InfoHub Logo

ەرتەدە بولىستىققا تالاسىپ جۇرگەن، ءتىلى وتكىر، سوزگە شەشەن ءابىلقاس دەگەن كىسى ارنايى كەلىپ، قاراجان اۋلىنا ات باسىن تىرەپتى. قاراجان وسى وڭىردەگى اتى شۋلى بارىمتاشى، ۇرى ۇستايتىن ادام بولسا كەرەك.

كەلگەن قوناقتى ول قول قۋسىرىپ قارسى الىپ، جولىنان جىعىلماي قوي سويىپ، كۇتىپ الىپتى. اس ۇستىندەگى اڭگىمە-دۇكەنگە ءابىلقاس ءتىس جارىپ ارالاسپايدى. قوناق اتتانعالى جاتقاندا بۇل كەلىستىڭ تەگىن ەمەس، سالماعى بار ەكەنىن سەزگەن جىرىندى قاراجان:

— ابەكە، ادەيى كەلگەندە بۇيىمتايىڭىزدى ايتىپ كەتپەيسىڭ بە؟ — دەگەن ەكەن.

سوندا اتقا ىرعىپ قونعان ءابىلقاس:

— شىراعىم، العانىڭدى بىلسەڭ، بەرگەنىڭ سول ەمەس پە؟ — دەپ اتتانىپ كەتىپتى. قاراجاندى قاۋمالاپ تۇرعان اۋىلداس، يگى جاقسىلارى اڭ-تاڭ بولىپ، اڭتارىلىپ قالىپتى. تەك ۇيگە كىرىپ جايعاسقان سوڭ عانا قاراجان اقساقالدارعا قاراپ:

— ءابىلقاس ءبىزدى قاتىردى. «العانىڭدى بىلسەڭ، بەرگەنىڭ سول ەمەس پە» دەگەنى — تالاي رەت جىلقىمدى بارىمتالاپ الدىڭدار. ۇندەگەنىم جوق. الماقتىڭ دا سالماعى بار. ەندى سايلاۋدا ماعان شار سالاسىڭدار دەگەنى، — دەپ جاستىققا جانتايا كەتكەن ەكەن.

---