InfoHub Logo

باياعىدا ءبىر قۇمىرسقا ءوزىنىڭ باۋىرلاستارىنا وكپەلەپ، يلەۋدەن كەتىپ قالادى دا، ارا مەن قوڭىزعا بارىپ، سولارمەن دوستاسىپتى.

بىردە قۇمىرسقا ازىق ىزدەپ، ۇزاق شارلاپ ءجۇرىپ ءبىر ۇلكەن ءدان تاۋىپ الىپتى. ونى وزىمەن الىپ كەتپەكشى بولىپ، سۇيرەۋگە، كوتەرۋگە قانشا تىرمىسسا دا ءداندى ورنىنان قوزعالتا الماپتى. اقىرى قۇمىرسقا ءوزىنىڭ جاڭا دوستارىن كومەككە شاقىرماق بولىپ شەشىپتى. اۋەلى بال جيناپ جۇرگەن ارانى كەزدەستىرىپ، بىلاي دەپ ءوتىنىپتى:

— دوستىم، ماعان كومەكتەسشى، جالعىز ءوزىمنىڭ شامام جەتەر ەمەس.

سوندا ارا دوسى:

—  كورىپ تۇرعان جوقسىڭ با؟! مەن دە جۇمىس ىستەپ ءجۇرمىن، — دەپ ارمەن قاراي ۇشا جونەلىپتى.

قۇمىرسقا ەندى قوڭىزعا بارادى.

— مەن سەن ءۇشىن مىنا جۇمىسىمدى تاستاپ كەتە المايمىن، — دەپ جاۋاپ بەرگەن قوڭىز دا قيىن دومالاتىپ جونىنە كەتىپتى.

دوستارىنىڭ قىلىعىنا وكپەلەگەن قۇمىرسقا ۇيىنە قاراي كەتىپ بارا جاتىپ، جولدا ءوزىنىڭ باۋىرلارىن كەزدەستىرىپتى. مۇنىڭ مۇڭايعان ءجۇزىن كورگەن قۇمىرسقالار: «ساعان نە بولدى؟ نەگە كوڭىلسىزسىڭ؟» — دەپ سۇرايدى.

قۇمىرسقا ولارعا باسىنان كەشكەندەرىنىڭ ءبارىن ايتىپ بەرىپتى. باۋىرلاستارى وعان ءداندى جەتكىزۋگە كومەكتەسىپتى. وكپەلەپ كەتكەن قۇمىرسقا ءوزىنىڭ يلەۋىنە ورالىپتى. «اداسقاننىڭ ايىبى جوق، قايتا ءۇيىرىن تاپقان سوڭ» دەگەن وسى ەكەن.

---