قىسىلعاندا ادام نە دەمەيدى
قوجا بىردە توعايعا وتىن الا بارعاندا ءبىر قويان ۇستاپ الادى. وعان دەيىن قوياندى كورمەگەن دە، بىلمەيدى دە ەكەن. «بۇ نەتكەن عاجاپ اڭ ەدى! ۇيگە اپارىپ، جۇرتقا كورسەتەيىن، بىرەۋ بولماسا، بىرەۋ قانداي اڭ ەكەنىن بىلەر»، — دەپ ويلايدى. قوياندى دورباعا ساپ، اۋزىن مىقتاپ بايلاپ، ۇيىنە الىپ كەلەدى. ايەلىنە ءبىر عاجاپ اڭ ۇستاپ اكەلگەنىن ايتىپ، كورشى-قولاڭدى جيناپ كەلگەنشە دوربانىڭ اۋزىن شەشپە دەپ ەسكەرتەدى.
ادام ءارقاشان دا كورمەگەندى كورۋگە اۋەس ەمەس پە، قوجانىڭ ايەلى وڭاشا قالىسىمەن: «بۇ نە عاجاپ ەكەن، بايقاپ كورەيىن» دەپ دوربانىڭ اۋزىن شەشە بەرگەندە-اق قويان اتىپ شىعىپ، تۇندىك اشىق تۇر ەكەن، شاڭىراقتان ءبىر-اق سەكىرىپ كەتەدى. ەسى شىعىپ قالعان ايەلدىڭ قولىنا تۇسكەن ارپا ولشەيتىن اياقتى دورباعا سالىپ، قايتادان اۋزىن بايلاپ قويۋدان باسقا ىستەر امالى بولمايدى. سونسوڭ تۇك بىلمەگەن ادام قۇساپ وتىرا بەرەدى. كۇيەۋى وعان نە ەسالاڭ بىرەۋدى ەرتىپ كەلەتىن، نە ەشكىم ونىڭ ايتقانىنا سەنىپ، ەرىپ كەلمەيتىن ءتارىزدى كورىنەدى.
ءبىراق ءىس جۇزىندە باسقاشا بولادى: قوجا دالاعا شىقسا، قالانىڭ قوناقتان قايتقان ءبىر توپ يگى جاقسى ادامدارى ءۇيىنىڭ جانىنان ءوتىپ بارا جاتىر ەكەن. ولار قوجاعا جولىعىپ ءبىرى سۇراپ، ءبىرى قوستاپ، قوجانىڭ بۇگىنگى سىرىن ايتقىزادى، سونسوڭ عاجاپ اڭدى كورەمىز دەپ ءبارى قوجانىكىنە لاپ بەرەدى.
قوجا ولاردى القا-قوتان جايعاستىرىپ وتىرعىزىپ، عاجاپ اڭنان قاپىدا ايرىلىپ قالماس ءۇشىن قولدارىن جوعارى كوتەرىپ وتىرۋدى وتىنەدى. سونسوڭ بارىپ كەرەگەدە ءىلۋلى تۇرعان دوربانى الادى. انتالاعان جۇرتتىڭ كوزى ەندى دورباعا تىگىلەدى. قوجا دوربانى ورتاعا اكەلىپ، اۋزىن جايلاپ شەشەدى دە «پىش» دەپ سىلكىپ قالادى. دوربادان باعاناعى اياق جەرگە توپ ەتە تۇسەدى.
سوندا قوجا قىسىلعانىنان:
— مىرزالار! وسىنداي ون اياق ارپا ءبىر پۇت بولادى، — دەسە كەرەك.
You Might Also Like
-
بىردە قوجا قالا سىرتىندا ءجۇرىپ، ءبىر نارسەدەن جامان قورقىپ، تالىپ قالادى.
-
قوجا بىرەۋدى جالداپ، جۇگىن سوعان كوتەرتىپ جولاۋشىلاپ كەلە جاتادى. بىردە جول-جونەكەي الگى ادامىنان كوز جازىپ قالادى، قانشا ىزدەگەنىمەن تابا المايدى.
