InfoHub Logo

ءبىر كۇنى قوجا كورشى اۋىلدا شارۋاسى بولىپ، تاڭ سارىدەن جولعا شىعۋعا ازىرلەنەدى. سويتسە، دوستارى سول كۇنى قوجانىڭ ۇيىندە باس قوسىپ، ويىن-ساۋىق جاساماق بولىپ كەلىسىپ قويسا كەرەك. ءماجىلىستىڭ كوركى سانالاتىن قوجانى جىبەرگىلەرى كەلمەي، ولار مىناداي ءازىل-وسپاق ويلاپ تابادى: قوجا ارتىنىپ-تارتىنىپ قورادان شىعا بەرگەندە، بىرنەشە ادام جولىن بوگەپ:

— قايدا باراسىڭ؟ — دەپ سۇرايدى. قوجا بىرنەشە كۇنگە كورشى اۋىلعا كەتىپ بارا جاتقانىن ايتادى.

— ەي، سورلى، — دەيدى دوستارى، — سەن ەشقايدا بارمايسىڭ، سەن ءولىپ قالعانسىڭ. سەن بىرەۋىمىزدىڭ تۋىسىمىزسىڭ، بىرەۋىمىزدىڭ دوسىمىزسىڭ، سوندىقتان سەنى تازا ارۋلاپ جەرلەۋ ءبىزدىڭ كورشىلىك بورىشىمىز.

سونىمەن زارەسى ۇشىپ، ابىرجىي قالعان قوجا بايعۇستى كورشىلەرى ۋلاپ-شۋلاپ مەشىتكە قاراي سۇيرەي جونەلەدى. قوجا قورىققانىنان قالش قالش ەتىپ:

— جىگىتتەر، ويىننان وت شىعادى، قالجىڭدى قويىڭدار. بۇيتە بەرسەڭدەر، مەن شىنىمەن ءولىپ كەتۋىم مۇمكىن. جانە انا اۋىلدا تىعىز-تاياڭ شارۋام بار ەدى. بوساتىڭدار، بىرگە باراتىن جولداستارىمنان كوز جازىپ قالامىن، — دەپ جالىنادى.

ءبىراق قانشا جالىنعانىمەن، قوجانىڭ سوزىنە كورشىلەرى قۇلاق اسپايدى، قۇر شۋلاي بەرەدى. اقىرىندا، قوجانىڭ ءۇنى وشەدى. جىگىتتەر ونى كوتەرىپ اكەلىپ، جانازا شىعاراتىن تاقتايعا جاتقىزىپ قويادى.

سول كەزدە كوشەدە قوجانىڭ ءبىر جاقىن دوسى ءوتىپ بارا جاتادى. كورشىلەرى ونى دا قاۋمالاپ، جولىن بوگەپ:

— قوجا دوسىڭ دۇنيە سالدى، جانازاسىنا قاتىسپايسىڭ با؟ — دەپ، انا كىسى «اسىعىس جۇمىسىم بار ەدى» دەسە دە، ۋلاپ-شۋلاپ جىبەرمەيدى.

سوندا ءحالسىز تالىقسىپ جاتقان قوجا باسىن كوتەرىپ:

— ەي، دوس، ءسوزىڭدى بوسقا تاۋىسىپ قايتەسىڭ، ءبارىبىر ەشنارسە ونبەيدى. مەنىڭ شارۋام سەنىكىنەن دە اسىعىس ەدى، ءبىراق اجال جەتكەن سوڭ، نە امال بار، مىنە، تاعدىردىڭ جازعانىنا كونىپ جاتقام جوق پا، كوپپەن بىرگە بولىپ، ءوز قولىڭنان توپىراق سالعايسىڭ، — دەپتى.

---