InfoHub Logo

(Sahnada ájesi keste tigip otyrady. Daladan júgirip kelgen nemeresi, moınynan qushaqtap, erkeleıdi)

Nemeresi:

— Áje, aq ájem, ájetaıym!

Ájesi:

— Kelgen kim eken? Osy úıde tátti qoshaqan bar edi, sol qyz ba eken ájesine erkelep jatqan?

Nemeresi:

— Áje, ne istep otyrsyz?

Ájesi:

— Qoshaqannyń jasaýyn jasap otyrmyn.

Nemeresi:

— «Jasaý» degen ne, áje?

Ájesi:

— «Jasaý» degen — uzatylǵan qyzdyń sońynan aparatyn qoldan jasalǵan kórpe-jastyq, jıhaz-sandyq, ydys-aıaǵy botam.

Nemeresi:

— Sonda meni uzataıyn dep jatyrsyzdar ma? Men áli kishkentaımyn ǵoı?

Ájesi (kúlip):

— Joq, balapanym! Sen ósem degenshe qaıda... ?! Tek ol kúnge deıin ájeń bar bola ma, joq bola ma, kim biledi? (kúrsinip) Kózim kórip turǵanda bir tuskıizińdi kestelep qoıaıyn degenim ǵoı, shyraǵym!
Nemeresi:

— Áje, men óskende sizge ushaqpen álemdi aralatam. Armandap júrgen Mekkeńizge aı saıyn aparam! Kemege otyrǵyzyp, Katamaranmen qydyrtam.

Ájesi:

— Áýmın, qulynym! Armanyńa jet! Seniń qyzyǵyńdy kórsem arman bar ma? (Jaýlyǵynyń ushymen kózin súrtedi)

Nemeresi:

— Áje, men de tigip kóreıinshi..?

Ájesi:

— Ynta-nıetińnen aınaldym! Qane, tikseń tigip kóre ǵoı? Alǵashqy tigisti qysqa alasyń keıingilerin sál joǵary alyp, dál ortasyn bıik qylasyń. Keıin qaıta azaıtasyń. Sonda osyndaı tolqyn shyǵady.

Nemeresi:

— Áje, myna gúlderdi qalaı jasadyńyz?

Ájesi:

— Ineniń basyna qyzyl jipti shıyrshyqtaı orap, dál ortasynan tikseń, osylaı gúl bolyp shyǵady.

Nemeresi:

— Áje, sizge nege ınstagramnan paraqsha ashyp, «sheberlik saǵatyn» ótkizbeske? Ózim júrgizem!

Ájesi:

— Ol ne taǵy qaraǵym?

Nemeresi:

— Áje, siz maǵan kestelep tuskıiz tigýdiń neshe túrin kórsetesiz. Al men ony beınetaspaǵa túsirip, ınstagramǵa júkteımin. Ony eldiń bári kóredi. Ásirese men sekildi oqýshylar. Solaı elge tanymal «sheber áje» atanasyz.

Ájesi:

— Eee, qulynym! «Úırenem» degen jastar bolsa, qýana-qýana kórsetem ǵoı.

Nemeresi (qolyna telefonyn alyp):

— Sálem ınstadostar! Budan bylaı men sizderge «álemdegi eń meıirimdi» ájeniń «tuskıiz tigý» atty sheberlik saǵatyn usynamyn! Meniń paraqshamnan alystamańyzdar!

Ájesi:

— Aqbotam-aý, meni áleıim el kórse, daıyndalyp, ádemi kóılegimdi kıip keleıin. «Kirispe sabaq» daıyndaıyn. Qazir asyqpaıyq?!

Nemeresi:

— Áje, siz onsyz da ádemi,  sulý bolyp otyrsyz! Biraq «kirispe sabaq» degenińiz durys eken...

Ájesi:

— Onda men keste tigip otyrǵanda aıtatyn, qyzyqty ertegilerimdi de daıyndasam qaıtedi?

Nemeresi:

— Áje ertegilerge «ájemniń ertegileri» degen bólek paraqsha arnaıyn? Al tiginniń qysqa-nusqa bolǵany durys! Sosyn shejire men el tarıhyna qatysty áńgimelerińizdi de taspaǵa túsirip qoıaıyqshy?!

Ájesi:

— Qulynym-aý?!  «Boıaýshy-boıaýshy degenge, saqalyn boıapty» - degendeı, elden uıat bolmasyn?! Ol qajet bola qoıar ma eken?!

Nemeresi:

— Áje, synypta bir oqýshy maǵan:

— Ájeń ne úshin Qytaıǵa ketip qalǵan baıaǵyda? - dep surady. Sosyn men oǵan Annenkovtyń qazaq aýyldaryna jasaǵan zulymdyqtary týraly, siz aıtqan áńgimelerdi aıtyp berdim. Onyń jylaǵysy kelip ketti sol kezde...

Ájesi:

— Eger qajet bolyp jatsa,  aıtaıyn qulynym. Eee, bul qazaq ne kórmedi shyraǵym?! Qoı, keshki asty qamdaıyq botam? Anań sharshap kelgende, asy daıyn tursyn.

(Ájesi ornynan turyp, etegin qaǵyp, sahnadan ketedi. Nemeresi ınstagramǵa jazba jazady.)

Nemeresi:

— Dostar,  meniń ájem óte qyzyq áńgimeler biledi. Eger sol áńgimelerdi estigileriń kelse, lúpil basyńyzdar! Ókinbeısizder!  (Telefonyn óshirip):

— Áje, qandaı kókónis arshıyn? Áje..!  ( shyǵyp ketedi.)

(Sońynan sahnaǵa qaıta kelip, ekeýi sál bastaryn ızep, qoshemet kórsetip ketedi.)

---