InfoHub Logo

اقمولا وبلىسىندا ەستافەتا كەزىندە كوز جۇمعان 15 جاستاعى مەكتەپ وقۋشىسىنىڭ ولىمىنە قاتىستى كوكشەتاۋ قالالىق ءبىلىم ءبولىمى جۇرگىزگەن قىزمەتتىك تەكسەرىستىڭ قورىتىندىسى شىقتى.

ەسكە سالا كەتەيىك، وسىعان دەيىن، 2019 جىلعى مامىردىڭ 17-دە ساعات 12:30-دا بۋرابايداعى «زۆەزدنىي» بالالاردى ساۋىقتىرۋ ورتالىعىندا «الاۋ» وبلىستىق اسكەري-سپورتتىق ويىندار ەستافەتاسى كەزىندە 15 جاستاعى مەكتەپ وقۋشىسى كوز جۇمعان ەدى.

«ەستافەتا كەزىندە كوكشەتاۋ قالالىق №4 ورتا مەكتەبىنىڭ 9-سىنىپ وقۋشىسى مارەگە جەتپەي ەسىنەن تانىپ قۇلادى. 2003 جىلعى جاسوسپىرىمگە بىردەن العاشقى مەديسينالىق كومەك كورسەتىلدى. كەيىن ششۋچينسك قالاسىنداعى اۋداندىق اۋرۋحاناعا جەتكىزىلدى. اۋرۋحانادا ەس جيماستان 13:01-دە قايتىس بولدى»، - دەگەن بولاتىن وبلىستىق ءبىلىم باسقارماسىنىڭ باسپا ءسوز قىزمەتى.

ارتىنشا وسى وقيعاعا بايلانىستى كوكشەتاۋ قالالىق ءبىلىم ءبولىمى قىزمەتتىك تەكسەرىس جۇرگىزدى. بۇگىن وبلىستىق ءبىلىم باسقارماسى سول قىزمەتتىك تەكسەرىستىڭ قورىتىندىسىن شىعاردى.

«اتالعان فاكتىگە بايلانىستى قالالىق ءبىلىم ءبولىمى تەكسەرىس جۇرگىزدى. ونىڭ بارىسىندا العاشقى اسكەري دايىندىق ءمۇعالىمى  م.د.يسماعامبەتوۆ ءوزىنىڭ قىزمەتتىك جاعدايىن پايدالانىپ، مەكتەپ ديرەكتورى مەن اكىمشىلىگىن حاباردار ەتپەي، جارىسقا قاتىسۋشى الەكساندر نوۆيچيحيندى ءوز ەركىمەن دياس تايجانوۆقا اۋىستىرعانى انىقتالدى. سونىمەن قاتار، جالعان قۇجاتتار ازىرلەپ، وسى جارىستارعا د.تايجانوۆتى قاتىستىرعان. ءبىلىم ءبولىمىنىڭ 2019 جىلعى 13 مامىرداعى №199 بۇيرىعىنا قوسىمشادا تايجانوۆ دياس بولماعان. قىزمەتتىك تەرگەۋ قورىتىندىسى بويىنشا اكىمشىلىك تاراپىنان ءالسىز باقىلاۋ ءۇشىن مەكتەپ ديرەكتورى ب.حاسەينوۆاعا «قاتاڭ سوگىس»، ديرەكتوردىڭ وقۋ-تاربيە جۇمىسى جونىندەگى ورىنباسارى  ج.كۋبريناعا «سوگىس» تارتىپتىك جازاسى جاريالاندى. ق ر ەڭبەك كودەكسىنىڭ 52-بابى 1-تارماعى 14-تارماقشاسىنا سايكەس جانە پەداگوگيكالىق ەتيكا ەرەجەلەرىن ساقتاماۋعا بايلانىستى العاشقى اسكەري دايىندىق ءپانىنىڭ ءمۇعالىمى م.يسماعامبەتوۆپەن ەڭبەك شارتى بۇزىلدى»، - دەپ اتاپ ءوتتى ۆەدومستۆونىڭ باسپا ءسوز قىزمەتى.

ايتا كەتەيىك، قازىرگى كەزدە وسى وقيعاعا بايلانىستى ىشكى ىستەر ورگاندارى تاراپىنان دا تەرگەۋ ءجۇرىپ جاتىر.

---