýanǵa túsetin jigitińiz, báıgege shabatyn júırigińiz, aıtysatyn sheshenińiz bar ma? — deıdi.

— Han, habarsyzbyz, qamdanyp kelgenimiz joq. Sóıtse de at astymyzda, jigit qasymyzda, sóz aýzymyzda, aqyldasyp kórermiz, — deıdi Syrym.

Han erteńine júırik attaryn, palýan jigitterin, sheshen bılerin jınaı bastaıdy.

Syrym joldasyna aqyldasqanda, Taýmurat bylaı deıdi:

— Kisi belin ustap kórgen pende emespin, biraq shóldegende jyńǵyldyń butaǵyn burap, sýyn syǵyp sýsyńdaı beretin edim. Atym da buryn, báıgege qosylǵan emes, biraq kúnine qyryq kıik soqqanda da shabysynan tanyp kórgen emes. Kúres deseń, kúresem, shap deseń, shabamyn. Jalǵyz-aq kúresetin kisiniń belbeýi myqty bolsyn, at aıdaıtyn jer alys bolsyn.

Taqyrbas degen palýanmen kúresip, qabyrǵasyn syndyrady. Taýmurattyń Jıreni úsh kúnshilik jerden kún jarym buryn keledi. At báıgesi men palýan kúresinen jeńilgen han eń bolmasa sózden súrindireıin dep Syrymǵa úsh suraý beredi:

— Jigit-migit degen ne sóz? At-mat degen ne sóz?
As-mas degen ne sóz?
— Jyqqan — jigit, jyǵylǵan — migit,
Ozǵan — at, qalǵan — mat.
Jal-jaıa — as, shóp-shóleń — mas, — deıdi Syrym.

Syrym palýan kúresten de, at jarystan da, aqyry aıtystan da jeńip, bas báıge alyp eline abroımen qaıtady. Jat jerde jalǵyz júrmeı, aldymen ıesi aýyz tımegen asty ishpeı aman-esen kele jatqanda, hannyń jansyzy bir mystan kempir: «Qosh, balam!» — dep, qý shybyqtyń úshimen batyrdyń úzeńgisin túrtedi. Aýyldan shyǵa bere batyr atqa otyra almaı: «Ýlandym, Taýmurat, elge habarla!» — deıdi.

Bóken bı: «Aıaǵynan ýlanǵan eken, mańdaıynan jaq!» — dep, shapqynshyǵa nar kúmis degen dári beredi. Biraq dári alyp Taýmurat jetkenshe, Syrym batyr qaıtys bolady.

---