37% قاعيداسى
شاماسى، اركىم-اق ومىرىندە الدەبىر نارسەنى ىزدەپ تابۋدىڭ وڭتايلى جولىن قولدانۋمەن بايلانىستى ماسەلەگە تاپ بولىپ كورگەن شىعار. تۇرعىنجاي جالداۋ، جۇمىسقا الۋ، جان جارىڭدى تاڭداۋ… ەڭ جاقسى نۇسقانى قالاي تاڭداعان ءجون؟ قانداي ستراتەگيا ەڭ وزىق ناتيجەگە جەتەلەيدى؟ جاۋابى — ۇتىمدى جەردە توقتاۋ نەمەسە 37% قاعيداسى. بۇل ستراتەگيانىڭ سىزگە ەڭ ۇزدىك نۇسقانى تاڭداپ الۋعا، سونداي-اق ۋاقىتىڭىز بەن جۇيكە جاسۋشالارىن ۇنەمدەۋگە سەپتىگىن تيگىزۋ ىقتيمالدىعى جوعارى. قازىرگى تاڭدا «حاتشىنى تاڭداۋ ماسەلەسى» دەگەن اتاۋمەن بەلگىلى باسقاتىرعى جاريالانعان سوڭ 37% قاعيداسى كوپشىلىككە كەڭىنەن تانىمال بولىپ كەتتى. بۇل ماسەلەنىڭ شەشىمىن وسى قاعيدا وتە ادەمى تاۋىپ بەرەدى.
حاتشىنى تاڭداۋ ماسەلەسى
ءسىز — جۇمىس بەرۋشىسىز. ءسىزدىڭ مىندەتىڭىز — حاتشى قىزمەتىنە ۇمىتكەرلەرمەن (جۇمىسقا تۇرعىسى كەلەتىندەردىڭ مولشەر سانى بەلگىسىز) تىلدەسىپ، ولاردىڭ ىشىندەگى ەڭ ۇزدىگىن جۇمىسقا الۋ.
ءسىز جۇمىس ىزدەپ كەلگەندەردىڭ ارقايسىسىمەن ءبىر رەت قانا تىلدەسە الاسىز (كىمنىڭ كىمنەن كەيىن كىرۋ رەتى كەزدەيسوق). ۇمىتكەردى جۇمىسقا الۋ نەمەسە الماۋ تۋرالى بايلامدى تىلدەسىپ بولعان بويدا شىعارۋىڭىز كەرەك. ءسىز نە كانديداتتى جۇمىسقا المايسىز دا، دەرەۋ كەلەسى ۇمىتكەردى شاقىرتاسىز، نە ول ادامدى سالعان جەردەن جۇمىسقا الاسىز. ءسىز جۇمىسقا تەك ءبىر ادامدى الا الاسىز جانە ول ادامدى العان سوڭ، باسقا ۇمىتكەرلەردى كورۋ اياقتالادى. الدىندا تىلدەسكەن كانديداتۋرالارعا ورالۋعا بولمايدى. بىرنەشە اداممەن ءبىراق تىلدەسۋگە دە تىيىم سالىنادى.
بۇنداي تۇيتكىلدىڭ ءتۇيىنىن قالاي تارقاتۋعا بولادى؟ بۇل جەردە ىشكى تۇيسىگىڭىزگە جانە تاعدىر تالەيىنە يەك ارتقاننان باسقا امال جوق سياقتى، ءبىراق ولاي ەمەس — ماتەماتيكتەر وسىنداي تۇرپاتتى ماسەلەلەردى ءبىر جاقتى قىلۋدىڭ وڭتايلى ستراتەگياسىن ءتۇزىپ شىعارا الدى، ونىڭ ۇستىنە ستراتەگيا ۇمىتكەرلەردىڭ مولشەر سانىنا بايلانىستى ەمەس. 37% قاعيداسى — سول ستراتەگيانىڭ ءدال ءوزى.
قاعيدا بىلاي دەيدى: ۇمىتكەرلەردىڭ العاشقى 37% كورىپ، ولاردىڭ ەشقايسىسىن الماۋ، ءبىراق ولاردىڭ ىشىندەگى ەڭ ۇزدىگىن كوڭىلگە توقىپ قويۋ كەرەك. بۇلاردان كەيىنگى ۇمىتكەرلەردىڭ 63% تىلدەسكەن كەزدە الدىڭعىلاردىڭ بارىنەن وزىق شىققان ءبىرىنشى ۇمىتكەردى الۋ كەرەك.
بۇل ستراتەگيا نەگە ەڭ ۇتىمدى جانە 37 سانى قايدان شىقتى؟ جاي-جاپسارىن انىقتايىق.
نەگە 37%؟
سونىمەن، ەڭ اۋەلى، ۇزدىك كانديداتۋرانى ىزدەۋ كەزىندە بولۋى مۇمكىن قاتەلىكتەرگە زەيىن سالعان ابزال. ءسىز ۇزدىك كانديداتۋرانى بايقاماي، كەلەسىسىنە ءوتىپ كەتۋىڭىز مۇمكىن، نەمەسە باسقا كانديداتتاردىڭ ءبىرتالايىنان قارىم-قابىلەتى تومەن ۇمىتكەردى جۇمىسقا الىپ قويۋىڭىز مۇمكىن. ايتەۋىر، وڭتايلى ستراتەگيا وسى ەكى شەكتىڭ ورتاسىنان تەڭگەرىم تاۋىپ بەرۋى ءتيىس ەكەنى انىق: تەز كەلىسە سالۋعا بولمايدى، سونىمەن قاتار سوڭعى كانديدات بارىنەن جاقسى بولادى دەپ ويلاپ، ۇمىتكەرلەردىڭ ءبارىن كەرى قايتارا بەرۋگە دە بولمايدى.
ماتەماتيكالىق فورمۋلالاردى قاراستىرىپ وتىرمايمىز، ودان دا سالعان جەردەن ناتيجەگە نازار اۋدارايىق. عالىمدار ەشقايسىسىن الماي، ءبىراق ولاردىڭ ىشىندەگى ەڭ مىقتىسىن قاپەرگە ءىلىپ قويۋ ءۇشىن تىلدەسىپ شىعاتىن كانديداتتار بولىگى 1/ە تەڭ، بۇل جەردە ە — ناتۋرال لوگاريفمنىڭ نەگىزى، ياعني شامامەن 2،71828 تەڭ. بۇل بولسا شامامەن 37% تەڭ بولادى.
ءتۇسىنىپ وتىرعانىڭىزداي، 37% قاعيداسى — بۇل وڭتايلى ستراتەگيا، ءبىراق ول ەڭ جاقسى كانديداتتى ىرىكتەپ الاتىنىڭىزعا كەپىل بولا المايدى. ناقتىراق ايتساق، بۇنداي ستراتەگيانىڭ تابىستى بولۋ ىقتيمالدىعى 37% قۇرايدى (sic). باسقاشا ايتقاندا، 37% قاعيداسىمەن ءاردايىم ەڭ جاقسى ناتيجەگە جەتە بەرمەيسىز، ءبىراق ونىڭ ۇزدىك ناتيجەگە جەتكىزۋ مۇمكىندىگى وتە جوعارى.
ەندى وسى ۇتىمدى جەردە توقتاۋ قاعيداسى ءسىزدىڭ قاجەتىڭىزگە جارايتىن شىنايى ومىرگە ەتەنە جاقىنىراق مىسالدى قاراستىرىپ كورەيىك.
ءسىز پاتەر جالداۋعا بەل بۋدىڭىز دەلىك. ءسىزدىڭ ۋاقىتىڭىز شەكتەۋلى، الدىندا كورگەن نۇسقالارعا ورالۋعا بولمايدى (جاقسى پاتەرلەردى بۇل كەزدە باسقالار جالعا الىپ قويدى، ال ناشار پاتەرلەرگە ورالۋدىڭ ەش ءمانى جوق). ەندەشە پاتەر ىزدەۋگە ارناپ بولگەن ۋاقىتىڭىزدىڭ 37% ۇسىنىلعان نۇسقالاردى كورىپ شىعۋعا جۇمساڭىز دا، وسىدان كەيىن الدىندا كورىپ شىققان پاتەرلەردەن جاقسى شىققان ەڭ ءبىرىنشى پاتەردى الىڭىز.
كورىپ تۇرعانىڭىزداي، ماتەماتيكا كەي كەزدەرى شىنايى ومىردە اجەتكە جاراپ، قىجالاتىڭىزدان شىعارىپ جاتادى. ءسىز تاعى قانداي الگوريتمدەر مەن قاعيدالاردى بىلەسىز؟ بىزبەن ءبولىسىڭىز!
ساتتىلىك تىلەيمىز!
وقۋعا كەڭەس بەرەمىز:
20/80 قاعيداتىن ومىردە قالاي قولدانۋ كەرەك
پيتەر قاعيداتى — نەگە بىلىكسىز قىزمەتكەرلەردىڭ قورشاۋىندا قالا بەرەمىز
ومىرلىك تاجىريبە (مەرفي زاڭدارى)
You Might Also Like
-
مەندەلسوننىڭ «سۆادەبنىي مارشى» سەكىلدى بۇل كۇندەرى قازاقتىڭ ۇيلەنۋ تويلارىنىڭ گيمنىنە اينالىپ كەتكەن «جار-جار» ءانى قاشان، قالاي شىقتى دەيسىزدەر عوي. ول بىلاي: «جار-جا...
