InfoHub Logo

بۇگىن مەملەكەت باسشىسى قاسىم-جومارت توقايەۆ ءوزىنىڭ جارلىعىمەن ءماجىلىستى تاراتىپ، الداعى ءماجىلىس دەپۋتتارىن كەزەكتەن تىس سايلاۋىن 2023 جىلدىڭ 19 ناۋرىزى كۇنى وتكىزۋدى بۇيىردى. پرەزيدەنتتىڭ ايتۋى بويىنشا ەندى ءماجىلىس دەپۋتاتتارىنىڭ 70 پايىزى پارتيالىق ءتىزىم ارقىلى، ال قالعان 30 پايىزى ءبىر مانداتتى وكرۋگتەردەن سايلاناتىن بولادى. ونىمەن قوسا وبلىستار مەن رەسپۋبليكالىق ماڭىزى بار قالالارداعى ءماسليحات دەپۋتاتتارى دا ارالاس جۇيە بويىنشا سايلانادى. دەپۋتاتتاردىڭ 50 پايىزعا جۋىعى ءبىر مانداتتىق جۇيە ارقىلى، قالعانى پارتيالىق ءتىزىم بويىنشا وتەدى. ال اۋدان جانە وبلىستىق ماڭىزى بار قالالارداعى ءماسليحات سايلاۋىندا ازاماتتار ءبىر مانداتتى وكرۋگتەردەن شىققان كانديداتتارعا داۋىس بەرەدى. وسىلايشا، الداعى ۋاقىتتا ءماجىلىس پەن ءماسليحاتتار قۇرامى جاڭا ۇلگى بويىنشا جاساقتالاتىن بولادى. 

پرەزيدەنتتىڭ سوزىمەن ايتار بولساق «مۇنىڭ ءبارى ەلدەگى ءادىل ساياسي باسەكەنى كۇشەيتەدى، ساياسي جۇيەنىڭ اشىقتىعىن قامتاماسىز ەتەدى. سونداي-اق ساياساتكەرلەردىڭ جاڭا بۋىنىنىڭ قالىپتاسۋىنا جول اشادى». سايلاۋ ناۋقانىن ۇيىمداستىرۋ جانە ونى وتكىزۋ ىسىندە اۋماقتىق سايلاۋ كوميسسيالارى ماڭىزدى ءرول اتقاراتىنىن دا باسا ايتىپ ءوتتى. ەندى وبلىستىق سايلاۋ كوميسسيالارى كاسىبي تۇردە تۇراقتى جۇمىس ىستەيتىن بولادى. بۇل شەشىم سايلاۋعا قاتىستى ءىس-شارالاردىڭ ساپالى اتقارىلۋىن قامتاماسىز ەتەتىنى ءسوزسىز.

پرەزيدەنت سايلاۋ ناۋقانى ەلدەگى ساياسي مادەنيەتتىڭ جوعارى ەكەنىن كورسەتىپ، قوعامدى ۇيىستىرا تۇسەتىنىنە سەنىم ءبىلدىردى. شىن مانىندە سايلاۋ قازاقستاندىقتاردىڭ جاڭا ساياسي مادەنيەتىنىڭ ارتۋىنا تاعى دا ءبىر دەم بەرىپ، بەلگىلى ءبىر دارەجەگە ىقپال ەتەتىن ماڭىزدى ساياسي شارا بولادى دەپ ۇمىتتەنەمىز. جالپى كەز-كەلگەن سايلاۋدى وتكىزۋ مەن وعان قاتىسۋ بارىسىن حالىقتىڭ ساياسي بەلسەندىلىگىن ارتتىرۋدىڭ مەكتەبى دەپ ساناعا بولادى. سايلاۋعا بەلسەندى قاتىسىپ، ازاماتتىق پارىزدى ءاردايىم وتەگەن سايىن حالىقتىڭ ساياسي ساناسى ءبىر ساتى وسە تۇسەتىنىن ەستەن شىعارماۋىمىز كەرەك. ياعني، ەلدە نەعۇرلىم ساياسي ۇردىستەر كوپ بولعان سايىن ساياسي مادەنيەتتە سوعۇرلىم شىنىعىپ بويىنا قان جۇگىرەدى.  

ايتىمبەتوۆ نۇركەن ىسقاق ۇلى

---