InfoHub Logo

باقىتتى جاندار تۇراتىن مەكەن، قۋىرشاقتار قالاسى جانە بايقۇس ينتروۆەرتتەر تۇراتىن ءۇي — بۇنىڭ ءبارى سەناريستەردىڭ نەمەسە جازۋشىلاردىڭ ويىنان شىققان جوق، بۇلار تىم ەرەكشە تۇرعىنداردىڭ ءوز تۇراعى بولىپ كەتكەن شىنىمەن-اق بار جەرلەر.

1. كودينحي، ءۇندىستان

بۇل اۋىلدىڭ اتىن كوپتەپ دۇنيەگە كەلەتىن ەگىزدەر شىعاردى. جالپى دۇنيە ءجۇزىنىڭ باسقا جەرلەرىمەن سالىستىرعاندا بۇل جەردە ەگىزدەر 6 ەسە جيىرەك تۋىلادى ەكەن. بۇل جەردە ءتىپتى دۇنيە جۇزىندەگى العاشقى ەگىزدەر مەن ولاردىڭ اتا-انالارىنىڭ اسسوسياسياسى ۇيىمداستىرىلدى. 

كوحينديدەگى كونە كوز قاريالاردىڭ ايتۋىنشا اۋىلدا ەگىزدەردىڭ ءجيى-جيى تۋا باستاعانىنا سونشالىقتى ۇزاق ۋاقىت وتكەن جوق — شامامەن 15 نەمەسە 20 جىل بولعان. ازىرشە بۇل فەنومەندى ەشكىم عىلىمي تۇرعىدا ءتۇسىندىرىپ بەرە الماي وتىر.  

ءۇندىستاندىق ەگىزدەر اۋىلى الەمدەگى ەگىزدەرى كوپ جالعىز جەر ەمەس. نيگەريالىق يگبو-ورا قالاسىندا دا وسىعان ۇقساس احۋال قالىپتاسقان. بۇل جاعدايدا عالىمدار فەنومەننىڭ سەبەپتەرىن ايتىپ بەرۋدىڭ ءسال الدىندا تۇر. ولاردىڭ پىكىرىنشە كوپتۇقىمدى جۇكتىلىككە جەرگىلىكتى تۇرعىندار كۇندەلىكتى دەرلىك ازىق ەتەتىن كاسساۆا وسىمدىگى سەپ بولادى.    

2. برازيليالىق پيراحا ۇندىستەرى

برازيليالىق امازوناس شتاتىندا، مايسي وزەنىنىڭ جاعالاۋىندا، يت تۇمسىعى وتپەيتىن قالىڭ دجۋنگلي ىشىندە الەمدەگى ەڭ باقىتتى ادامدار بولىپ سانالىپ جۇرگەن پيراحا تايپاسى تۇرىپ جاتىر.  

بۇل تايپادا الەۋمەتتىك يەرارحيا دەگەن جوق. ول جەردە باسقالارعا نە ىستەۋ كەرەك ەكەنىن ايتۋعا تىيىم سالىنعان. پيراحا تىلىندە ءدال ءقازىر ءدال وسى جەردە بولىپ جاتقان نارسەلەردەن باسقا جايىندا اڭگىمەلەسۋ مۇمكىن ەمەس، ونىڭ ەسەسىنە دۋىلداپ شۋلاۋعا جانە ىسقىرۋعا بولادى. سانداردى بىلدىرەتىن سوزدەر جوق، بارى-جوعى 2 تۇسىنىك قانا بار: «ءبىر» جانە «بىرنەشە». بۇل حالىقتىڭ وكىلدەرى ادامنىڭ جاسى تۋراسىندا ويلانىپ باس قاتىرمايدى، اتى-جوندەرىن وزگەرتۋى مۇمكىن جانە تاۋلىگىنە 2 ساعات قانا — ءار التى ساعات سايىن 30 مينۋتتان ۇيىقتاپ الادى.  

تايپادا تولاسسىز باقىت اتموسفەراسى ۇستەمدىك قۇرادى. بۇنىڭ سەبەبى تەك قازىرگى ءساتتى عانا ويلايتىندىقتان، پيراحالىقتاردىڭ ازىق-تۇلىك قورىن جينامايتىندىعىمەن، ساتىپ الۋعا بولاتىن زاتتاردى جاساپ الۋ ءۇشىن ەش ەڭبەك ەتپەيتىندىگىمەن، تابيعاتپەن ۇيلەسىمدە ءومىر ءسۇرىپ، جاي عانا ءومىردىڭ راحاتىنا بولەنۋگە تىرىساتىندىعىمەن بايلانىستى بولۋى مۇمكىن.    

3. سەنترەيليا، اقش

ال سەنترەيليانى 2016 جىلدان بەرى 10 ادام عانا مەكەن ەتىپ كەلەدى جانە ولاردىڭ ۇيلەرى وتقا ورانعان ءتۇپسىز تۇڭعيىق ۇستىندە تۇر. ولار، ۇيرەنىپ كەتكەن جەردەن كەتكىسى كەلمەگەندىكتەن عانا جىلجىمالى جەر قىرتىسى مەن تۇنشىقتىرعىش گازدىڭ الەگىنە كونىپ وتىر.   

بار بالە 1962 جىلى، جەرگىلىكتى اتقامىنەرلەر قاراۋسىز قالعان شاحتانىڭ ويپاتىنا قوردالانعان قالالىق كۇل-قوقىستان قۇتىلۋ ءۇشىن ءورت سوندىرۋشىلەر كومانداسىن جالداعان كەزدە، باستالدى. ايتەۋىر ءبىر نارسە دۇرىس بولماي قالىپ، وت ىرگەلەس تۋننەلدەردى دە شارپىدى. وتتىڭ قاتتى جانعانى سونداي، ونى ءسوندىرۋدىڭ ەش ىڭعايى كەلمەدى. جەر استىنداعى كومىر ءالى بىقسىپ جانىپ جاتىر.  

پەنسيلۆانيانىڭ بيلىگى بۇل قالاعا كوشىپ بارۋعا تىيىم سالدى، ال ءالى تۇرىپ جاتقان اۋلەتتەر سەنترەيليادان كوشىپ كەتكەن كەزدە ول ەلسىز مەكەنگە اينالادى.   

4. ناگورو، جاپونيا

ءبىر قاراعاندا جاپونيانىڭ بۇل اۋىلىندا 380-گە جۋىق ادام تۇراتىنداي بولىپ كورىنۋى مۇمكىن. شىن مانىندە تۇرعىندار الدەقايدا از. مىسالى، 2016 جىلى ولاردىڭ سانى نەبارى 30 بولعان ەدى. قالعاندارى كىمدەر؟ قالعان «تۇرعىندار» — سۋرەتشى تسۋكيمي ايانو ارنايى جاساپ شىققان ادام بويلاس قۋىرشاقتار.  

بۇل كىسى ناگورودا دۇنيەگە كەلگەن، ءبىراق كىشكەنتاي كەزىندە اتا-اناسىمەن بىرگە كوشىپ كەتكەن. قايتىپ كەلگەن سۋرەتشى جەرلەستەرىنىڭ سانى 300 ادامنان 40 ادامعا كەمىپ كەتكەنىنە قاتتى قىنجىلدى.  

سول كەزدە جاپوندىق ايەل ادام بويلاس قۋىرشاقتاردى جاساي باستادى. كەيبىرى بۇرىن سول جەردە تۇرعان كىسىلەرگە ۇقساس بولدى، كەي بەينەلەر سۋرەتشىنىڭ قيالىنان تۋدى. ءقازىر ناگورودان 350 قۋىرشاقتى كورۋگە بولادى. بۇل جەر كوڭىلگە قورقىنىش ۇيالاتاتىندىعىنا قاراماستان، ول تۋريستەر باراتىن كورنەكى ورىنعا اينالىپ، بەيرەسمي تۇردە «تۇلىپتار اۋىلى» دەگەن اتاۋعا يە بولدى.   

5. ليلي دەيل، اقش

بۇل ەلدى مەكەن نيۋ-يورك شتاتىنىڭ سولتۇستىك-باتىسىندا ورنالاسقان. بۇل جەردە وزدەرىن سىيقىرشىلار، مەديۋمدار جانە ەكستراسەنستەر دەپ اتايتىندار تۇرادى — بارلىعى 270 ادامعا جۋىقتايدى. بۇعان قوسا بۇل جەرگە كەنتتىڭ تۇرعىندارىنىڭ عاجايىپ قاسيەتتەرىنە سەنەتىن 22 مىڭ ادام جىل سايىن كەلىپ تۇرادى.   

ايتپاقشى، ليلي دەيلگە تانىمال «تىلسىم كۇش» («Supernatural») سەريالىنىڭ ەپيزودتارىنىڭ ءبىرى ارنالعان. بۇل سەريادا ءار ءتۇرلى جىن-شايتاندى ىزدەپ جۇرگەن اعايىندى ۆينچەستەرلەر تۇسىنىكسىز كىسىلەر ءولىمى بولعان كەزدە وسى كەنتكە بارادى. اقىر سوڭىندا جىن-پەرىنى اۋلاۋشىلار وزدەرىن مەديۋمبىز دەيتىن ليلي دەيلدىڭ تۇرعىندارى — كوز بوياۋشى دۇمشەلەر ەكەنىن انىقتايدى.  

6. ۆەديكالىق شاھار، اقش

بۇل ەرەكشە ەلدى مەكەندە 250-دەن استام ادام تۇرادى جانە ولاردىڭ ءبارى ۆەدالارعا — ءيندۋيزمنىڭ ەجەلگى كيەلى ماتىندەرىنە سايكەس ءومىر سۇرۋگە تىرىسادى.   

قالاشىق امەريكالىق ايوۆا شتاتىندا ورنالاسقان، ال ونىڭ تولىق اتاۋى ماحاريشي ۆەديك سيتي. بۇلاي اتالۋ سەبەبى — قالانى سالعان كەزدە ءماحاريشيدىڭ ساۋلەتتىك جۇيەسى پايدالانىلعان. ءاربىر عيماراتتىڭ تەرەزەلەرى شىعىسقا قارايدى جانە ورتاسى بوس قالدىرىلادى. جەرگىلىكتى تۇرعىنداردىڭ وسى قاعيدالار بويىنشا سالىنعان ۇيلەر بەيبىتشىلىكتىڭ بولۋىنا، سونىمەن قاتار ادامداردىڭ ۇزاق ءومىر سۇرۋىنە سەپ بولاتىنىنا سەنىمى زور.     

ۆەديك سيتيدە ايۋرۆەدا ءىلىمى قولدانىلاتىن «رادجا» سپا-ورتالىعى جانە شەڭبەر بويىمەن قويىلعان 10 اق بەتون جانە ءمارمار عيماراتتان قۇرالعان اشىق وبسەرۆاتوريا بار. ولار عارىشتى باقىلاپ وتىرۋ ءۇشىن قاجەت.   

مۇندا ويداعىداي قاتىناس قۇرالى بولىپ سانسكريت ءتىلى سانالادى. دەگەنمەن، ەشكىمگە اعىلشىنشا سويلەۋگە تىيىم جوق.  

7. ءبىر بولمە عانا سياتىن ارال، اقش

بۇل ارالدا، شاماسى، دۇنيە جۇزىندەگى ەڭ سورلى ينتروۆەرتتەر تۇراتىن بولۋى كەرەك. 1950 جىلدارى ادامدار مەن قالالىق ومىردەن جىراقتا دەمالۋدى قالاعان سايزەلاند اۋلەتى كىپ-كىشكەنتاي Just Room Enogh Island (اعىل. «ءبىر بولمەگە عانا جەتەدى») ارالىن ساتىپ العان. جاڭا يەلەرى ارالدا ءۇي تۇرعىزدى جانە سۋ قورشاۋىنداعى جالعىزدىق راحاتىنا بولەنەتىندەرىنە ءۇمىتتى بولدى.  

الايدا، وزەن ورتاسىندا قالقىپ جۇرگەندەي كورىنەتىن ءۇي تەز ارادا حالىق اراسىندا تانىمال بولىپ كەتتى دە، قازىرگى تاڭدا ءارتۇرلى ەرىگىپ جۇرگەن ادامداردىڭ نازارىنا ۇنەمى ءىلىنىپ قالىپ ءجۇر. ول رەسمي تۇردە تۋريستىك ورىن بولىپ سانالماسا دا، كوپتەگەن دەمالىستا جۇرگەندەر شاعىن ءۇيدى ءبىر كورگىسى كەلىپ، ايدىنعا بارادى، جانە كوتتەدج اينالاسىندا فوتوكامەرالاردىڭ جارقىلدارى ءجيى-جيى بايقالىپ قالىپ جاتادى. بۇنداي جاعدايدا ارقانى كەڭگە سالۋ جانە جۇرتتان دەمالۋ وڭاي بولا قويمايدى-اۋ.

---