InfoHub Logo

15 قاراشا — قازاقستان رەسپۋبليكاسىنىڭ ۇلتتىق ۆاليۋتاسى تەڭگەنىڭ تۋعان كۇنى. بۇل داتا 1997 جىلدىڭ 15 قاراشاسىنان باستاپ تەڭگەنىڭ تۋعان كۇنى ءارى قارجىگەرلەر كۇنى بولىپ اتاپ وتىلۋدە.

ءتول تەڭگەمىز 1993 جىلدىڭ 15 قاراشاسىندا اينالىمعا ەندى. وسى ارقىلى قولدانىستا بولعان كەڭەستىك ءرۋبلدىڭ تاريحىنا نۇكتە قويدى.

جاس مەملەكەت ءۇشىن بۇل شەشىم وڭايعا سوقپادى. جالپى، تەڭگە مەملەكەتتىك قۇپيا رەتىندە سانالىپ، استىرتىن جۇزەگە استى. بۇل تۋرالى ەلباسى نۇرسۇلتان نازاربايەۆ:

— 7 ميلليون دوللار تاۋىپ، اقشا­­مىز­دىڭ قالعان بولىگىن شىعا­رۋعا قاجەتتى شىعىندى تولە­دىك. ءتورت «يل-76» ۇشاعىن جال­داپ، اقشامىزدىڭ 60 پايىزىن تاسىپ الدىق. بۇل وتە قۇپيا وپەراسيا ەدى. قۇجاتتارعا «مەملەكەت باسشىسىنىڭ سالىنىپ جاتقان رەزيدەنسياسىنا كەرەكتى مۇلىك» دەپ جازىلدى. وعان دەيىن وبلىستاردا جەراستى قويمالارىن جاساتىپ قويدىق، — دەگەن بولاتىن.

ۇلتتىق ۆاليۋتا اتاۋىن تاڭداۋ بارىسىندا كوپتەگەن پىكىر قايشىلىقتارى ورىن الدى. ماماندار «التىن»، «اقشا»، «سوم»، «تانگا» نۇسقالارىن ۇسىندى. باستاپقىدا «سوم» دەپ اتاۋ جوسپارلانعان ەدى. دەگەنمەن، 1993 جىلى قىرعىز سومى اينالىمعا ەنگەننەن سوڭ، بۇل ەسىمنەن باس تارتتى. ال «تەڭگە» اتاۋىن اكادەميك ساۋىق تاكەجانوۆ ۇسىندى. عالىم ورتاعاسىرلىق تۇرىكتەر كۇمىس مونەتالارىن «دەنگە» نەمەسە «تانگا» دەپ اتاعانىن ورتاعا قويدى.

العاشقى بانكنوتتار ۇلىبريتانيادا باسىلىپ شىقتى. بانكنوتتار ءبىر اپتا بويى ۇشاقپەن قازاقستانعا جەتكىزىلدى. باس-اياعى 18 رەيس جاسالدى.

العاشقى بانكنوتتاردا:

1 تەڭگەدە — ءال-فارابي

3 تەڭگەدە — ءسۇيىنباي

5 تەڭگەدە — قۇرمانعازى

10 تەڭگەدە — شوقان ءۋاليحانوۆ

20 تەڭگەدە — اباي قۇنانباي ۇلى

50 تەڭگەدە — ءابىلقايىر حان

100 تەڭگەدە — ابىلاي حاننىڭ پورترەتى بەينەلەندى.

---