InfoHub Logo

(Sahnada ákesi, anasy, qyzy úsheýi sháı iship otyrady) 

Ákesi:

— Qyzym, aldaǵy aptada aýylǵa baramyz.  Ata-ájeńe kórsetetin madaqtamalaryńdy alyp al!  Qýanyp qalsyn!

Qyzy:

— Áke, ol kisiler jaqsy oqıtynymdy biledi ǵoı?! Odan da atam men ájemniń jaqsy kóretin jyly-jumsaq, táttilerin ala baraıyq ta?!

Anasy:

— Aqylyńnan aınaldym! Atań men ájeń neni jaqsy kóredi eken? 

Qyzy:

— Atam almany jaqsy kóredi. Ájem qalampyr qosylǵan sapaly úndi shaıyn jaqsy kóredi. Ekeýi de táttini unatady. Ájem bazardan monshaqtary bar, qyzǵylt kúreń qamzol kórip, qatty qyzyqqan. Alýǵa aqshasy jetpegen. Atama dúrbi qajet.

Ákesi:

— Mine, naǵyz nemere! Atasy men ájesiniń altyny. Búgin anań ekeýiń bazarǵa baryp, osy zattardy túgel alyńdar! Aqshany telefondaryńa jiberem. Al, men jumysqa kettim. (ishinen bata jasap,ornynan turady)

Anasy:

— Jaratqan jar bolsyn! İsiń ońynan sheshilsin!

Qyzy:

— Áke, jolyńyz bolsyn!

Ákesi:

— Ámın! (shyǵyp ketedi.) 

Anasy:

— Qyzym, ájeńe taǵy ne nárseler kerek? Oılanshy...

Qyzy:

— Anashym, ájeme shomyldyratyn, shashyn tarap, órip beretin adam kerek. Aýylda barlyǵy tań ketip, kesh keledi. Qalaǵa ákelip alaıyqshy..?!  Ájemdi ózim shomyldyryp, shashyn tarap, órip bereıin? Atama jemis qosylǵan suly botqasyn jasap bergem. Qatty unatqan. Sony jıi jasap berer edim..?!

Anasy:

— Qyzym-aý, jalynsaq ta kelmeı otyr ǵoı ol kisiler. Qalaı ákelemiz?

Qyzy:

— Qonaqqa shaqyraıyq?! «Az kúnge»- dep. Sosyn aralasatyn orta, qydyratyn jer taýyp beremiz. Keıin ózderi qaıtqylary kelmeı qalady.

Anasy:

— Meıirimge toly júregińnen aınaldym! Onda atań men ájeńdi qydyrtatyn jerlerdiń tizimin jasa. Birinshi qabattaǵy qonaq bólmege eki tósek, teledıdar kirgizeıik.

Qyzy:

— Anashym, atam men ájeme óleń arnadym. Oqyp bereıin be?

Anasy:

— Oı, bárekeldi! Oqı ǵoıshy?!

Qyzy:

— Meniń atam — danalardyń danasy,

Shejireshi abyzdardyń jalǵasy.

Al ájemniń nasıhat pen meıirimi,

Taýsylmaıtyn bulaq syndy arnasy.

«Otaǵasy» - deıdi apam atamdy,

«Shamshyraǵym» - deıdi atam apamdy.

Bir buryshta taıaqtary aıqasyp,

Eki qartqa tumsyqtaryn tosady.

Mámpásıge toltyryp ap qaltasyn,

Taratatyn bala kórse ár talyn.

Bereke men merekeniń shýaǵy,

Ata-ájem bar bolsa eken árdaıym!

Anasy:

— Qulynym sol! (Qyzynyń mańdaıynan súıedi) Tamasha! Áli de uıqasyn durystasań, senen ájepteýir aqyn shyǵady - dep oılaımyn.

Qyzy:

— Raqmet Anashym! (Anasyn qushaqtaıdy) Anashym, aýylǵa noýtbýgymnyń bireýin aparsam bola ma? Gúlnazdyń noýtbýgy istemeı qalypty.  Syılaıyn degem... Siz qarsy emessiz be? Menen «kımeıtin kıimderiń bolsa bershi?» - dep suraǵan. Kıimge qosa kishkene aqsha da bereıikshi..?  Qaryzdary kóp eken...

Anasy:

— Jaqsy kúnim! Beretin zattaryńdy daıyndaı ǵoı?! 

Qyzy:

— Raqmet, anashym! (Qýanyp sahnadan júgirip shyǵyp ketedi)

Anasy (ákesine qońyraý shalady):

— Ákesi, ótkendegi jınap júrgen aqshanyń jartysyn qaınyma bersek qaıtedi? Qaryzdary kóbeıip ketken sekildi. Qarsy emessiń be? Jaqsy, jaraıdy. 

Qyzy (qaıta júgirip shyǵyp):

— Anashym, oqyńyzshy. Biz durys istep jatyr ekenbiz. Myna aǵa ınstagramda «týystyq qarym-qatynasty úzbeı, jaqyndaryna jaqsylyq jasaǵan adamnyń ómir jasy uzaq bolady!» - dep jazyp qoıypty. Atam men ájemniń de ómir jasy uzaq bolsa eken? Ol úshin ne isteýim kerek?

Anasy:

— Duǵa jasaımyz balam! Basqa ne isteımiz? Júr, tezirek bazarǵa baraıyq? Bazar erte jabylyp qalady.

Qyzy:

— Men, daıynmyn anashym!  

(Ekeýi ketedi)

---