InfoHub Logo

بولاشاقتىڭ اجەسى نەمەرە قىزدارىنا اڭگىمە ايتىپ وتىر.

- وسى كۇنى جاياۋ ءجۇرۋ دەگەندى قويدىڭدار. بارىڭدە ءبىر-بىر ۇشاتىن تاباقشا. باياعىنىڭ قىزدارى جاياۋ ءجۇرۋشى ەدى. جۇمىسقا بارۋ ءۇشىن ءۇيدىڭ جانىنداعى ايالداماعا دەيىن جاياۋ ءجۇرىپ باراتىن. ول سوقا باسى بولسا دا جاقسى عوي، جانىندا سومكەسى، قولىندا ۇيالى تەلەفونى بولادى. سول جۇكپەن سوندا جاياۋ ءجۇرىپ بارادى. انە، سونداي قيىندىقتاردى دا كورىپ جۇرگەنبىز.

ول كەزدە جاڭبىر جاۋسا، قىزدار قۋانىپ جاتاتىن، ماحاببات كەلدى، ماحاببات كەلدى، قولشاتىر ۇستاپ شىعامىز دەپ. ول ۋاقىتتا جىگىتتەر ادەمى جىگىت، ادەمى ەمەس جىگىت دەپ ءبولىنىپ جاتادى. ءقازىر ءبارىڭنىڭ دە جۇزىڭنەن قان تامىپ تۇر عوي. سوندا ادەمى ەمەس جىگىت كەلە جاتسا، قىز دەرەۋ قولشاتىرىن جيىپ الا قوياتىن، مالمانداي سۋ بولىپ تۇرادى. ءسويتىپ، ماحاببات ءۇشىن قۇرباندىققا دا بارىپ جاتقان قىزداردى كوردىك. ال ادەمى جىگىت كەلە جاتسا، قىز جىميىپ قانا قولشاتىرىنىڭ استىنا كىرگىزىپ الا قويادى. بار ۋاقيعانىڭ ءبارى سول قولشاتىردىڭ استىندا ءوتىپ جاتاتىن. انە، ءسويتىپ ءجۇرىپ ۇيلەنىپ كەتەدى.

ول زاماندا جۇمىستان كەلىپ، بەل شەشىپ وتىرىپ اس ءىشۋ دەگەن قايدا؟ كۇندىز جۇمىستان كەلدىم عوي دەپ، كىشكەنە قيسايايىن دەسەڭ، بريگادير تەرەزەنى قامشىسىمەن قاعىپ تۇرادى: "الەۋمەتتىك جەلىگە شىق، الەۋمەتتىك جەلىگە شىق" دەپ. وكىل كەلەدى زىركىلدەپ: "قانشا دوس جينادىڭ، ەسەبىن بەر، جوعارى جاق اقپار سۇراتىپ جاتىر" دەپ. سوندا تەلەفونمەن الىسىپ وتىرىپ، كينوسىن، سەريالىن كورىپ ۇلگەرە بەرەدى. ۇكىمەت سونى تالاپ ەتىپ وتىر. ادام دەگەننىڭ ءوزى ءبىر قيىندىققا مويىمايتىن، يتجاندى بولاتىنىن سوندا كورگەنمىن.

ول ۋاقىتتا قىزدار وقىعان قىز، وقىماعان قىز دەپ ءبولىنىپ جاتادى. ءبارى دە وقىعان قىز بولعىسى كەلەدى. وقىعان قىز وقىماعان قىزدى دۇكەنگە جۇمساعىسى كەلىپ تۇراتىن ۋاقىت قوي. كادىمگى الەۋمەتتىك تەڭسىزدىكتىڭ بار كەزى. سول وقىعان قىزداردىڭ ءوزى ءبولىنىپ جاتادى: ءبىر ديپلومى بار وقىعان قىز، ەكى ديپلومى بار وقىعان قىز، ءۇش ديپلومى بار وقىعان قىز دەپ. ارا سالماقتارى دا سوعان قاراي ايقىندالاتىن.

ول كەزدە ءبىر ۇلتتىڭ قىزى ەكىنشى ۇلتتىڭ بالاسىنا ءتيىپ جاتسا، سونى نامىس كورەدى. "قۇداي-اي، ونى نەسىنە نامىس كورەدى ەكەن، ارالارىندا ماحاببات بولسا بولدى ەمەس پە؟" دەپ جاتۋشى ەدى. وسى كۇنى وزگە پلانەتانىڭ جىگىتتەرىنە عاشىق بولىپ جۇرسىڭدەر. ونىڭ ۇيات ەكەنىمەن دە، باسقا ەكەنىمەن دە شارۋالارىڭ جوق. جەرسۇيگىشتىك قاسيەتتەرىڭ كەمىپ بارا جاتىر...

- انە، بۇلارعا بىردەڭە ايتسا بولدى، ۇشاتىن تاباقشالارىنا ءمىنىپ الىپ، دوڭگەلەنىپ-دوڭگەلەنىپ كەتەدى دە قالادى. ۇلكەن ايتىپ وتىر-اۋ، اجە ايتىپ وتىر-اۋ دەگەنمەن شارۋالارى جوق. ءويبۋي، نامازىمدى وقيىن، قاي زاماندا دا نامازىڭ قالمايدى ەكەن عوي. ءاۋپ، ءپىرىم، قۇداي، و، قۇداي، ورنىمنان ءۇش ۇمتىلىپ ازەر تۇردىم عوي، باياعىدا مەنى ۇرشىقشا ءۇيىرىلىپ "قىزىل ورىككە" بيلەپ جۇرگەن قىز دەپ كىم ايتادى ءقازىر.

---