Sálem berdik,
Beıtanys jolaýshylar!
Jolaýshylap, sharshaǵan bolarsyńdar.
Anaý qyrdyń astynda meniń aýlym,
Soǵarsyńdar, dem alyp, qonarsyńdar.
Meniń úıim jylǵanyń jaǵasynda,
Quıǵan tusy bulaqtyń qara sýǵa.
Aǵysymen bulaqtyń tartsa boldy,
Suramaı-aq eshkimnen tabasyńdar.
Shetkerirek, kósheniń aıaǵynda,
Tirlik etip júrgen em baıaǵyda.
Qaljyrap kep jumystan, qalǵyp ketkem,
Sodan beri dármen joq oıanýǵa.
Sheshem baıǵus jan edi sózge bilgir,
Sóıleserlik kim oǵan kez kelip júr?
Muńyn basyp, ǵariptiń kóńlin ashyp,
Áńgime aıtyp berseńder ózderiń bil.
Qysqa ómirdiń sapary sóz be qurǵyr,
Asyqpaı-aq, as iship, kózderińdi il.
Jarym meniń jan edi dáti berik,
Beriktikten júr me eken zapy kórip?!
Balalarym er jetip ketken shyǵar,
Aldarqaýǵa kelmes-ti tátti berip.
Qaısybirin aıtaıyn, qaldy bári:
Oıy, taýy, ormany, balquraǵy.
Besigine týǵan jer bóledi de,
Áldıleıdi alystan taý bulaǵy,
Máńgi meni uıqyda qaldyrady...

---