افراسياب پاتشانىڭ قىزى — فارانگيز حانشا
تالاي عاسىرلار بۇرىن ەجەلگى تۇران مەن يران جەرلەرىندە سكيفتەر (ساقتار) مەن پارسىلار اراسىندا قيان-كەسكى سوعىستار ءجۇرىپ جاتتى. تۇران پاتشاسى افراسياب پەن ونىڭ ماڭگىلىك جاۋى حۇسراۋ جەڭىس ءۇشىن ءوز جاۋىنگەرلەرىن اياماي، بىرىنەن سوڭ ءبىرىن سوعىس مايدانىنا اتتاندىردى.
ءبىر كۇنى پارسى حانزاداسى سياۋىش سەرۋەن قۇرىپ جۇرگەن قىزدار اراسىنان افراسيابتىڭ قىزى فارانگيزدى كورىپ، وعان ەس-تۇسسىز عاشىق بولىپ قالادى. قىز دا سول ساتتە تەك حانزادا سياۋىش قانا وزىنە لايىقتى جار بولا الاتىنىن تۇسىنەدى.
افراسياب ەكى حالىق اراسىنداعى تاتۋلىق پەن تىنىشتىقتى ويلاپ، ءوزىنىڭ سۇيىكتى قىزى مەن پارسى حانزاداسىنىڭ قوسىلۋىنا كەلىسىمىن بەرەدى. وزدەرىنىڭ ماحابباتىنا ەشكىم بوگەت بولماۋى ءۇشىن سياۋىش ىزگىلىك پەن مەيىرىمدىلىك، ادىلەتتىلىك پەن اقيقات، تەڭدىك پەن ەركىندىك وركەندەيتىن «سياۋىش قالاسىن» سالۋعا شەشىم قابىلدايدى. وسى قالانى تۇرعىزۋ ءۇشىن ساق پەن پارسى اسكەرلەرى ارالارىنداعى عاسىرلىق جاۋىزدىقتى ۇمىتىپ ەڭبەك ەتەدى. ناتيجەسىندە قۇرىلىسشىلار اق ءمارماردان قالا كوتەرەدى. ونىڭ قابىرعالارى مەن قاقپاسىن شەبەر ويىلعان ورنەكتەرمەن اشەكەيلەپ، ءتورت تارابىنان ءتورت بيىك مۇنارا تۇرعىزادى. بۇل كەزدە توي ءراسىمىن وتكىزەتىن ۋاقىت تا تاقاپ قالعان ەدى. ءبىراق زۇلىم جاۋلار حانزادانىڭ ەركىندىكتى كوزدەگەن جوباسىنا كەدەرگى جاسايدى. وسەك-اياڭ تىنىشتىقتى بۇزىپ، عاشىقتار كوز جۇمادى. تۇران مەن يران اراسىندا سوعىس قايتا باستالادى. ءبىر كەزدەرى جازىق دالادا بوي كوتەرگەن، فارانگيز حانشايىم مەن ونىڭ سۇيىكتىسى سياۋىش حانزادا ءومىر ءسۇرۋدى ارمان ەتكەن عاشىقتار قالاسى قيراتىلادى. ءتىپتى، ورنى دا بەلگىسىز.
You Might Also Like
-
ءبىر كۇنى الدار ۇلكەن قارا جولمەن ساپار ءجۇرىپ كەلە جاتىپ، مال ايداعان ۇلكەن ءبىر كەرۋەنگە كەزدەسەدى. الدار جانىنان جورتىپ، ءوتىپ بارا جاتقاندا كەرۋەنباسى:
-
ۇبت دەپ ايتىپ باستاماس بۇرىن مەن ءوز مەكتەبىمدى تىلگە تيەك ەتسەم دەيمىن. مەن №34 مەكتەپتە وقيمىن، جانە ماقتانىش ەتەمىن. مەكتەبىمىز جەتىستىكتەر بيىگىنەن كورىنۋدە. جەتىستىك كىلتى ۇستازدەرىمىزدا، ول كى...
