اكەنىڭ قىز ۇزاتۋ تويىنداعى تىلەك اماناتى
قۇرمەتتى حالايىق، بۇگىن ءبىزدىڭ قۋانىشىمىزدى بولىسۋگە كەلىپ وتىرعان اعايىن، تۋىس، باۋىرلار!
قۇرمەتتى قۇدا-قۇداعي! ءسوزىمنىڭ ءبىرىنشى بولىگىن سىزدەرگە ارناعىم كەلەدى!
«ءبىزدىڭ ەككەن ءدانىمىز ءپىستى. ءۇيىمدى جارىق ەتكەن نۇرىم، جۇرەگىمدى تەربەگەن جىرىم، انا – جۇمىرتقاسىن جارىپ، اق قۇسقا اينالىپ، كورشى بايتەرەككە ۇيا سالماققا ۇشىپ بارادى دەپ ويلايمىن.
الەمدە اكە ءۇشىن ءوزىنىڭ قىزىنان اسقان سۇلۋ قىز جوق. مەنىڭ قىزىم ءوزىم ءۇشىن – «تاۋ بايان دەپ جاڭعىرادى، وزەن بايان جەپ اعادى، ورمان-توعاي بايان دەپ شۋلايدى» دەپ جار سالاتىن قوزى كورپەشتىڭ بايانىنان دا اسقان سۇلۋ. ەر تارعىنعا تار جەردەن جول تاۋىپ بەرگەن ءاقجۇنىس ارۋدان دا وتكەن اقىلدى! ايتكەنمەن، قوبلاندىنىڭ قىز قۇرتقا باپتاپ –جاراتقان قىرىق كۇندىك كەمدىگى بار تايبۋرىل –تۇلپارى سىندى ومىر-تاجىريبەسى ءالى جەتكىلىكسىز، از. ەندىگى كەمدىگىن ءوزىڭ تولتىر، قۇرمەتتى قۇد-قۇداعيىم!
قاناتتىعا قاقتىرماي، تۇمسىقتىعا شوقىتتىرماي، كۇنگە كۇيدىرمەي، سۋىققا توڭدىرماي بوي جەتكىزدىم، ءوسىردىم. ەندىگى جەردە ەڭلىكگۇلىمنىڭ سۇيەگى – مەنىكى، ەتى – سىزدىكى. مەنەن - ءوتتى، سىزگە- جەتتى. قىز بالا - وزگە ەلدىڭ اماناتى. وزگە ەل – ءسىز ءۇشىن اسىراپ-جەتكەرگەن كوزىمنىڭ نۇرى، باۋىر ەتى بالامنىڭ ەندىگى جەردەگى تاعدىرىن سىزگە اماناتتايمىن، قۇرمەتتى قۇدا-قۇداعي!
بۇدان بىلايعى جەردە وبالدى مەن ساۋابى دا، قىزىعى مەن راحاتى دا ءسىزدىڭ بوساعاڭىزدا، قۇرمەتتى قۇدا-قۇداعي!
مەنىڭ ماپەلەپ وسىرگەن اپپاق گۇل-قىزىم! ەندىگى جەردەگى تىلەگىم ساعان ارنالادى. «قىز بالا – قوناق» دەگەن وسى ەكەن. ماعان وزىڭە ءسوز ارناۋ وتە اۋىر، قىزىم! سەنى مۇڭايتقىم كەلمەيدى، قۋانتقىم كەلەدى. ويتكەنى، ءوز قالاۋىڭمەن تەڭ قوساعىڭدى تاۋىپ، باقىتتى ساپارعا شىعىپ بارسىڭ. مەن وسىنى ويلاپ قۋانامىن! بۇگىن جوتا باسىنا قاتار تىگىلگەن قوس شىبىقتارىم – كۇيەۋ بالام ەكەۋىڭە بار ايتار تىلەگىم؛ قاراعان ەل قىزىعاتىن، قويۋ كولەڭكەسى ەل يگىلىگىنە اساتىن جەمىستى بايتەرەككە اينالىڭدار. ەرتەڭ اپپاق جەلەگى جەلبىرەپ كەلىن بولعالى تۇرعان قىزىم، ساعان ايتارىم؛ سەن دە قۇداعيلىققا جەتىپ، تىلەك ايت! باستارىڭدى – بۇلت، باۋىرىڭدى مۇز شالماسىن!
باقىتتى بولىڭدار!
قىدىر اتا بولسىن بالام جولداسىڭ،
كوكىرەگىڭ ەلدىڭ كۇيىن تولعاسىن.
اتقان تاڭىڭ باعىڭدى اشىپ ءاردايىم،
اتا باباڭ ءارۋاعى قولداسىن!
اشىق بولسىن اسپانىڭ مەن اينالاڭ،
ارداقتاسىن اق ورامال بايلاعان.
تاڭ سارىدە تىلەك تىلە تاڭىردەن،
تارتىنباسىن قولىڭدى ەندى جاي بالام!
ءاۋمين!
You Might Also Like
-
وقۋ-اعارتۋ ۆيسە-مينيسترى عاني بەيسەمبايەۆ ۆەدومستۆودا وتكەن اپپارات جينالىسىندا 2026 جىلعا دەيىن مەكتەپتەردەگى تاپشىلىق 1 ملن 117 مىڭ 900 ورىندى قۇراۋى مۇمكىن ەكەنىن ايتتى.
-
ءقادىرلى قۇدالار، اعايىندار! «ۇلىڭ وسسە ۇلى جاقسىمەن، قىزىڭ وسسە قىزى جاقسىمەن اۋىلداس بول» دەگەن دانا ءسوز بار حالقىمىزدا. بۇگىن مىنە، ەكى جاس ءبىر-بىرىمىزدى تۋىس ەتىپ وتىر. ءبارىمىز دە تۋ...
