اباي وبلىسىندا كونە ءداۋىر پيراميداسى تابىلدى
اباي وبلىسىندا قازبا جۇمىستارى كەزىندە قولا ءداۋىرىنىڭ دالا پيراميداسى تابىلدى.
ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ (ەۇۋ) ارحەولوگ-عالىمدارى ەۋرازيا دالاسىندا كەزدەسپەيتىن قولا ءداۋىرىنىڭ ءىرى كولەمدەگى دالا پيراميداسىن تاپتى. قازبا جۇمىستارى اباي وبلىسىندا جۇرگىزىلۋدە. 2014 جىلدان باستاپ ەۇۋ تاريح فاكۋلتەتى ارحەولوگيا جانە ەتنولوگيا كافەدراسىنىڭ عالىمدارى اباي وبلىسى، اباي اۋدانى توقتامىس ەلدى مەكەنىنىڭ جانىنداعى قىرىقۇڭگىر كەشەندى ەسكەرتكىشىندە ارحەولوگيالىق قازبا جۇمىستارىن جۇرگىزىپ كەلەدى. وعان ۋنيۆەرسيتەت ستۋدەنتتەرى مەن ماگيسترانتتارى اتسالىسادى. جۇرگىزىلگەن زەرتتەۋ جۇمىستارىنىڭ ناتيجەسىندە ەۋرازيا دالاسىندا كەزدەسپەيتىن ءبىزدىڭ داۋىرىمىزگە دەيىنگى ەكىنشى مىڭجىلدىقتىڭ باسى، ياعني وسىدان ءتورت مىڭ جىل بۇرىنعى قولا ءداۋىرىنىڭ ءىرى كولەمدەگى دالا پيراميداسى تابىلدى - دەلىنگەن مينيسترلىك اقپاراتىندا.
تاريحشى عالىم، ەۇۋ ارحەولوگيا جانە ەتنولوگيا كافەدراسىنىڭ مەڭگەرۋشىسى ۇلان ۇمىتقالييەۆتىڭ ايتۋىنشا، تابىلعان پيراميدانىڭ قابىرعالارىندا جانۋارلار بەينەلەنگەن.
"دالا پيراميداسى وتە دالدىكپەن سالىنعان، التى قىرلى. ءاربىر قىرىنىڭ اراسى ون ءۇش مەتر جانە سەگىز قاتار تاسپەن قالانعان. ورتاسىندا بىرنەشە شەڭبەرى بار. بۇل – وتە كۇردەلى كەشەندى قۇرىلىس. سول كەشەندەگى قۇرىلىستىڭ سىرتىنداعى قابىرعالارىندا ءارتۇرلى جانۋارلاردىڭ، اسىرەسە جىلقىنىڭ سۋرەتتەرى باسىم بەينەلەنگەن. سونىمەن بىرگە تۇيەنىڭ دە بەينەلەرى بار. قازبادان تابىلعان مالىمەتتەر، قىش ىدىستار، ايەل ادامنىڭ التىن سىرعاسى جانە تاعى باسقا اشەكەي بۇيىمدار وسى قولا ءداۋىرىنىڭ ۇلكەن كونە داۋىردە مادەنيەتى، وشاعى بولعاندىعىن كورسەتەدى. بۇل، ياعني، سول كەزەڭنىڭ وزىندە جىلقى كۋلتىنىڭ وتە جوعارى بولعاندىعىن سول تاس قۇرىلىستىڭ اينالاسىندا جىلقى سۇيەكتەرىنىڭ تابىلۋى دالەلدەپ وتىر" - دەيدى ۇلان ۇمىتقالييەۆ.
ءمالىم ەتىلگەندەي، قازىرگى ۋاقىتتا زەرتتەۋلەر شەتەلدىك عالىمدارمەن بىرلەسىپ جۇرگىزىلىپ جاتىر.
You Might Also Like
-
سەڭكىبايدىڭ جاس شاعىندا مويناق بي اتاسىنىڭ قولىندا شاكىرت بوپ جۇرگەن كەزى ەكەن.
-
ەلوردالىق ءبىلىم باسقارماسى بيىل قاي مەكتەپتەردە 1-سىنىپقا دايارلىق سىنىبى اشىلاتىنىن ءمالىم ەتتى.
