InfoHub Logo

اقشاھاردىڭ كەدەيى جولدان ءبىر قاتقان نان تاۋىپ الادى دا، ونى امالىن تاۋىپ جۇمساتىپ جەمەك بولادى. ءبىر ناۋايحانانىڭ الدىنا كەلەدى. تونارداعى ىستىق ناننىڭ جاعىمدى ءيىسى ونىڭ كەڭسىرىگىن جارادى، جاقىنداپ كەلىپ، قاتقان نانىن توناردىڭ بۋىنا قويىپ ءجىبىتىپ جەيدى.

ناۋايحانا قوجايىنى الگى كەدەيگە تاڭىرقاي قاراپ تۇرادى. كەدەي قاتقان نانىن جەپ بولىپ، جۇرە بەرگەندە ناۋايحانا قوجايىنى ونان اقشا سۇرايدى. كەدەي:

— سەنىڭ ەشنارسەڭدى جەمەسەم، قالايشا اقشا بەرەم؟ — دەيدى.

— سەن مەنىڭ تونارىمنىڭ بۋىن جەدىڭ، ارينە، اقشا تولەۋگە ءتيىستىسىڭ، — دەيدى ناۋايحانا قوجايىنى.

اقىرى ەكەۋى تالاسا-تالاسا، سول شاھاردىڭ قازىسى جۇقاعا كەلەدى. جۇقا بۇل ەكەۋىنىڭ داۋىن تىڭداپ بولعاننان كەيىن، ءبىر دوربا تەڭگە اقشانى الىپ ناۋايحانا قوجايىنىنىڭ قۇلاعىنىڭ تۇسىنا اپارىپ ارلى-بەرلى شايقايدى. دوربادان اقشانىڭ شىرىلداعان داۋىسى ەستىلەدى. سوسىن ول ناۋايحانا قوجايىنىنا:

— ەستىدىڭ بە، وسى اقشانىڭ داۋىسىن اكەت! — دەيدى. ناۋايحانا قوجايىنى مۇنى تۇسىنبەي:

— قازى تاقسىر، بۇل قانداي ۇكىم بولدى؟ — دەپ سۇرايدى.

سوندا جۇقا:

— بۇل، وتە ءادىل، اقىلعا سيىمدى ۇكىم بولدى. كىمدە-كىم ناننىڭ بۋىن ساتسا، سول ادام اقشانىڭ شىلدىرلاعان داۋىسىن العانى ءجون، — دەيدى.

---