الداعى ءتورت جىلدا مەكتەپتەردەگى ورىن تاپشىلىعى 1،1 ميلليونعا جەتۋى مۇمكىن
وقۋ-اعارتۋ ۆيسە-مينيسترى عاني بەيسەمبايەۆ ۆەدومستۆودا وتكەن اپپارات جينالىسىندا 2026 جىلعا دەيىن مەكتەپتەردەگى تاپشىلىق 1 ملن 117 مىڭ 900 ورىندى قۇراۋى مۇمكىن ەكەنىن ايتتى.
«ءۇش اۋىسىمدى مەكتەپتەردىڭ جوعارى ۇلەسىنىڭ ساقتالۋ سەبەپتەرىن انىقتاۋ جانە بولجامدى كونتينگەنتتى ەسكەرە وتىرىپ، 2026 جىلعا دەيىن وقۋشى ورىندارىنىڭ تاپشىلىعىن ودان ءارى ەسەپتەۋ ءۇشىن ەكستراپولياسيا ءادىسى قولدانىلدى. بۇل ءادىس وتكەن كەزەڭدەردە بايقالعان ۇردىستەر مەن بولجامدى ديناميكانى ەسكەرە وتىرىپ بولاشاق كورسەتكىشتەردى انىقتاۋعا نەگىزدەلگەن.
وسىلايشا، كونتينگەنتتىڭ جىل سايىنعى ءوسىمىنىڭ بولجامى نەگىزىندە 2026 جىلى ءبىلىم الۋشىلار سانى 4،3 ملن وقۋشىنى قۇرايدى. اتاپ ايتساق، 2022 جىلى – 3،6 ملن، 2023 جىلى – 3،8 ملن، 2024 جىلى – 4 ملن جانە 2025 جىلى 4،3 ملن بالاعا جەتەدى.
بالا تۋۋ، ۋربانيزاسيا، وڭىرىشىلىك جانە ءوڭىرارالىق كوشى-قون، سونداي-اق 1950 جىلعا دەيىن سالىنعان مەكتەپ عيماراتتارىنىڭ توزۋى كورسەتكىشتەرىن ەسكەرە وتىرىپ، 2026 جىلعا دەيىن وقۋشى ورىندارىنىڭ بولجامدى تاپشىلىعى 1 117،9 مىڭدى قۇرايدى»، - دەپ بولجام ناتيجەلەرىمەن ءبولىستى ۆيسە-مينيستر.
بۇعان دەيىن عاني بەيسەمبايەۆ مەكتەپتەردى سالۋ كەزىندە ورىن الاتىن باستى ماسەلەلەردى اتاعان ەدى. ونىڭ ايتۋىنشا، 300-دەن 1200-گە دەيىن ورىن سانى بار تيپتىك مەكتەپ قۇرىلىسىنا مەملەكەت 7،6 ملرد تەڭگەگە دەيىن جۇمسايدى. سونىڭ ىشىندە، مەكتەپتى جابدىقتارمەن جاراقتاندىرۋ سمەتالىق قۇنىنىڭ شامامەن 4-10 پايىزىن عانا قۇرايدى. ياعني، 500 ملن تەڭگەگە دەيىن جۇمسالادى. ناتيجەسىندە، مەكتەپ تاپسىرىلعان سوڭ ونى قاجەتتى پاندىك كابينەتتەرمەن، كومپيۋتەرلىك سىنىپتارمەن، وقۋ زەرتحانالارىمەن، شەبەرحانالارمەن جاراقتاندىرۋ ءۇشىن قوسىمشا 1 ملرد تەڭگەگە قاجەت بولادى.
You Might Also Like
-
سوڭعى كەزدەگى قوعامدا ورىن العان بارلىق پوليمەرلەردى قالاي قۇرعانىمىز تۋرالى ماقالالاردىڭ ۇستەمدىگى بار دەپ ساناعاندىقتان، ولاردى ەلىمىزدە ورىن العان رەجيم تۋرالى جالپى ويدى جاقسارتاتىن وڭ ماقالامە...
-
قۇرمەتتى حالايىق، بۇگىن ءبىزدىڭ قۋانىشىمىزدى بولىسۋگە كەلىپ وتىرعان اعايىن، تۋىس، باۋىرلار!
