InfoHub Logo

ۇلكەن قالانىڭ ۋ-شۋىنان شارشاعان ادام ءبىر تانىسىن كەزدەستىرمەيتىندەي قايدا كەتىپ قالۋىنا بولادى؟

PhinDeli (بۋفورد)، ۆايومينگ، اقش 1. ءبىر ادام تۇرادى

بۇل قالانىڭ اتاعى كوپ ۋاقىت بويى ءبىر عانا تۇرعىنى بولعانىمەن شىققان. دون سەممونس – قالا مەرى، اۋلا سىپىرۋشى، جانارماي قۇيۋشى جانە جەرگىلىكتى دۇكەننىڭ ساتۋشىسى. ول بۋفورد قالاسىنا 1980 جىلى وتباسىمەن بىرگە كەلگەن، جۇبايى قايتىس بولعاننان كەيىن ۇلى ەكەۋى تۇرعان. 2008 جىلى ۇلى كوشىپ كەتىپ، مەر جالعىز قالدى، ال 2012 جىلى قالانى ساتۋعا شىعاردى.

ۇيمەن بىرگە 1905 جىلى سالىنعان مەكتەپ عيماراتى، جانارماي بەكەتى، كولىك گاراجى، ساراي جانە ءبىر كەزدەرى اتاقتى قاراقشى بۋچ كەسسيدي توناماق بولعان دۇكەن ساتىلىپ كەتە باردى. ون بەس مينۋتقا سوزىلعان اۋكسيوننىڭ جەڭىمپازى – ۆەتنامدىق كاسىپكەر، ال كەلىسىم قۇنى - 900 مىڭ دوللار بولدى. جاڭا يەسى قالانىڭ بۋفورد اتاۋىن PhinDeli دەپ وزگەرتىپ، اقش-تا ۆەتنام كوفەسىن تانىمال ەتۋ جونىندەگى بيزنەسپەن اينالىسا باستادى. دون سەممونس بولسا، بۇرىنعى ءوز قالاسىنا قوسىمشا مەر بولىپ رەسمي جۇمىسقا قابىلداندى.

بۋفورد ۆايومينگ شتاتىندا، شايەنجانە لارامي قالالارىنىڭ ورتاسىندا، Interstate 80 اۆتوكولىك جولىنىڭ بويىندا ورنالاسقان. قالاشىق 1860 جىلدارى قۇرلىق ارالىق تەمىر جول قۇرىلىسى ءجۇرىپ جاتقان كەزەڭدە پايدا بولعان. كەي كەزەڭدەردە مۇندا ەكى مىڭ ادامعا دەيىن تۇرعان. ماگيسترال باعىتى وزگەرگەننەن كەيىن قالا تۇرعىندارىنىڭ سانى كۇرت كەمي باستادى. 

نە ىزدەپ بارامىز: بۇل ارادان قاعازعا جازىلعان حات نەمەسە ەستەلىك SMS جىبەرۋدىڭ ءوزى نەگە تۇرادى: قالاشىقتىڭ دەربەس پوچتا يندەكسى جانە ۇيالى بايلانىس مۇناراسى بار.

حۋم، حورۆاتيا 2. 23 ادام مەكەندەيدى

بۇل ورتاعاسىرلىق قامال-قالا الەمدەگى ەڭ كىشكەنتاي قالا بولىپ گيننەستىڭ رەكوردتار كىتابىنا ەنگەن. ول يستريا تۇبەگىنىڭ ورتالىق بولىگىندە، ءبىر جوتانىڭ باسىندا، 349 م بيىكتىكتە ورنالاسقان. اڭىزدارعا سۇيەنسەك، حۋمدى الىپ ادامدار الىپ تاستاردان سالعان. قالا مارتەبەسىن سوناۋ ءحى عاسىردا يەمدەنگەن ەلدى مەكەننىڭ ءوز مەرى، پوليسياسى، دارىگەرى، سوتى مەن ءورت ءسوندىرۋشىسى بار. وتكەن عاسىردىڭ قىرقىنشى جىلدارى مۇندا 450 ادام مەكەندەگەن.

حۋمدا ءحىى عاسىرعا جاتاتىن فرەسكالار جاقسى ساقتالعان، ودان بولەك  13 ءۇي، 2 كوشە، 2 عيباداتحانا، دۇكەن، پوچتا، زيرات، مەيرامحانا جانە ءقوناقۇي بار. جىل سايىن ماۋسىم ايىنىڭ ورتاسىندا قالادا مەر سايلاۋى وتەدى، وعان تەك ەر ادامدار قاتىسادى. سايلاۋدىڭ اياعى بي فەستيۆالىنە ۇلاسادى.

نە ىزدەپ بارامىز:  تاريحي قالانى كورۋگە.

سترجەلا ۇستىندەگى رابشتەين، چەحيا 3. 25 تۇرعىنى بار

كونە، ادەمى، چەحيانىڭ دا، بۇكىل ورتالىق ەۋروپانىڭ دا ەڭ كىشكەنتاي قالاسى  سترجەلا ۇستىندەگى رابشتەين قالا مارتەبەسىن 1337 جىلى العان. مۇندا ءبىر عانا كوشە مەن ءبىر الاڭ بار. ەڭ تانىمالى – XIV عاسىرعا جاتاتىن گوتيكا ستيلىندە سالىنعان قامالدىڭ قيراندىلارى، باروككو ستيلىندەگى قامال جانە كونە كوستەل. ودان بولەك، ەۆرەيلەر زيراتى، كونە تاس كوپىر، توقتاپ قالعان اعاش ديىرمەن، ءقوناقۇي جانە اتقورا بار.

رابشتەيننىڭ اتىن شىعارعان – وسى ارادا وندىرىلەتىن سلانەس. ونى ءالى دە جەرگىلىكتى ۇيلەردىڭ شاتىر جابىنىنان كورۋگە بولادى. ۇيلەردىڭ كوبىن تۇرعىندار جازدا عانا پايدالانادى.

نە ىزدەپ بارامىز: تاربيەلى ەۆرەي ەلەستەرىن ىزدەۋگە – قامالدا دەمالىس ءۇيى جۇمىس ىستەيدى.

مەلنيك، بولگاريا 4. 390 ادام مەكەن ەتەدى

مەلنيك بولگاريانىڭ ەڭ كىشكەنتاي قالاسى بولىپ سانالادى. الايدا، حح  عاسىردىڭ باسىندا عانا مۇندا 5 مىڭ ادام ءومىر سۇرگەن (نەگىزىنەن گرەكتەر). قالاشىقتىڭ اتاۋى ماڭىنداعى بور جارتاستاردان شىققان. مەلنيكتەگى – بۇكىل بولگارياداعى دا –ەڭ كونە عيمارات – ءحىىى عاسىرعا جاتاتىن بويار (ۆيزانتيا) ءۇيى. قالاشىقتا جالپى جۇزگە تارتا مادەني ەسكەرتكىش بار، ەڭ قىزىقتىلارى – ءحىى عاسىرداعى نيكولاي ءموناستىرى، پەتر جانە پاۆەل اپوستولدار شىركەۋى، ريم كوپىرى جانە كونە تۇرىك مونشاسى. ايتسە دە، مەلنيكتىڭ اتىن شىعارعان – فولكلور فەستيۆالدەرى جانە ەجەلگى تەحنولوگيا بويىنشا ازىرلەنەتىن قولدان جاسالعان شاراپ. شاراپ قۇيىلعان ۇلكەن بوشكەلەر جارتاس قۋىستارىندا ساقتالادى.

نە ىزدەپ بارامىز: ءوزىڭىزدى ۋاقىت تەرەڭىنە ساپار شەككەن جولاۋشى سەزىنۋ ءۇشىن: مۇندا ورتا عاسىردان بەرى كوپ ەشتەڭە وزگەرمەگەن. ونىڭ ۇستىنە، مەلنيكتە الىپ پلاتان جانە شىنار اعاشتارى وسەدى، كەيبىرەۋلەرىنىڭ جاسى جۇزدەگەن جىلعا جەتەدى. 

كاللاستە، ەستونيا 5. 953 ادام مەكەندەيدى

ەستونيانىڭ كاللاستە (ەستون تىلىنەن اۋدارعاندا — «جاعالاۋ») قالاسى چۋد كولىنىڭ جاعاسىندا ورنالاسقان. 1923 جىلعا دەيىن قالانىڭ اتاۋى ماڭىنداعى قىزىل قۇم شوقىلارىنا قاراپ قىزىلتاۋ بولعان. كاللاستەنىڭ ىرگەتاسى  XVIII عاسىردا قالانعان، 1938 جىلى قالا مارتەبەسى بەرىلگەن. 72% ورىستار قۇرايتىن تۇرعىندارىنىڭ كوبى بالىق اۋلاۋمەن اينالىسادى. قالانىڭ اۋدانى ەكى شاقىرىمعا دا جەتپەيدى. 

قۇم توبەلەرىنەن بولەك، كاللاستەنىڭ اتىن ەسكى سالتتى ۇستانۋشىلار شىركەۋى جانە كەڭەس اسكەرلەرىنىڭ باۋىرلاستار قورىمى شىعارعان. بۇل – ەلدەگى ەڭ كەدەي قالا، كاللاستە مەرىنىڭ دەرەكتەرىنە سۇيەنسەك، مۇندا «بالالاردىڭ 40،8% سالىستىرمالى تۇردە كەدەي تۇرادى» ەكەن.

نە ىزدەپ بارامىز: جاي، كورىپ قايتۋ ءۇشىن)

ديۋربيۋي، بەلگيا 6. 11 مىڭ تۇرعىنى بار

ديۋربيۋي — بەلگيانىڭ قۇرتاقانداي عانا، تۇرعىندارى فرانسۋز تىلىندە سويلەيتىن قالاشىعى. قالا مارتەبەسىن 1331 جىلى يەلەنگەنىمەن، ديۋربيۋي اتى العاش رەت ءحى عاسىردا اتالادى. قالاشىقتا ءۇش گەولوگيالىق ايماق بار، شالعىن، جازىق دالا، تاۋ، ورمان، ۋرت وزەنىنىڭ  لاندشافتارى ەرەكشەلىگىمەن كوز تارتادى. قالاشىق تۋريستەر ەسەبىنەن كۇنەلتىپ وتىر جانە ورتاعاسىرلىق اتموسفەراسىن: تاس توسەلگەن تار كوشەلەرىن، تاستان سالىنعان ۇيلەردى، نيكولاي شىركەۋىن، 1380 جىلعى نان بازارىن جانە 889 جىلى سالىنعان كونە قامالدى كوزىنىڭ قاراشىعىنداي ساقتايدى.  ديۋبيۋيعا العاشقى تۋريستەر XIX عاسىردا كەلە باستادى، سودان بەرى قالا تۇرلەنىپ، ينفراسترۋكتۋراسى دامىدى، ءقازىر مۇندا قوناقۇيلەر، مەيرامحانالار، ءدامحانالار مەن كادەسىي ساتاتىن دۇڭگىرشەكتەر بار.

نە ىزدەپ بارامىز: مۇندا ات جەگىلگەن پاۋەسكەمەن سەرۋەندەپ، ۋرت وزەنىن بويلاي رافتپەن ءتۇسىپ، توپياري شاعىن باعىنداعى سۋرەت سالا وتىرعىزىلعان اعاشتاردى ارالاپ سەرۋەندەپ قايتۋعا بولادى. ەڭ ماڭىزدىسى – مۇندا ءسىز ءبىر دە ءبىر تانىسىڭىزدى كەزدەستىرمەيسىز.

---