17 جاستا ءۇش اپتادا قالاي ميلليون تەڭگە تابۋعا بولادى؟

كاسىپكەرلىككە كەلۋى جايلى

كاسىپكەرلىك سالاعا كەلۋىمە سەبەپشى بولعان نارسە — ەنەرگەتيك. 7 جاسىمدا ەنەرگەتيك ساتىپ العىم كەلدى. ءبىراق اقشام بولمادى. ال اتا-انام ەنەرگەتيك زيان دەپ قاراجات بەرمەدى. ءبىر نارسەگە تىيىم سالسا سول زاتتى العىڭ كەلەدى عوي. سولاي اقشا تابۋدىڭ جولدارىن ىزدەدىم. وسىلايشا جەتى جاسىمدا ۆيدەوكاسسەتالار ساتىپ باستادىم. 11 جاسىمدا وقۋشىلارعا ارنالعان جاپسىرمالار (ناكلەيكا) ساتتىم. ءبىز تيپوگرافيادان وقۋشىلارعا ۇنايتىنداي ءتۇرلى نۇسقالارىن باسىپ شىعارىپ قىزىقتى جوبالار جاسادىق. وسىدان كەيىن شارعا كوشتىم. قالانىڭ پاركتەرىنە بارىپ شاردان ءارتۇرلى فيگۋرالار جاساپ سول جاقتاعى وتباسىلارعا ساتتىم. سولاي ساتۋمەن اينالىسىپ جۇرگەنمىن. ءبىر كۇنى دوستارىممەن بىرگە شىمبۇلاققا بارعىم كەلدى. الايدا ولارمەن بىرگە باراتىنداي قالتامدا اقشام جوق. ال اكە-شەشەم ماعان سونشالىقتى اقشا بەرە المادى. نە ىستەرىمدى بىلمەي وتىرىپ الىپ قالاي اقشا تابۋعا بولاتىندىعىن ويلاندىم. ويلانا كەلە ميىما ءبىر يدەيا كەلدى. مەنىڭ تەحنيكالىق ءبىلىمىم بار سايكەسىنشە كومپيۋتەرمەن جاقسى جۇمىس ىستەي بىلەمىن. وسى قابىلەتىمدى پايدالانىپ مەكتەپتەرگە بارىپ كومپيۋتەرلەرىنە باعدارلاما (پروگرامما) ورناتىپ بەرەتىندىگىمدى ايتىپ قىزمەتىمدى ۇسىندىم. سولاي ەڭ العاش 30 000 تەڭگەمدى جيناپ e-mail جىبەرىلىم (راسسىلكا) جاسادىم. سولاي كۇندەر ءوتىپ 15 جاسىمدا «18-گە تولعانعا دەيىن ميلليون تابامىن» دەپ الدىما ماقسات قويدىم. بيىل ناۋرىز ايىندا 17 جاسىمدا 3 اپتانىڭ ىشىندە 1،5 ملن تەڭگە تاپتىم. قالاي دەسەڭىز، ينفوماركەتينگتەن ارقىلى. ينفوماركەتينگ — بۇل ە-مايل جىبەرىلىم (راسسىلكا) مەن سەرىكتەستىڭ تاۋارىن ساتۋدىڭ قوسىندىسى. مەن كليەنتتەر بازاسىن جاساپ سەرىكتەستەردىڭ تاۋارلارىن MR-جىبەرىلىم (راسسىلكا) بويىنشا ساتتىم. وعان قوسا سول ارالىقتا «ياندەكس.ديرەكت»، كونتەكستىك جانە تارگەتينگتىك جارنامالار جاساۋدى ۇيرەندىم. بۇل ينتەرنەت بيزنەس بولدى. وز-وزىمە جۇمىس ىستەدىم. مەن ول كەزدە جوو تۇرماق، ءالى مەكتەپتى بىتىرمەگەنمىن. بۇنىڭ ءبارىن عالامتوردان ءوز بەتىمشە ۇيرەندىم. ۇيدە وتىرىپ الىپ، تەلەگرام كانال اشىپ، كۋرستاردى جۇكتەپ الىپ وقىدىم. ينتەرنەت بيزنەس سالاسىندا وزىمە كەرەكتى داعدىلاردى ءوز بەتىمشە سولاي ۇيرەندىم.

ءبىراز ۋاقىتتان كەيىن تيپوگرافيالىق قىزمەتپەن اينالىسۋدى شەشتىم. سونىڭ ىشىندە كەڭ تاراعان — باسىپ شىعارۋمەن اينالىستىم. سەبەبى ماعان تيپوگرافيا سالاسى ۇنايدى. ءبىز پوستەر جاسادىق، مەرەكەلەرگە ارنالعان باننەرلەر باسىپ شىعاردىق. سىرتقى جارنامامەن شۇعىلداندىق. اقشا ءتۇستى، ءبىراق كوپ ەمەس ەدى. كاسىپ جۇرگىزىپ وتىرعاندىقتان «اتامەكەن» جوباسىنا قاتىسىپ كورۋدى ءجون كوردىم. جوبا اياسىندا بيزنەس جوسپار ازىرلەپ، ونى قالاي دۇرىس قۇرۋ كەرەكتىگىن مەڭگەردىك.

Speed digital agency ۆەب-ديزاين ستۋدياسى

وسى جاز ايىندا اتامەكەننىڭ «جاس كاسىپكەر» بايقاۋىنا قاتىستىم. بۇل بايقاۋ جايلى ينستاگرامنان كوردىم. بايقاۋعا بۇكىل قازاقستان بويىنشا 2000 جۋىق ادام قاتىستى. ەگەر مەملەكەت سەنىڭ شىنىمەن دە اقشا تاپقىڭ كەلەتىنىن كورەتىن بولسا وندا ساعان اقشا بولەدى. مەن بۇل بايقاۋدا 505 000 تگ كولەمىندە گرانت ۇتىپ الدىم. سول اتامەكەن جوبالارىنىڭ بىرىندە بىلىكتى پروگرامميست پەن SMM مامانىمەن تانىستىم. ءبىز بىرىگىپ Speed digital agency ۆەب-ديزاين ستۋدياسىن اشتىق. مەن ساتىلىمعا ال ولار ونىمگە جاۋاپ بەرەدى. بۇل اقشانى بيزنەستى دامىتۋ ءۇشىن جاڭا تەحنيكالار الۋعا جۇمسايمىز. ءارى قاراي دا قول استىما قىزمەتكەرلەردى جالداپ، كليەنتكە كۇشتى ەففەكت جاساۋ ءۇشىن جارناماعا كوپ كوڭىل ءبولىپ، سوعان بيۋدجەتتى جۇمساۋدامىن. اتاۋىنا توقتالسام، ءبىزدىڭ كومپانيانىڭ ۇستانىمى بۇل — مەرزىم، سوندىقتان speed. ءبىز سايت، ءموبيلدى قوسىمشا، تەلەگرام بوت جاسايمىز، سايتقا ديزاين، كوپيرايتينگ قىزمەتىن ۇسىنامىز. سونىمەن قاتار كونتەكستىك جانە تارگەتينگتىك جارنامامەن دە اينالىسامىز.

مەن كليەنتيەردى ءۇش تاسىلمەن تارتامىن. ءبىرىنشى كونتەكستىك جارناما. ەكىنشى تارگەتينگتىك جارناما. ال ءۇشىنشى ءارتۇرلى بيزنەس شەبەرلىك ساعاتتارى مەن سەمينارلار. سپيكەرلەر ءوزىڭ جايلى ايتۋدى سۇراعاندا مەن ءونىمدى تانىستىرىپ سايت جاساۋمەن اينالىساتىنىمدى ايتامىن. سوندا 100 ادامنىڭ ىشىندە مىندەتتى تۇردە ەكى ادام ماعان كەلەدى.

قيىندىقتارى جايلى

مەن تاپسىرمانى ءبولۋدى ۇيرەنبەدىم. جۇمىستى مەنەن ارتىق ەشكىم ورىندامايدى دەپ ويلايتىنمىن. ءبىراق ءبىر كەزدە شارشاپ ەشنارسەگە ۇلگەرمەيتىنىمدى ءتۇسىندىم. سوندىقتان قول استىما قىزمەتكەرلەر الدىم. ءوز ءىسىنىڭ مامانى بولعان ادامدار بار، ولار سىرتىنان كورىنىپ تۇرادى. ءبىز كەلىسىم-شارت جاساسقاندا ەڭ قيىنى ولاردىڭ ماعان جۇمىس ىستەيتىندىگىن ايتۋ بولدى. مامان ءوز جۇمىسىن جاقسى ىستەي العانىمەن ءونىمدى وتكىزىپ ساتا المادى. سوندىقتان دا فريلانستا كوپ قاراجات تاپپادى. ال مەن ادامدارمەن بايلانىسىپ كەلىسە الامىن. سولاي ءبىز-بىرىمىزدى تاپتىق. قازىرگى ۋاقىتتا مەنىڭ كاسىبىمدەگى كەدەرگىلەر — كومپانيامنىڭ تانىلماعاندىعى عانا. ازىرگە وسى. وسى ماسەلەنى شەشۋ ءۇشىن ينستاگرامدى دامىتىپ جاتىرمىز.

بيىل مەكتەپتى ءبىتىردىم. ۋنيۆەرسيتەتكە تۇسپەدىم. جوسپارىمدا جۇمىس ىستەۋ. ازىرگە ۋنيۆەرسيتەتكە تاپسىرۋ جوسپارىمدا جوق. ءتىپتى ويلامايمىن دا. سەبەبى ءبىلىم بەرۋ جۇيەسى ەسكىردى اسىرەسە بيزنەس ءۇشىن ەسكىرگەن دەپ ەسەپتەيمىن. ەگەر ۋنيۆەرسيتەت بىتىرگەن ماركەتولوگ پەن مەنى سالىستىراتىن بولسا ءبىزدىڭ ارامىزدا كادىمگىدەي ۇلكەن ايىرماشىلىق بار. مەن پراكتيكپىن ءارى ساتا الامىن. بالكىم، تەوريانى بىلمەيتىن شىعارمىن. ءبىراق جۇمىستا كليەنتكە تەوريا ەمەس پراكتيكا قاجەت.

«بۇگىن باسقالار قالاماعان نارسەنى جاساساڭ، ەرتەڭ باسقالار سۇرە المايتىنداي ءومىر سۇرەسىڭ»

ىستەۋگە قورقىپ، ءومىر بويى وكىنگەنشە ىستەپ كورىپ وعان وكىنبەۋ كەرەك. بۇگىن باسقالار قالاماعان نارسەنى جاساساڭ، ەرتەڭ باسقالار سۇرە المايتىنداي ءومىر سۇرەسىڭ دەگەن ءسوز بار عوي. سول ءسوز ماعان كۇن سايىن موتيۆاسيا بەرەدى. ەڭ العاشقى كىتاپ ياعني وقىعاننان كەيىن كاسىپكەر بولۋعا وي تاستاعان كىتاپ روبەرت كيوساكيدىڭ «باي اكە، كەدەي اكە» ەڭبەگى. بۇل ەڭبەك مەنىڭ ءومىرىمدى وزگەرتتى. ال ەڭ سۇيىكتى كىتابىم «ۆاۆيلونداعى ەڭ باي ادام». VQTeens كاسىپكەرلىك قاۋىمداستىعىنا كىرەمىن. VQTeens — بۇل جاس كاسىپكەرلەرگە ارنالعان ورتا. ءبىز ءار سەنبى سايىن ترەنينگتە كەزدەسەمىز. نارىقتا بيزنەس ترەنەرلەر كوپ. مەن VQTeens ترەنينگتەرىنە عانا قاتىسامىن.

وقۋعا كەڭەس بەرەمىز:

سوڭعى قوڭىراۋعا دەيىن بايىپ ۇلگەرگەن 7 وقۋشى

بولاشاققا جوسپارىم قارجىلىق تاۋەلسىزدىكتە ءومىر ءسۇرۋ. مەن ءۇشىن قارجىلىق تاۋەلسىزدىك دەگەن ول مەنىڭ وتباسىم ەشنارسەدەن مۇقتاجدىق كورمەيدى. مەن سپارتالىق جاعدايدا وسكەن بولسام، ال مەنىڭ بالام وقۋى مەن دامۋى ءۇشىن قالاعانىنىڭ ءبارىن الا الاتىن بولادى.

قانيا تابىس