بيىل ەلىمىزدە قانداي شەتەل ۋنيۆەرسيتەتتەرىنىڭ فيليالدارى اشىلادى
جوعارى وقۋ ورىندارىنىڭ ۇلتتىق رەيتينگى ەنگىزىلەدى. بۇل تۋرالى ۇكىمەت وتىرىسىندا عىلىم جانە جوعارى ءبىلىم ءمينيسترى ساياسات نۇربەك ايتتى.
«شەتەلدىك جوعارى وقۋ ورىندارىنىڭ فيليالدارىن قۇرۋ بويىنشا دا اۋقىمدى جۇمىس اتقارىلدى. 2022 جىلى الماتى قالاسىندا De Montfort University فيليالى، ءال-فارابي اتىنداعى قازاق ۇلتتىق ۋنيۆەرسيتەتىنىڭ بازاسىندا «ميفي» ۇلتتىق يادرولىق زەرتتەۋ ۋنيۆەرسيتەتىنىڭ فيليالى، س.وتەبايەۆ اتىنداعى اتىراۋ مۇناي جانە گاز ۋنيۆەرسيتەتى بازاسىندا ي.گۋبكين اتىنداعى رەسەي مۇناي جانە گاز ۋنيۆەرسيتەتىنىڭ فيليالى، سونداي-اق م.قوزىبايەۆ اتىنداعى سولتۇستىك قازاقستان ۋنيۆەرسيتەتىنىڭ اريزونا ۋنيۆەرسيتەتىمەن ستراتەگيالىق ارىپتەستىگى قۇرىلدى»، - دەدى س.نۇربەك.
ونىڭ ايتۋىنشا، بيىل تاعى بىرنەشە فيليال اشىلادى:
2023 جىلى:
- جۇبانوۆ اتىنداعى اقتوبە وڭىرلىك ۋنيۆەرسيتەتى بازاسىنداعى حەريوت-ۋوتت ۋنيۆەرسيتەتىنىڭ (شوتلانديا) فيليالى؛
- شاكارىم ۋنيۆەرسيتەتى بازاسىنداعى ەكونوميكا ۋنيۆەرسيتەتىنىڭ (پولشا) فيليالى؛
- ەسەنوۆ ۋنيۆەرسيتەتتىڭ بازاسىندا نەمىس جوعارى وقۋ ورىندارىنىڭ كونسورسيۋمى قۇرىلدى.
«ال كەلەر جىلى 5-6 مىقتى وقۋ ورىندارىنىڭ فيليالدارى اشىلادى»، - دەدى مينيستر.
ونىڭ ايتۋىنشا، العاش رەت Times Higher Education اگەنتتىگىمەن بىرلەسىپ، جوعارى وقۋ ورىندارىن سارالاۋدىڭ ۇلتتىق جۇيەسى جوباسى ازىرلەندى. ەلىمىزدە جوعارى ءبىلىم بەرۋ جۇيەسىن دامىتۋدىڭ وزەكتى ماقساتتارى مەن مىندەتتەرىن ەسكەرەتىن ادىستەمە ازىرلەندى. ۇلتتىق رەيتينگ تالاپكەرلەرگە بولاشاق ماماندىقتى تاڭداعاندا، اسىرەسە، شەتەلدىك ستۋدەنتتەر ءۇشىن قاجەت. رەيتينگ الەمنىڭ جەتەكشى رەيتينگتىك اگەنتتىكتەرى (QS، THE، CWUR جانە ت.ب.) پايدالاناتىن ينديكاتورلار مەن كورسەتكىشتەردى قامتيتىن جوعارى وقۋ ورىندارىنىڭ ءبىلىم بەرۋ-عىلىمي قىزمەتىن كەشەندى باعالاۋدى ەسكەرەدى. ۇلتتىق رەيتينگتى قالىپتاستىرۋ سيفرلىق تەحنولوگيالاردى پايدالانا وتىرىپ جۇزەگە اسىرىلاتىن بولادى.
You Might Also Like
-
ەلىمىزدەگى مەكتەپتەردە 340 مىڭنان استام ءمۇعالىم قىزمەت ەتىپ جاتىر.
-
بيىلعى وقۋ جىلىندا ەل بويىنشا 1-4 سىنىپ وقۋشىلارى تەگىن تاماقپەن قامتىلادى.
